Ahmad S. Corbitt

Tauturu hō’ē i roto i te peresidenira’a rahi o te Feiā ’Āpī Tamāroa

’Ua fānauhia o Ahmad S. Corbitt, 57, i te ’āva’e ’Ātete 1962 nā James Earl Corbitt ’e o Amelia Corbitt. E ’utuāfare veve ’e ’ua ora rātou i roto i te mau fare tauturu nō Philadelphia, Pennsylvanie, USA, hā’atihia e te ’ohipa taparahira’a ta’ata ’e te pupu ta’ata ’ohipa ’ī’ino. E mea ataata roa ’ia haere mai te tahi aroa i te tahi aroa.

Nā te mau ’itera’a pae vārua o tōna metua vahine i arata’i i tāna nau tamari’i hō’ē ’ahuru ’e ’ua pāruru māite ia rātou. ’Ua ’ite ’oia e aha te taime e nehenehe ai tāna mau tamari’i e haere e ha’uti i rāpae, ’e e aha te taime e ti’a ia rātou ’ia fa’aea noa i roto i te fare.

Nā terā huru ’itera’a pae vārua i arata’i iāna i muri a’e, ’ia ani i te mau misiōnare nō te ’Ēkālesia a Iesu Mesia i te Feiā Mo’a i te mau Mahana Hope’a nei ’ia haere mai i tōna fare. I roto i te pae rahi o tōna tamari’iri’ira’a ’e te ’āpīra’a, ’ua ha’amori Ahmad ’e tōna ’utuāfare i roto i te fa’aro’o Mahometa, ’e i muri a’e, ’ua bāpetizohia ’oia ’ei porotetani. I teie nei rā, ’ua fāri’i ’oia ē, ’ua herehia ’oia e te ’āmuira’a nō te Feiā Mo’a i te mau Mahana Hope’a nei.

I te ’āva’e i muri iho, ’ua bāpetizohia tōna metua vahine ’e te tahi mau taea’e/tuahine tōna. I te 16 nō ’Ātete 1980, i te 18ra’a o tōna mahana fānaura’a, ’ua bāpetizo-ato’a-hia o Ahmad. ’Ua tomo ato’a mai tōna metua tāne ’āpī, o Henry Brandford Campbell, i roto i te ’Ēkālesia i te matahiti i muri iho.

’Ua parau ’oia ē, « e ’ere nō mātou ». « Nō te Atua rā ’e nō te ’ohipa tāna e hina’aro ’ia rave mātou. E hina’aro mau tō mātou ’ia fa’aha’eha’a ’e ’ia ’īriti i te ’ā’au. ’Ua arata’i ’oia ia mātou ».

I muri a’e i te ha’api’ira’a i Ricks College, ’e i te tāvinira’a i roto i te misiōni nō San Juan i Puerto Rico, mai te matahiti 1982 e tae atu i te matahiti 1984, ’ua fārerei ’oia ia Jayne Joslin i roto i te hō’ē tere hiero nō te feiā ’āpī pa’ari ’ōtahi. ’Ua fa’aipoipohia rāua i te 24 nō ’Ātete 1985, i roto i te hiero nō Washington D.C. ’e e ono tā rāua tamari’i.

I roto i nā matahiti e iva i muri iho, e rave ’oia i te ’ohipa i te ao, ’e i te pō, e haere ’oia i te ha’api’ira’a, ’e ’ua roa’a tāna parau tū’ite nō te fare ha’api’ira’a tuarua nō Richard Stockton nō New Jersey ’e nō te fare ha’api’ira’a tuatoru nō Rutgers i te pae nō te ture.

’Ua tāvini ’oia ’ei tauturu i roto i te hō’ē peresidenira’a titi, ’ei peresideni titi, ’ei melo nō te ’āpo’ora’a teitei, ’e ’ei peresideni nō te misiōni nō Santo Domingo East, nō te Dominican Republic.

’Ua rave te taea’e Corbitt i te ’ohipa ’ei pāruru auaha ture, i roto i te mau autā’atira’a huira’atira, ’e ’ei ra’atira nō te piha tōro’a a te ’Ēkālesia i New York nō te mau ’ohipa huira’atira ’e nō te mau fenua ato’a. Tē rave nei ’oia i te ’ohipa i teienei i roto i te tuha’a fa’aterera’a misiōnare a te ’Ēkālesia.