Elder William K. Jackson

Hitu ’Ahuru Huimana fa’atere rahi

I muri a’e e 23 matahiti i te tāvinira’a ’ei ti’a fa’atere utuutu ma’i i roto i te ’ohipa tāvinira’a a te hau Marite i te mau fenua ’e’ē, ’ua anihia ia William K. Jackson ’ia fa’a’ite mai i nā ’itera’a maita’i roa a’e e 20, ’a ora ai ’e ’a rave ai ’oia i te ’ohipa i roto i te mau fenua ātea roa o te ao nei.

’A feruri ai ’oia i taua anira’a ra hou te ’ōro’a fa’ahanahanara’a i tōna fa’atuha’ara’a, ’ua ’ite a’era ’oia ē, « terā e 20 ’itera’a maita’i roa a’e tō’u, nō ni’a ïa i te ’Ēkālesia ’aore rā, te ’utuāfare » tē nā reira ra ’oia.

’Ua fānauhia o William King Jackson i te 29 nō Māti 1956, i Washington, D.C., Marite, nā E. William ’e o Lois Andrey Jackson. ’Ua pa’ari ’oia i Ojai, California, Marite, terā rā, nō te ’ohipa a tōna nā metua, ’ua haere ato’a ’oia i te ha’api’ira’a i Honduras, Algérie, ’e i Afghanistan.

I muri a’e i tōna tāvinira’a i te hō’ē misiōni i roto i te misiōni nō La Paz i Pōrīvia, ’ua fārerei o Elder Jackson ia Ann Kesler i te pu’e tau māhanahana nō te matahiti 1977.

« I reirara’a tō’u fa’atupura’a i te hina’aro iāna », tāna ïa parau. « ’Ua hope te reira pu’e tau māhanahana tō’u tāmatara’a i te ha’apāpū ’iāna ē, o vau ana’e iho ».

’Ua fa’aipoipo rāua i te 29 nō Tītema 1977, i roto i te hiero nō Los Angeles i Karifonia. E va’u tā rāua tamari’i, e toru o te reira, e mau tamari’i fa’a’amu—nō Inidia, Nepal, ’e Cambodia.

’Ua haere o Elder Jackson i te fare ha’api’ira’a tuatoru nō Brigham Young University, ’ua roa’a iāna te parau tū’ite nō te ihi i te fare ha’api’ira’a tuatoru nō California, Berkeley, ’e ’ua roa’a tāna parau tu’ite doctorat nō te ’ohipa taote i te fare ha’api’ira’a tuatoru nō California, San Francisco, i te matahiti 1983.

I muri a’e i tāna ha’api’ipi’ira’a taote, ’ua rave rāua i te ’ohipa nā te ara e 26 matahiti te maoro. E ’ere i te mea maoro a’e nei, ’ua rave ’oia i te ’ohipa ’ei ra’atira nō te Valley Family Health Care, i Idaho ’e i Oregon, Marite.

’A ora ai rāua i rāpae i te fenua Marite, ’ua hōro’a rāua o te tuahine Jackson i te taime rahi i rotopū i te u’i mātāmua o te mau melo o te ’Ēkālesia.

« Hō’ē o te mau tuha’a rahi a’e o tō’u ’itera’a pāpū nō te ’evanelia, o te māta’ita’ira’a ïa i te ’ohipa tā te ’evanelia e fa’atupu nei i ni’a i teie mau ta’ata tā māua e here nei », tē nā reira ra ’oia. « ’Ua taui te reira ia rātou ».

’Ua tāvini o Elder Jackson ’ei Hitu ’Ahuru ārea, ’ei peresideni nō te misiōni ’āpī nō New Delhi Inidia, ’ei peresideni nō te feiā ’āpī nō te ’āma’a, ’ei ’orometua institut, ’ei ’orometua ha’api’i nō te feiā pa’ari. I te taime ’a pi’ihia ai ’oia ’ei Hitu ’Ahuru Huimana fa’atere rahi, tē tāvini ra ’oia ’ei ’episekōpo.