Elder Ciro Schmeil

Hitu ’Ahuru Huimana fa’atere rahi

’Ua tūtava tāmau noa o Elder Ciro Schmeil ’ia fa’aro’o i te Fatu, noa atu ē ’aita ’oia i māramarama i te tumu nō te hō’ē fa’auera’a ta’a ’ē. ’Ua ha’api’i mai ’oia ē, « mai te mea e fa’aro’o tātou, ’a ha’apa’o ai tātou i te mau fa’auera’a, e ha’amaita’i tāmau noa te Fatu ia tātou ».

’A rave ai ’oia i tōna mau pi’ira’a, ’ua ’ite ’oia i te mau ha’amaita’ira’a tei tae mai nā roto i te ha’apa’o. ’A tāvini ai ’oia ’ei ’episekōpo ’e ’ei peresideni titi, ’ua fāri’i ’oia e rave rahi mau taime faufa’a rahi ’ia « ’ite i te ta’ata ’ia taui i tō rātou orara’a maoti tō rātou ’itera’a pāpū nō te Fa’aora ’e nō te Buka a Moromona ».

’Ua fānauhia o Elder Schmeil i te 16 nō ’Ēperēra 1971, i Ponta Grossa, Paraná, Peretīria, nā Bruno ’e o Erica Schmeil, e nā ta’ata fa’afāriuhia i roto i te ’Ēkālesia. ’Ua pa’ari ’oia i Curitiba, Peretīria, ’e i te taime ’a pi’ihia ai tōna nā metua nō te fa’atere i te misiōni nō Brazil Campinas, ’ua reva ’oia nō te tāvini i roto i te misiōni nō Ogden Utaha.

’A haere ai ’oia i te fare ha’api’ira’a tuatoru nō Utaha, ’ua fārerei o Elder Schmeil ia Alessandra Machado Louza, e pīahi i te fare ha’api’ira’a tuatoru nō Brigham Young University, i roto i te hō’ē purera’a. « A fārerei ai māua nō te taime mātāmua i roto i te purera’a, ’aita ’oia i tau’a noa mai a’e iā’u » tē nā reira ra ’oia. Nōna rā, e au ïa mai te hō’ē ho’a uira.

’Ua fa’aipoipohia rāua i roto i te hiero nō São Paulo Peretīria i te ’āva’e Tiurai 1994 ’e ’ua fa’aoti i tā rāua ha’api’ira’a i te fenua Marite. ’Ua ho’i rāua i Peretīria e 20 matahiti hou ’a reva ai i Colorado, Marite, ’e i muri iho i Florida, Marite. E piti tamari’i tā Elder ’e te tuahine Schmeil

’Ua roa’a tā Elder Schmeil parau tū’ite licence nō te ’ohipa ’aravihi nō te ha’api’ira’a hāmanira’a fare i te fare ha’api’ira’a tuatoru nō Utaha i te matahiti 1995, ’e te parau tū’ite maitrise nō te fa’aterera’a i te ’ohipa, i te fare ha’api’ira’a tuatoru nō Ohio i te matahiti 2010. ’Ua rave ’oia i te ’ohipa nā Walmart Brasil ’ei peresideni mono ’e ’ei ra’atira nō te ’ohipa fenua, ’ei fa’atere ’ohipa nō Scopel, ’ei fa’atere rahi nō Cia City, ’e ’aita i maoro a’e nei, ’ei upo’o fa’atere nō te ’ohipa fenua nō JBS S.A.

’Ua tāvini o Elder Schmeil ’ei Hitu ’Ahuru ārea, ’ei peresideni titi, ’ei tauturu i roto i te hō’ē peresidenira’a titi, ’ei ’episekōpo, ’ei peresideni nō te pupu peresibutero, ’e ’ei peresideni ’āma’a.