COVID-19: E mau parau poro’i nō te arata’i, nō te fa’aorara’a ’e nō te ti’aturi
Tē fa’a’ite nei te mau melo i tō rātou ’itera’a i te rima o te Fatu i roto i teie pu’e tau tāuiui, te pe’ape’a ’e te mo’e.
I pīha’i iho nā ’oia iā’u i terā ra tau ; tei pīha’i iho ’oia iā’u i teienei
’A pārahi ai au i te fare ma te tāmata i te tāmarū i tō’u mana’o pe’ape’a nō ni’a i te ’ohipa e tupu nei i roto i te ao nei, ’ua ’īriti au i tā’u buka ’ā’amu ’e ’ua topa vau i ni’a i teie : « ’Ua rau te mau mata’u e tae mai nei i te mau mahana ato’a i roto i teie nei ao, nā roto rā i te fa’aro’o i roto i te mau ha’api’ira’a o te ’evanelia, e nehenehe tātou e tu’u i te hō’ē ’āvae i mua i te tahi… E upoʼotiʼa mau iho ā te faʼaroʼo i ni’a i te mataʼu ».
’Ua ’ite au ē, ’ua fāri’i au i te hō’ē heheura’a pūai ’e ’ua hōro’a mai te Metua i te ao ra i te reira iā’u nā roto i tā’u iho mau pāpa’ira’a nō te mau matahiti e rave rahi, i roto i tā’u buka ’ā’amu. ’Ua ha’amaita’ihia vau i te hō’ē taime nō te hau ’e nō te ’ite ē, i vai nā te Metua i te ao ra i pīha’i iho iā’u i terā ra tau, ’e tei pīha’i iho ’oia iā’u i teienei.
Danette Gray, Utaha, Marite
E nehenehe te Vārua Maita’i e ’ohipa nā ni’a i te ’ītenati
’Ua fa’auruhia vau e ha’amata i te fa’atere i te hō’ē ha’api’ira’a séminaire nā roto i te paraparaura’a pupu i roto i te video. E piti mahana nā mua a’e ’a tu’uhia ai tō mātou ’oire i roto i te ’ōpanira’a, ’ua fa’atupuhia te ha’api’ira’a mātāmua nā ni’a i te ’ītenati.
’Ua ’āmui ato’a mai te tahi mau metua i tā mātou ha’api’ira’a, e ’ere te tahi pae i te melo. ’Ua tāpe’a vau i tō’u roimata ’a tuatāpapa ’āmui ai mātou i te Mosia 2. ’Ua fāri’i mātou pā’āto’a i te Vārua ’a ha’api’i mai ai mātou ē, te tāvinira’a ia vetahi ’ē, ’o te tāvini-ato’a-ra’a ïa i te Atua. ’Ua ha’api’i rahi mai au nō ni’a i te fāri’ira’a ’e te ’itera’a i tō’u iho heheura’a. E fa’a’ite mai te Vārua Maita’i i te parau mau o te ’evanelia nā roto i te mau ravera’a rau. Ta’a ’ē noa atu te mau mea e tupu nei i roto i te ao nei, ’aore hō’ē mea e nehenehe e tāpe’a i te ’ohipa a te Metua i te ao ra nō te fa’aorara’a o tāna mau tamari’i nā roto i te haerera’a i mua.
Marites Pineda, Mindanao, Philipino
’Aita mātou i ma’iri hō’ē mahana o te séminaire.
Noa atu te mau mea tei tupu nō te coronavirus, tē ’oa’oa nei au ’ia parau ē, ’aita mātou i ma’iri hō’ē mahana o te séminaire ! E mea fifi ri’i ’ia ha’api’i i tā’u piha ha’api’ira’a nā roto i te video, terā rā, e mea au roa nā’u ’ia māta’ita’i i te mau metua ’e te mau tamari’i ’āpī a’e ’ia fa’aro’o i tā mātou mau ’āparaura’a. E mea au roa nā’u i te mea ē, nā te reira i fa’atupu i te ha’apāpūra’a ’e te ’ohipa-tāmau-ra’a nō tō mātou mau ’utuāfare, ’e e mea au roa atu nā’u i te mea ē, ’ua ti’a ia mātou ’ia tāmau noa i te fa’a’ite pāpū i te tahi ’e te tahi nō Iesu Mesia ’e nō tōna here ia tātou.
Mandi Crandell, Yigo, Guam
Te tāvinira’a i te ta’ata i nā pae e piti o te pāruru
Tē tāvini ra vau ’ei tuahine misiōnare pa’ari i roto i te misiōni nō Missouri Inidipenideni, ’a fa’a’orehia ai te mau putuputura’a a te ’Ēkālesia, ’e ’ua ha’amata mātou i te fa’aea noa i roto i tō mātou mau piha. ’Ua fa’a’ohipa mātou i tā mātou mau niuniu ’e te mau roro uira nō te vai piri noa i te mau melo ’e nō te fārerei i te feiā tā mātou i ’ohipa i pīha’i iho ia rātou, ’aita e tae tāmau mai nei i te purera’a.
Nō te tāmau noa i te ’ohipa, ’ua fa’aoti au e rave i te tahi mau ’ohipa ’ā’amu ’utuāfare, tae roa atu i terā mau tuatāpapara’a fifi roa nō te ’ite mai i te mau i’oa ’āpī. I tō’u tomora’a i ni’a ia FamilySearch, ’ua ’ite a’era vau i te hō’ē fa’aarara’a nō te hō’ē parau e tīa’i ra ’ia tā’amuhia. Nā roto i taua parau hō’ē ra, ’ua ’itehia iā’u fātata e 70 ta’ata i roto i tō’u rēni. E pae mahana i muri iho, ’ua mau te i’oa i te ’itehia mai. I te tahi atu taime i taua mahana ra, ’ua ha’amāuruuruhia mātou pā’āto’a nō te ho’i i te fare. ’Ua ’oto vau ’ia reva, ’ua ’ite ato’a rā vau ē, ’ua ha’amaita’ihia vau i te mea ē, ’ua ti’a iā’u ’ia tāvini i te ’utuāfare i terā pae mai i te pāruru i roto i teie taime fifi.
Kim Nielson, Oregon, Marite
Te ravera’a i tā tātou tuha’a ’ia tāmau noa te ’ohipa a te Fatu i te haere i mua
Mai tei tītauhia i te mau misiōnare i roto i tō mātou fenua ’ia fa’aea noa i roto i tō rātou mau fare, nō reira, ’ua tāmata mātou i te rave i tā mātou tuha’a, i te anira’a i te hō’ē hoa ’ia ha’api’i hau mai nō ni’a i te ’Ēkālesia. ’Ua ha’api’i te mau misiōnare i tā rātou mau ha’api’ira’a i tō mātou hoa nā roto i te niuniu. ’Ua ’ite mātou i te pūai o te Vārua i roto i tō mātou ’utuāfare, māuruuru i te mau rāve’a āpī ’aravihi nō teie tau. E mea māere mau ’ia ’ite i te ’ohipa a te Fatu ’ia tāmau noa i te haere i mua noa atu te mau fifi i roto i te ao nei.
Elaina Reich, Washington, Marite
Tē fa’aro’o mai nei te Fa’aora i tā tātou hīmenera’a
Tē tāvini nei au ’ei misiōnare tōtauturu i roto i te fa’anahora’a PathwayConnect i roto i te titi nō Kyiv Ukraine. ’Ua fa’aoti te feiā fa’atere nō teie fa’anahora’a ’ia ha’api’i ia mātou pā’āto’a e fa’atere nei i te mau ha’aputuputura’a, ’ia nehenehe ia mātou ’ia rave i te reira nā te ātea noa. I te mahana noa i muri mai, ’ua fa’aara a’era te fa’aterera’a hau ’ia fa’aea te ta’ata i tō rātou fare i Kyiv.
E mea au roa nā’u ’ia ha’aputuputu i te ta’ata nō te PathwayConnect. ’E e mea au nā’u ’ia ha’aputuputu i te ta’ata nō te ha’amori ’e nō te hīmene ’āmui i te fare i te mau sābati. Tē māuruuru nei au ’ia ’ite ē, ’ia putuputu e piti ’aore rā, e toru i te hō’ē vāhi i roto i tōna i’oa, tei reira ’oia. ’Aita hō’ē ta’ata i ’ite ē, e aha te maorora’a tō tātou fa’ahepora’a ’ia fa’aea i roto i tō tātou fare, ’ua ’ite rā tātou ē, e fa’aro’o mai te Fa’aora i tā tātou hīmenera’a.
Kateryna Serdyuk, Kiev, Ukraine
« ’Ua tae i te taime nō te fa’aho’i mai i tō ’oe ’utuāfare »
I te matara-fa’ahou-ra’a mai te mau parau ’āpī nō ni’a i COVID-19, mai te huru ra ē, ’ua pūai roa atu te reira. Nō reira, ’a tere noa ai te tau, ’ua ha’amata a’era vau i te huru ’ē ’e i te ri’ari’a ato’a nō te ananahi o tō tātou nei ao.
I te hō’ē po’ipo’i ’aita tā’u e nehenehe fa’ahou e ta’oto ’e ’ua pārahi au nō te feruri i teie mau mea. E ’ua tupu mai ra te hau. ’Ua ha’api’i te Vārua iā’u ē, ’ua hōro’a mai te Fatu i te hō’ē ō iā’u. ’Ua parau mai ’oia « ’ua tae i te taime nō te fa’aho’i mai i tō ’oe ’utuāfare ».
E mea ’ohipa rahi roa te orara’a nei. ’Ua hōro’a mai teie ma’i pe’e i tō mātou ’utuāfare i te rāve’a nō te tūtonu i ni’a i te mea faufa’a : te ’evanelia a Iesu Mesia. E nehenehe tā’u e huna i te tahi o terā mau mea taero i roto i te ao nei, ’e e fa’atumu i ni’a i te ha’api’ira’a i tā’u mau tamari’i ’ia hi’o i ni’a i te Mesia. E ha’apa’o maita’i tō tātou Metua i te ao ra ia tātou. ’Ua rahi atu tō’u ’ite i te reira i teienei, i tei nā mua a’e nei.
Maria Ostler, Nebraska, Marite
’Ua fa’aineine te Fatu ia tātou nō te reira.
I te fa’a’itera’ahia mai iā’u ē, ’ua tāpe’ahia te mau putuputura’a a te ’Ēkālesia nō te hō’ē taime, ’ua ’oto ri’i au. I teienei rā, e nehenehe au e ’ite ē, e mea nāhea tō te Fatu fa’aineinera’a ia tātou nō te reira nā roto mai i tāna mau peropheta. E nehenehe te tuatāpapara’a i te ’evanelia i te fare e tauturu ia tātou i roto i te mau taime tāmatara’a. Tē māuruuru nei au i te mea ē, e nehenehe noa ā tā tātou e ’amu i te ’ōro’a mo’a i te mau sābati ’e ’ia fāri’i i te mau parau a te mau peropheta. E mea māhanahana ’ia ’ite ē, e nehenehe tātou e fāri’i i taua vārua ra, e tae roa atu i te taime e putuputu ’āmui fa’ahou ai tātou.
Emma van As, Gauteng, ’Āfirita Apato’a
’Ua ha’api’ihia tātou nāhea ’ia ha’amori
’A fa’atupu ai māua tā’u tāne i te ’ōro’a nō te ’ōro’a mo’a i roto i tō māua fare nō te taime mātāmua, ’ua fāri’i au i te Vārua pūai ’e ’ua fifi ri’i au nō te hīmene i te hīmene tā māua i mā’iti. I roto i te rahira’a hau atu i te 70 matahiti tō’u pārahira’a i roto i te purera’a, ’aita vau e ha’amana’o ra i te māuruuru rahi nō te mau ha’amaita’ira’a tā māua i fāri’i nā roto i tō māua ti’ara’a melo ’e te ’āmuira’a i roto i te ’Ēkālesia a Iesu Mesia i te Feiā Mo’a i te mau Mahana Hope’a nei.
’Ua ha’api’ihia māua nāhea ’ia ha’amori, ’e o vai tē ha’amori. ’Oia mau, tē mihi nei māua i te ’āmuira’a ’e tō māua mau hoa feiā mo’a, ’e e ’oa’oa roa māua ’ia ho’i fa’ahou mai i « te huru mātāmua ra » terā rā, tē ’oa’oa nei au nō te mau ha’api’ira’a tā māua i ha’api’i mai ’a pe’e ai tātou i te a’ora’a a te peropheta i roto i te ha’amorira’a fa’atumuhia i te fare, pāturuhia e te ’Ēkālesia.
Susan Preator, Montana, Marite
Te ’itera’a i te hau ’e te hō’ēra’a
’Ua riro te fa’atupura’a i te pō ’utuāfare ’ei hō’ē mea tīa’ihia e māua tā’u tamaiti i te mau hepetoma ato’a. E mea pinepine māua ’ia fāri’i i te mau melo, te mau hoa, ’e te mau misiōnare i tō māua fare. ’E ’ua taui te terera’a ’ohipa ma te pa’ari, nō teie ma’i pe’e. I teienei, e fa’atupu māua i tō māua pō ’utuāfare ’e tō māua mau hoa nā roto i te niuniu. Maoti teie taime ’āmui-hō’ē-ra’a, ’ua ti’a ia mātou ’ia rave e rave rahi mau ’ohipa tei ha’afātata ia mātou.
E māuruuru rahi tō’u i tō tātou peropheta, tei ani manihini mai ia tātou pā’āto’a ’ia ha’apae i te mā’a. E rave rahi o tātou tei fāri’i i te pūai o te hō’ēra’a ’e o te hau nā roto i taua ’ohipa ra. I roto i te mau taime mai teie te huru, e tae mai te hau tā tātou e tītau ra, nā roto mai i te Fa’aora o Iesu Mesia.
Roshene McKenzie, Kingston, Jamaique
Tē tāmau noa nei te Atua i te fa’atere
’Ua ha’amata vau i tā’u misiōni ’a piti noa ’āva’e ’e te ’āfa i ma’iri a’e nei. ’Ua tonohia vau e tāvini i Hermosillo, Mehico. I te mau mahana ato’a, ’ua ti’a iā’u ’ia fārerei i te mau ta’ata fa’ahiahia tei ineine nō te fāri’i i te ’evanelia i fa’aho’ihia mai. ’Ua fāri’i au ē tē ha’amata nei au i te fa’atupu i tā’u ’ōpuara’a, tupu mai nei te COVID-19 tei tāpe’a i tā’u misiōni.
E mea māuiui ’ia fa’aru’e i te mau ta’ata tā’u i here roa, terā rā, ’ua fāri’i ato’a vau i te hau rahi ’e te pārurura’a, nō te mea ’ua ’ite au ē, tē tāmau noa nei te Atua i te fa’atere. Tē māuruuru nei au i te mea ē, e peropheta ’e e ’āpōsetolo tā tātou nō te arata’i ia tātou i roto i teie taime. Mai te mau misiōnare e rave rahi i te ao nei, tē ti’aturi nei au ē, e ’ere teie te hope’ara’a o tā’u misiōni. E’ita e maoro e nehenehe fa’ahou tā’u e tauturu ’ia fa’ahaere i te ’ohipa a te Fatu i mua, ’e ’ia tāmau noa i te riro ’ei mauha’a i roto i tōna rima nō te hōpoi rahi mai i te mau vārua i te tātarahapa.
Carolina Roma, Puerto Rico