Elder Thierry K. Mutombo

Hitu ’Ahuru Huimana fa’atere rahi

E ’itera’a pāpū pūai tō Elder Thierry K. Mutombo nō ni’a i te ’evanelia ’a fāri’i ai ’oia i tōna pi’ira’a misiōnare i tōna ’āpīra’a. ’Ua bāpetizohia ’oia ’e tōna ’utuāfare i te 10ra’a o tōna matahiti, ’e ’ua ’ite ’oia i te ravera’a pūai a te ’evanelia nō te taui i tōna ’utuāfare.

Terā rā, noa atu ē, tē fa’aineine ra ’oia ’ia tāvini i te hō’ē misiōni i roto i te misiōni nō Abidjan i Côte d’Ivoire, ’aita tōna e ’itera’a pāpū pūai nō te Buka a Moromona. ’Aitā ’oia i tai’o a’e nei i te reira.

’Ua tītau te ’episekōpo fa’auru o Thierry ’ia tai’o ’oia i te Buka a Moromona i te mau mahana ato’a hou ’a reva ai ’oia i te misiōni. ’Ua hōro’a ato’a ’oia ia Thierry i te hō’ē tāviri nō te fare purera’a a te ’Ēkālesia ’ia nehenehe iāna ’ia tuatāpapa ma te hau.

’Ua tai’o o Thierry i te mau mahana ato’a, e toru ’āva’e. I te taime ’a tomo ai ’oia i roto i te misiōni, e ’ere te ’itera’a pāpū ana’e nō te Buka a Moromona tei roa’a iāna, ’ua fa’ananea ato’a rā ’oia i te mau peu tuatāpapara’a tei tauturu iāna ’ei misiōnare.

« Tā tātou mauha’a rahi a’e nō te arata’i mai i te ta’ata i te māramarama o te ’evanelia ’e nō te ha’aputuputu ia Iseraela i ha’apurarahia, o te Buka a Moromona ïa » tē nā reira ra ’oia.

’Ua fānauhia o Thierry Kasuangi Mutombo i Kinshasa, Repupirita manahune nō Congo, i te 31 nō Tēnuare 1976, nā Antoine Kasuangi Mutombo ’e o Marie Therese Matsanga Mutombo. ’Ua fa’aipoipo ’oia ia Tshayi Nathalie Sinda i roto i te fa’aipoipora’a tīvira i te 29 nō Novema 2002. ’Ua tā’atihia rāua i muri a’e i roto i te hiero nō Johannesburg Afirita Apato’a i te 19 nō Novema 2004. E ono tamari’i tā rāua.

’Ua roa’a te parau tū’ite a Elder Mutombo i te matahiti 2010 i te fare ha’api’ira’a tuatoru nō Cepromad i roto i te ’ohipa mātutura’a faufa’a, ’e i te matahiti 2012, ’ua roa’a tāna licence nō te fa’aterera’a i te rave ’ohipa. ’Ua rave ’oia i te ’ohipa nā te ’Ēkālesia i roto i te Repupirita mahahune nō Congo, ’ei ta’ata fa’atere i roto i te ’ā’amu ’utuāfare ’e te tuha’a fa’aterera’a nō te rave ’ohipa, ’e ’ei fa’atere nō te tuha’a fa’aterera’a i te mau mātēria.

I te taime o tōna pi’ira’a ’ei Hitu ’Ahuru Huimana fa’atere rahi, tē tāvini ra o Elder Mutombo ’ei peresideni nō te misiōni nō Baltimore Maryland. Nā mua atu, ’ua tāvini ’oia ’ei peresideni titi, ’ei tauturu i roto i te hō’ē peresidenira’a titi, ’ei fa’atere misiōni pāroita, ’ei ’orometua nō te ha’api’ira’a sābati, ’e ’ei pāpa’i parau fa’atere nō te titi.