Te autahu’ara’a a Melehizedeka ’e te mau tāviri
I roto i te ’Ēkālesia, e fa’a’ohipahia te mana nō te autahu’ara’a i raro a’e i te fa’aterera’a a te ti’a fa’atere autahu’ara’a tei mau i te mau tāviri nō taua autahu’ara’a ra.
’Ua mā’iti au e paraparau rahi atu ā nō ni’a i te autahu’ara’a a te Atua, e tumu parau tei paraparau-a’ena-hia e toru ta’ata a’o tei ha’api’i nāhea te autahu’ara’a i te ha’amaita’i i te orara’a o te mau vahine, te feiā ’āpī tamāhine ’e te feiā ’āpī tamāroa.
Te autahu’ara’a, e mana hanahana ïa ’e e ha’amanara’a tei ti’aturihia i te ta’ata nō te rave i te ’ohipa a te Atua nō te maita’i o tāna mau tamari’i. E ’ere te autahu’ara’a ’o rātou tei fa’atōro’ahia i te hō’ē tōro’a autahu’ara’a ’aore rā ’o rātou e fa’a’ohipa nei i tōna mana. E ’ere te mau taea’e tei mau i te autahu’ara’a, te autahu’ara’a. ’Aita i tano ’ia parau i te mau taea’e tei fa’atōro’ahia ’o rātou te autahu’ara’a, e mea tano rā ’ia parau ia rātou ’o te feiā e mau nei i te autahu’ara’a.
Tē vai nei te mana o te autahu’ara’a i roto i te fa’anahora’a ’Ēkālesia ’e te fa’anahora’a ’utuāfare. E mea ta’a ’ē rā te fa’aterera’a i te mana autahu’ara’a ’e te mana o te autahu’ara’a, i roto i te ’Ēkālesia ’e i roto i te ’utuāfare. Pauroa te reira mai te au i te mau parau tumu i ha’amauhia e te Fatu. Te fā o te fa’anahora’a a te Atua, ’o te arata’ira’a ïa i tāna mau tamari’i i te ora mure ’ore. E mea faufa’a te mau ’utuāfare tāhuti nō taua fa’anahora’a ra. Tē vai nei te ’Ēkālesia nō te fa’afāna’o i te ha’api’ira’a tumu, te mana ’e te mau ’ōro’a tei tītauhia nō te fa’aherehere i te mau tā’amura’a ’utuafare i roto i te mau tau mure ’ore. Nō reira, e mea ha’apūai rāua te tahi ’e tahi, te fa’anahora’a ’utuāfare ’e te ’Ēkālesia a Iesu Mesia. ’Ua matara te mau ha’amaita’ira’a o te autahu’ara’a, mai te ’īra’a o te ’evanelia ’e te mau ’ōro’a mai te bāpetizora’a, te ha’amaura’a ’e te fāri’ira’a i te hōro’a nō te Vārua Maita’i, te ’ōro’a hiero ’e te fa’aipoipora’a mure ’ore, i te mau tāne mai te mau vahine.1
Te autahu’ara’a e paraparauhia ra i’ō nei, ’o te autahu’ara’a a Melehizedeka ïa, tei fa’aho’ihia mai i te ha’amatara’a nō te Fa’aho’i-fa’ahou-ra’a o te ’evanelia. ’Ua fa’atōro’ahia Iosepha Semita ’e Oliver Cowdery e Petero, Iakobo ’e Ioane, tei fa’a’ite ē « tei ia rātou ra te mau tāviri nō te bāsileia, ’e nō te tau tu’ura’a nō te ’īra’a o te mau tau nei » (Te Parau Ha’api’ira’a ’e te mau Parau Fafau 128:20). ’Ua fāri’i teie nā ’āpōsetolo matahiapo e toru i terā mana mai roto mai i te Fa’aora iho. Te tahi noa atu mana ’e tōro’a i roto i te autahu’ara’a, e mau tū’atira’a ana’e ïa nō te autahu’ara’a a Melehizedeka (hi’o Te Parau Ha’api’ira’a ’e te mau Parau Fafau 107:5), inaha tei te reira « te ti’ara’a nō te peresidenira’a, ’e tei te reira te mana ’e te [ha’amanara’a] i ni’a a’e i te mau tōro’a i roto i te ’ēkālesia i te mau ’anotau ato’a o te ao nei » (Te Parau Ha’api’ira’a ’e te mau Parau Fafau 107:8).
I roto i te ’Ēkālesia, e fa’a’ohipahia te mana nō te autahu’ara’a rahi a’e, te autahu’ara’a a Melehizedeka, ’e te autahu’ara’a iti a’e, te autahu’ara’a a Aarona, i raro a’e i te fa’aterera’a a te ti’a fa’atere autahu’ara’a, mai te ’episekōpo ’aore rā te peresideni, tei mau i te mau tāviri nō taua autahu’ara’a ra. Nō te māramarama i te fa’a’ohipara’a i te mana nō te autahu’ara’a i roto i te ’Ēkālesia, tītauhia ’ia māramarama i te parau tumu nō te mau tāviri o te autahu’ara’a.
’Ua hōro’ahia mai te mau tāviri o te autahu’ara’a a Melehizedeka, te mau tāviri o te bāsileia, e Petero, Iakobo ’e Ioane, ’aita rā te reira i fa’ahope i te fa’aho’i-fa’ahou-ra’a o te mau tāviri o te autahu’ara’a. E mau tāviri nō te autahu’ara’a tei tae mai i muri iho. I muri iho i te ha’amo’ara’a o te hiero mātāmua o teie tau tu’ura’a i Kirtland, i Ohio, e toru peropheta, ’o Mose, Elia ’e Eliaha, tei fa’aho’i mai i « te mau tāviri nō teie tau tu’ura’a », ’e tae noa atu i te mau tāviri nō te ha’aputuputura’a o ’Īserā’ela ’e te ’ohipa o te mau hiero a te Fatu (hi’o Te Parau Ha’api’ira’a ’e te mau Parau Fafau 110), mai tā te peresideni Eyring i fa’ata’a pāpū roa a’enei.
Te hi’ora’a mātauhia nō te fa’aterera’a i te mau tāviri, ’o te ravera’a ïa i te mau ’ōro’a o te autahu’ara’a. E ’ohipa tura rahi te hō’ē ’ōro’a, e tāpa’o nō te ravera’a i te mau fafaura’a ’e te paraura’a i te mau ha’amaita’ira’a. I roto i te ’Ēkālesia, e ravehia te mau ’ōro’a ato’a i raro a’e i te parau fa’ati’a a te ti’a fa’atere autahu’ara’a e mau nei i te mau tāviri nō terā ’ōro’a.
Tei mātau-roa-hia, e fa’aterehia te hō’ē ’ōro’a e te mau ta’ata tei fa’atōro’ahia i te hō’ē tōro’a o te autahu’ara’a, ma te ’ohipa i raro a’e i te fa’aterera’a o te ta’ata tei mau i te mau tāviri o te autahu’ara’a. ’Ei hi’ora’a, e fa’atere te feiā tei mau i te mau tōro’a ta’a ’ē o te autahu’ara’a a Aarona i te ’ōro’a mo’a, i raro a’e i te mau tāviri ’e te fa’aterera’a a te ’episekōpo, tei mau i te mau tāviri o te autahu’ara’a a Aarona. E tano ato’a te reira parau tumu i te mau ’ōro’a o te autahu’ara’a i reira te mau vahine e fa’atere ai i roto i te hiero. Noa atu ā ’aita te mau vahine i mau i te tōro’a nō te autahu’ara’a, e rave rātou i te mau ’ōro’a mo’a o te hiero i raro a’e i te parau fa’ati’a a te peresideni o te hiero, tei mau i te mau tāviri nō te mau ’ōro’a o te hiero.
Te tahi ato’a hi’ora’a nō te mana o te autahu’ara’a i raro a’e i te fa’aterera’a a te hō’ē ta’ata tei mau i te mau tāviri, ’o te mau ha’api’ira’a ïa a te mau tāne ’e te mau vahine tei pi’ihia nō te ha’api’i i te ’evanelia i te ta’ata, i roto ānei i te piha ha’api’ira’a o tā rātou pāroita ’aore rā i roto i te ’āua misiōni. Te tahi fa’ahou hi’ora’a, ’o rātou ïa tei mau i te ti’ara’a fa’aterera’a i roto i te pāroita ’e ’o tē fa’a’ohipa i te mana o te autahu’ara’a i roto i tā rātou fa’aterera’a mai te au i tō rātou pi’ira’a ’e i raro a’e i te fa’ata’ara’a ’e te fa’aterera’a a te ti’a fa’atere autahu’ara’a tei mau i te mau tāviri i roto i te pārota ’e te titi. Mai teie ïa te ha’amanara’a ’e te mana autahu’ara’a e fa’a’ohipahia nei ’e e poupouhia nei i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei.2
Tē fa’a’ohipa-ato’a-hia nei te mana o te autahu’ara’a, ’e tē tupu nei tō te reira mau ha’amaita’ira’a i roto i te mau ’utuāfare feiā mo’a. ’Ia parau vau te ’utuāfare, ’o te hō’ē tāne ïa tei mau i te autahu’ara’a ’e te hō’ē vahine tei fa’aipoipohia ’e tā rāua mau tamari’i. ’O te tahi ato’a mau vaira’a ta’a ’ē i muri mai i te pohera’a o te hō’ē melo ’aore rā te ta’ara’a te tāne ’e te vahine.
Te ture ē e fa’a’ohipa-noa-hia te mana o te autahu’ara’a i raro a’e i te fa’aterera’a a te ta’ata tei mau i te mau tāviri nō terā ti’ara’a, e ture niu ïa i roto i te ’Ēkālesia, e ’ere rā mai te reira nō te ’utuāfare. ’Ei hi’ora’a, nā te metua tāne e peresideni ’e e fa’a’ohipa i te autahu’ara’a i roto i tōna ’utuāfare nā roto i te mana o te autahu’ara’a tāna e mau nei. ’Aita e tītaura’a ’ia fāri’i i te fa’aterera’a ’e te parau fa’ati’a a te ta’ata tei mau i te mau tāviri o te autahu’ara’a nō te rave i te mau ti’ara’ ta’a ’ē i roto i te ’utuāfare. ’O te hōro’ara’a ïa i te parau a’o i tōna ’utuāfare, te fa’atupura’a i te mau rurura’a ’utuāfare, te hōro’ara’a i te mau ha’amaita’ira’a autahu’ara’a i tāna vahine ’e tāna mau tamari’i ’aore rā te mau ha’amaita’ira’a feiā ma’i i te mau melo o te ’utuāfare ’e ’ia vetahi ’ē.3 E ha’api’i te feiā mana o te ’Ēkālesia i te mau melo o te ’utuāfare, ’aita rā rātou e fa’atere i te fa’a’ohipara’a i te mana o te autahu’ara’a i roto i te ’utuāfare.
E tano ato’a te reira parau tumu ’aita ana’e e metua tāne ’e ’o te metua vahine te fa’atere o te autahu’ara’a. E peresideni terā vahine i roto i tōna fare ’e ’o ’oia te mauha’a e fa’atae i te mana ’e te mau ha’amaita’ira’a o te autahu’ara’a i roto i tōna ’utuāfare nā roto i tāna ’ōro’a hiero ’e te tā’atira’a i roto i te hiero. ’Aita ’oia i fa’ati’ahia e hōro’a i te mau ha’amaita’ira’a autahu’ara’a ’o tē hōro’a-noa-hia e te ta’ata tei mau i te hō’ē tōro’a i roto i te autahu’ara’a, e nehenehe rā tāna e rave i te tahi atu mau ti’ara’a i roto i te ’utuāfare. ’A nā reira ai ’oia, tē fa’a’ohipa nei ’oia i te mana autahu’ara’a nō te maita’i o tāna mau tamari’i ’o tāna e peresideni nei nā ni’a i tōna ti’ara’a fa’atere i roto i te ’utuāfare.4
Mai te peu e fa’arahi te mau metua tāne i tō rātou autahu’ara’a i roto i tō rātou iho ’utuāfare, e fa’anu’u atu ā ïa te misiōni a te ’Ēkālesia i mua, mai te tahi noa atu ’ohipa tā rātou e rave. E mea maita’i te mau metua tāne tei mau i te autahu’ara’a a Melehizedeka ’ia fa’a’ohipa i tō rātou mana « nā roto i te tāparura’a, nā roto i te fa’a’oroma’i-noa-ra’a, nā roto i te marū ’e te ha’eha’a, ’e nā roto ho’i i te here mau ra » (Te Parau Ha’api’ira’a ’e te mau Parau Fafau 121:41). E mea faufa’a rahi te reira fāito teitei nō te fa’a’ohipara’a i te mana ato’a o te autahu’ara’a i roto i te ’utuāfare. ’Ia ha’apa’o ato’a te feiā tei mau i te autahu’ara’a, i te mau fa’auera’a, ’ia roa’a ia rātou te mana autahu’ara’a nō te ha’amaita’i i te mau melo o tō rātou ’utuāfare. ’Ia aupuru rātou i te here i roto i te ’utuāfare, ’ia hina’aro ho’i te mau melo o te ’utuāfare e ani ia rātou i te hō’ē ha’amaita’ira’a. ’E ’ia fa’aitoito rahi te mau metua i te mau ha’amaita’ira’a autahu’ara’a i roto i te ’utuāfare.5
I roto i teie mau rururaa ’āmuira’a, ’a ’imi ai tātou i te tahi ri’i ha’apūra’a i mua i tō tātou mau māna’ona’ora’a tāhuti nei ’e teie ma’i pohe rahi, ’ua ha’api’ihia tātou i te mau parau tumu rahi nō te tau mure ’ore. Tē fa’aitoito nei au ia tātou tāta’itahi ’ia « rōtahi roa » tō tātou mata i ni’a i te fāri’ira’a i teie mau parau mau nō te tau mure ’ore, ’ia « fa’a’īhia tō [tātou] tino pā’āto’a i te māramarama. » (3 Nephi 13:22).
I roto i tāna a’ora’a i te nāho’a ta’ata tei ’itehia i roto i te Bibilia ’e te Buka a Moromona, ’ua ha’api’i te Fa’aora ē e ti’a i te mau tino tāhuti nei ’ia fa’a’īhia i te māramarama ’aore rā i te pōiri. Tātou nei rā, ’ua hina’aro ïa ’ia fa’a’īhia i te māramarama, ’e ’ua ha’api’i te Fa’aora nāhea te reira e tupu mai. E fa’aro’o tātou i te mau poro’i nō ni’a i te parau mau o te tau mure ’ore. ’Ua fa’a’ohipa ’oia i te hi’ora’a nō te mata, nā roto i te reira te māramarama e tomo ai i roto i tō tātou tino. Mai te mea e « rōtahi » tō tātou mata—’oia ho’i mai te mea e tūtonu tātou i ni’a i te māramarama ’e te hāro’aro’a—’ua parau ’oia : « E māramarama ïa tō tino ato’a » (Mataio 6:22 ; 3 Nephi 13:22). « ’Ia ma’ihia rā tō [tātou] mata »—’oia ho’i mai te mea e ’imi tātou i te ’ino nō te fa’aō i roto i tō tātou tino—’ua fa’aara ’oia : « E pōuri ïa tō tino ato’a » (’īrava 23). E nehenehe e parau ē, te māramarama ’e te pōuri i roto i tō tātou tino, tei te huru ïa tā tātou hi’ora’a—’aore rā te fāri’ira’a—i te mau parau mau mure ’ore tei ha’api’ihia ia tātou.
E mea maita’i ’ia pe’e tātou i te anira’a a te Fa’aora ’ia ’imi ’e ’ia ani ’ia hāro’aro’a i te mau parau mau o te tau mure ’ore. ’Ua parau fafau ’oia ē, ’ua ineine tō tātou Metua i te Ra’i ’ia ha’api’i i te mau ta’ata ato’a i te mau parau mau tā rātou e ’imi ra (hi’o 3 Nephi 14:8). Mai te mea e hina’aro tātou, ’e ’ua rōtahi tō tātou mata nō te fāri’i i te reira, ’ua parau te Fa’aora ē, e « ’īritihia » te mau parau mau o te tau mure ’ore ia tātou nei (hi’o 3 Nephi 14:7–8).
I te tahi pae, ’ua hina’aro roa Sātane ’ia ta’a ’ore tō tātou ferurira’a ’aore rā ’ia arata’i ’ē ia tātou nō ni’a i te mau ’ohipa faufa’a rahi mai te ’ohipara’a te autahu’ara’a a te Atua. ’Ua fa’aara te Fa’aora nō ni’a i « te mau ’orometua ha’avare, ’o tei haere mai ia ’outou ma te huru o te māmoe ra, ’āre’a ’o roto rā, e luko taehae ïa » (3 Nephi 14:15). ’Ua hōro’a ’oia i teie hi’opo’ara’a nō te tauturu ia tātou ’ia mā’iti i te parau mau i roto i te mau ha’api’ira’a ’e’ē e nehenehe e fa’a’ārepurepu ia tātou : « E ’ite ’outou ia rātou i tō rātou hotura’a » (3 Nephi 14:16). « E ’ore e ti’a i te rā’au maita’i ’ia fa’ahotu mai i te huero ’ino, e ’ore ato’a te rā’au ’ino e fa’ahotu mai i te huero maita’i » (īrava 18) Nō reira e hi’o tātou i te mea e matara mai—« te mau hotu »—i te mau parau tumu e ha’api’ihia ra, nā reira ato’a te mau ta’ata e ha’api’i i te reira. ’O te pāhonora’a maita’i roa a’e i te mau pāto’ira’a tā mātou e fa’aro’o i ni’a i te ’Ēkālesia ’e tā te reira mau ha’api’ira’a tumu ’e te mau ture ’e te fa’aterera’a. ’A pe’e i te hi’opo’ara’a tā te Fa’aora i ha’api’i. E hi’o i te mau hotu—te mau mea e matara mai.
’Ia feruri tātou i te mau hotu o te ’evanelia ’e te ’Ēkālesia a Iesu Mesia tei fa’aho’ihia mai, e ha’apoupou tātou nāhea te ’Ēkālesia, i te roara’a o te orara’a o te mau melo, i parare mai te mau ’āmuira’a feiā mo’a i te mau mou’a i te pae tō’o’a o te rā ’ua hau i te 16 mirioni melo e noho ra i te mau fenua ’ē atu i te Fenua Marite. ’Āpiti i te reira tupura’a, ’ua ’ite mātou i te ’aravihi rahi atu ā o te ’Ēkālesia ’ia tauturu i tōna mau melo. Tē tauturu nei tātou ’ia ha’apa’o i te mau fa’auera’a, ’ia amo i te hōpoi’a e poro i te ’evanelia i fa’aho’ihia mai, ’ia ha’aputuputu ia ’Īserā’ela ’e ’ia patu i te mau hiero i te mau vāhi e rave rahi o te ao nei.
Tē arata’ihia nei tātou e te hō’ē peropheta, ’o te peresideni Russell M. Nelson, e fa’aterera’a tā te Fatu i fa’a’ohipa nō te fa’atupu i te haerera’a i mua tā tātou i putapū i roto i te piti matahiti e hau atu o tāna fa’aterera’a. I teienei e ha’amaita’ihia tātou i te fa’aro’o i te peresideni Nelson, ’o tē ha’api’i ia tātou nāhea i te fa’anu’u atu ā i tō tātou haerera’a i mua i roto i teie ’Ēkālesia a Iesu Mesia tei fa’aho’ihia mai i roto i teie mau tau fifi rahi.
Tē parau pāpū nei au nō te parau mau o teie mau mea ’e tē ’āmui nei au i tā ’outou pure nō tō tātou peropheta ’o tā tātou e fa’aro’o atu, i te i’oa o Iesu Mesia, ’āmene.