Steven J. Lund

Peresideni rahi o te Feiā ’Āpī Tamāroa

’Ei peresideni rahi ’āpī nō te Feiā ’Āpī Tamāroa, ’ua fāri’i o Steven J. Lund i te hō’ē ’ohipa mo’a nō te tauturu i te arata’ira’a e rave rahi hānere tauatini feiā ’āpī nō te autahu’ara’a a Aarona i roto i te ’Ēkālesia nā te ao ato’a nei.

’Āhiri e nehenehe e fārerei hō’ē hō’ē ia rātou tāta’itahi, ’ua ’ite pāpū ’oia e aha tāna e parau : « E ’ere i te mea fifi ’ia riro ’ei melo manuia nō te bāsileia o te Atua. Tē here nei te Metua i te Ao ra ia ’outou. Tītau-noa-hia ia ’outou ’ia here atu iāna. ’E mai te mea e nā reira tātou, e vai pāruruhia tātou ’e te ’oa’oa… E riro tō tātou orara’a ’ei aura’a nō te hō’ē mea ».

Te rave pāpūra’a i te ’Ēkālesia, e ’ere ïa i te sābati noa. E taime rā te reira nō te mau mahana ato’a, ’ia au i te parau a te pāruru tei riro mai ’ei fatu ’ohipa.

« Te tai’ora’a i te mau pāpa’ira’a mo’a, te haerera’a i te purera’a, te tātarahapara’a i te taime iho tei rāpae tātou i te ’ē’a, te hāmamara’a i tō tātou vaha, ’e te rirora’a ’ei hi’ora’a maita’i nō te ’evanelia—terā te fa’anahora’a a tō tātou Metua i te ao ra » tāna ïa parau.

’Ua fānauhia te taea’e Lund i te 30 nō ’Ātopa 1953, nā Jay ’e o Toy Ellen Lund ’e ’ua pa’ari i Northern California (Santa Rosa) ’e i Southern California (Long Beach), Marite. I roto i te nu’u fa’ehau, ’ua fa’arevahia ’oia i Europa, hō’ē teie fenua tāna i here i roto i tāna tāvinira’a i roto i te misiōni nō Netherlands Amsterdam.

I muri a’e i tōna fa’aōra’a, ’ua haere ’oia i te fare ha’api’ira’a tuatoru nō Brigham Young University, i reira tōna fārerei-fa’ahou-ra’a ia Kalleen Kirk, e tamāhine tāna i mātau a noho ai ’oia i Purutia. I te pae hope’a ’ua fa’aipoipo o Steven ’e o Kalleen i roto i te hiero nō Roto Miti i te 8 nō ’Ātete 1980. E metua rāua nō e maha tamari’i.

I muri a’e i te noa’ara’a tāna parau tū’ite nō te ture i BYU, ’ua rave te taea’e Lund i te ’ohipa auaha ture hou ’a riro mai ai ’ei peresideni ’e ’ei CEO nō te taiete Nu Skin. I teie taime, o ’oia te peresideni fa’atere nō te tōmite fa’atere o te taiete. E melo ato’a ’oia nō te fa’anahora’a ha’api’ira’a teitei nō Utaha.

’Ua tāvini te taea’e Lund ’ei peresideni nō te misiōni nō Georgia Atlanta, ’e ’ei fa’atere nō te tōmite ha’amo’ara’a hiero nō te ’oire nō Provo. ’Ua tāvini ato’a ’oia ’ei melo nō te ’āpo’ora’a rahi a te feiā ’āpī tamāroa, ’e ’ei Hitu ’Ahuru ārea.