Te mau taime fa’ahiahia i roto i te ’āmuira’a
Mai tā te peresideni Russell M. Nelson i fafau mai, e ’āmuira’a teie e ’ore roa e mo’ehia nō te mau tumu e rave rahi.1 Teie te tahi mau taime fa’ahiahia o te ’āmuira’a.
Taipe ’āpī
’Ua fa’aara te peresideni Nelson i te hō’ē taipe ’āpī nō te ’Ēkālesia (hi’o te ’api 73). I roto i te taipe, tē vai ra te i’oa o te ’Ēkālesia i roto i te hō’ē ’āfata, fa’ahōho’ara’a nō te hō’ē ’ōfa’i tihi. I ni’a a’e i taua tahua rā hō’ē ti’i nō te Mesia i raro a’e i te hō’ē fana, fa’aha’amana’ora’a ia tātou i te Fa’aora ’e tōna mēnema ta’ata ’ore.
Poro’i nō te piti hānere matahiti
’Ua tai’o te peresideni Nelson « Te fa’aho’i-fa’ahou-ra’a-hia mai te ’īra’a o te ’evanelia a Iesu Mesia : E poro’i i tō te ao nei nō te piti hānerera’a o te matahiti », ’o tē ani nei i te ta’ata i te mau vāhi ato’a ’ia ’ite ē, tei ni’a i te fenua nei i teie mahana te ’evanelia a Iesu Mesia tei parauhia i roto i te Faufa’a ’Āpī. E ’itehia te ’īritira’a mana i te pae roto o te tāpo’i mua o teie nene’ira’a nā roto e 12 reo. Te mau melo e tīa’i noa nei i te hō’ē ’īritira’a mana, e nehenehe rātou e ’ite i te mau ’īritira’a mātāmua o te parau poro i roto i te a’ora’a a te peresideni Nelson (hi’o ’api 91).
’Āmuira’a hanahana
’Ua fa’atupuhia « te hō’ē ’āmuira’a hanahana » i te po’ipo’i sābati ’ei tuha’a nō te fa’ahanahanara’a a te ’Ēkālesia i te piti hānere matahiti nō te ’ōrama mātāmua. I roto i te reira putuputura’a mo’a, ’ua arata’i te peresideni Nelson i te feiā mo’a i roto i te Tuōra’a Hosana, e fa’a’itera’a ’āmui nō te ’āruera’a, ’o tē fa’a’ohipahia i roto i te mau ’ohipa ta’a ’ē mai te mau ha’amo’ara’a i te hiero (hi’o ’api 92).
Te piti o te ha’apaera’a mā’a nā te ao nei
Nō te piti o te taime i roto e iva mahana, ’ua ani te peresideni Nelson i tō te ao nei, ’ia ha’apae i te mā’a ’e ’ia pure « ’ia araihia te ma’i pe’e, ’ia pāruruhia te feiā utuutu ma’i, ’ia ha’apūaihia te fa’arava’ira’a faufa’a ’e ’ia ho’i fa’ahou te orara’a mai tei mātarohia » (’api 74). ’Ua tupu teie ha’apaera’a mā’a nā te ao ato’a nei i te Farairē mo’a, 10 nō ’Ēperēra 2020.
Te mau hiero ’āpī
’Ua fa’aara te peresideni Nelson i te mau fa’anahora’a nō te patu e va’u hiero ’āpī nā te ao nei (hi’o ’āpī 115). Tē vai nei e 168 hiero tei ha’amo’ahia nā te ao nei, ’e e 7 o rātou e fa’a’āpīhia ra.
Te feiā ’āpī ’ōrero parau
I roto i te tuha’a purera’a nō te pō mahana mā’a, e piti feiā ’āpī, o Laudy Ruth Kaouk ’e o Enzo Serge Petelo, tei a’o mai nō ni’a i te huru tō te autahu’ara’a ha’amaita’ira’a i te feiā ’āpī (hi’o mau ’api 56 ’e te 58). ’Ua hau i te 20 matahiti i teienei ’a tu’u-fa’ahou-hia ai te feiā ’āpī ’ei feiā a’o i roto i te ’āmuira’a rahi.
Hīmene fa’ahiahia
’Ua fa’aharuharu-a’ena-hia te mau hīmene nō te ’āmuira’a. ’Ua ’ōpani te feiā mo’a nā te ao ato’a nei i te ’āmuira’a nā roto i te hīmenera’a « Māuruuru mātou e te Atua » ’e te mau pupu hīmene nō Ghana, Niu Terani, Mehico City, Korea Apato’a, Helemani, ’e Peretīria (hi’o ’api 2).