Wan Taksi, Wan Boe blong Skul, mo Wan Ansa long Prea
Man we i raet i stap laef long Rivers State, Naejeria.
Mifala i kasem wan tingting se bae mifala i faenem hem, be ?from wanem nao i no stap wok?
Wan dei oli bin givim wan riferol long misinari kompanion blong mi mo mi, blong wan man we i stap long wan vilej we oli singaotem Tema, kolosap long wan naes siti blong Akra, Gana. Ol namba blong haos long vilej ia i no stret tumas, mekem se oli raet nomo blong tokbaot gud haos ia blong helpem mifala blong faenem.
Taem mifala i kasem vilej, mifala i folem ol daereksen be mifala i no save faenem man ia from se i gat fulap haos olsem we oli tokbaot long raeting ia. Mitufala i konfius mo disaed blong noknok long ol doa blong ol neiba mo askem, be i luk olsem nogat wan man i save man ia we mitufala i stap lukaotem. Mi bin filim wan tingting blong askem Papa long Heven blong help.
Afta we mitufala i bin prea, mi gat wan filing se bae mitufala i faenem man ia we mitufala i stap lukaot, mekem se mitufala i traehad moa. Yet, mitufala i no faenem hem. Mitufala i taet mo disaed blong gobak long ol eria blong proslaet blong mitufala from mitufala i gat ol apoenmen. Taem mitufala i kasem ples we ol taksi i stap pak long hem, taksi draeva ia we i bin karem mitufala i go long vilej i luk se mitufala i no glad mo askem sapos mitufala i bin faenem man ia we mitufala i stap lukaotem. Ansa blong mitufala, yes, hem i bin no.
Hem i talem se bae mifala i go insaed long wan skul we i stap long kona mo askem long we. Mitufala i talem long hem se hemia i no wanem oli talem long raeting we oli givim long mitufala, be hem i fos. Mitufala i kamaot long taksi mo wokbaot from skul—i no from se mitufala i ting se bae mitufala i faenem wan man, be i blong mekem fren ia we i wari blong hapi nomo.
Taem mitufala i stat blong wokbaot i go long administresen bilding long skul, wan smol boe i stap ron kam long mitufala. Hem i smael mo talem long mitufala se hem mo brata blong hem nomo i ol memba blong Jisas Kraes Ia blong Ol Lata-dei Sent we i stap laef long eria ia mo hem i save helpem mitufala.
Kompanion blong mi mo mi i luklukbak mitufala mo no bilivim. I bin wan merikel. Boe ia i bin helpem mifala blong faenem man ia we mitufala i stap lukaotem, mo afta hem i kam blong akseptem gospel mo kasem baptaes.
Eksperiens ia i bin tijim se Papa long Heven i stap ansa long ol prea long taem blong Hem mo long wei blong Hem. Taem yumi no kasem ol ansa long ol prea blong yumi kwiktaem, yumi save praktisim fet long Hem mo lan blong gat fasin blong wet long taem.
Droing i kam long Corey Egbert