Elder Adeyinka A. Ojediran

Hitu ’Ahuru Huimana fa’atere rahi

’Ua riro te ’āmuira’a rahi nō ’Ēperēra 2020 ’ei « hope’a hepetoma e ’ore roa e mo’ehia » nō Elder Adeyinka A. Ojediran.

’Ua pāturuhia te ta’ata fa’afāriu o te ’Ēkālesia ’ei Hitu ’Ahuru huimana fa’atere rahi—e ’ohipa mātāmua teie nō te hō’ē feiā mo’a i te mau mahana hope’a nei nō Nigeria ’e nō Afirita Apato’a. ’Ua rahi roa atu tōna māuruuru ’e te ’oa’oa i te taime ’a fa’aara ai te peresideni Russell M. Nelson ē, e patuhia te toru o te hiero nō Nigeria i te ’oire nō Benin.

« ’Aita roa atu vau i mana’o i te reira », te parau ïa a Elder Ojediran ’e te mata ’ata ato’a. « E mea nehenehe mau te fa’aro’ora’a i te peropheta i te paraura’a ē, e patuhia te tahi atu hiero i Negeria. Nō’u nei, o te hō’ē terā ha’apāpūra’a ē, tē haere vitiviti nei te ’ohipa a te Fatu i mua. E ’ohipa rahi tā tātou pā’āto’a nō te fa’aineine i te mau tamari’i a te Atua nō te tae-piti-ra’a mai o tāna tamaiti ».

Fanauhia i Ibadan, Nigeria, i te 5 nō ’Ēperēra 1967, nā Amos Adeniyi ’e o Caroline Anike Ojediran, ’ua fāri’i o Adeyinka Ayodeji Ojediran i te parau tū’ite licence nō te ha’api’ira’a nātura i te fare ha’api’ira’a tuatoru nō Ilorin i te matahiti 1991 hou ’a fāri’i ai i muri a’e i te maitrise nō te fa’aterera’a putura’a faufa’a i te fare ha’api’ira’a tuatoru nō Ladoke Akintola. ’Ua rave tāmau ’oia i te tōro’a fa’atere ’ohipa mātutu moni ’e te putu faufa’a i roto i te ti’ara’a ta’ata mātutu moni. Tē rave ra ’oia i te ’ohipa ’ei ta’ata fa’atere nō te moni nō te Taiete Shell nō Nigeria, hou ’a pi’ihia ai ’oia ’ei Huimana fa’atere rahi.

E toru matahiti i muri a’e i tōna bāpetizora’a ’ua fārerei ’oia ia Olufunmilayo Omolola Akinbebije i te hō’ē ’ohipa tōtiare. I muri a’e, ’ua ha’amata rāua i te arapae, terā rā, nō te ta’a ’ē o tā rāua vāhi ’ohipara’a, « ’ua fārerei noa rāua nā roto i te niuniu ».

I te pae hope’a, ’ua fa’aipoipo rāua i Nigeria i te matahiti 1998 ’e ’ua tā’atihia i roto i te hiero nō Johannesburg Afirita Apato’a i te 14 nō Novema 2002. E hōʼē tamahine tā Ojediran mā.

E māuruuru rahi tō Elder Ojediran nō te mau pi’ira’a ato’a o te ’Ēkālesia tāna i fāri’i mai te taime ’a tomo mai ai ’oia i roto i te ’Ēkālesia i te matahiti 1990 i te 23ra’a o tōna matahiti. ’Ua tauturu te ’ohipa fa’aro’o tāta’itahi iāna ’ia tupu i te rahi, ’e ’ua hōro’a mai iāna i te mau rāve’a mo’a nō te tauturu ia vetahi ’ē ’ia hotu i roto i tō rātou mau pi’ira’a ’e te mau ’ohipa.

Tē tāvini ra o Elder Ojediran ’ei Hitu ’Ahuru ārea i te taime ’a pi’ihia ai ’oia, ’ua tāvini ato’a ’oia ’ei tauturu i roto i te hō’ē peresidenira’a misiōni, ’ei peresideni titi, ’ei tauturu i roto i te hō’ē peresidenira’a titi, ’ei ’episekōpo, ’ei tauturu i roto i te hō’ē ’episekōpora’a ’e ’ei peresideni ’āma’a.