Elder Jorge T. Becerra

Hitu ’Ahuru Huimana fa’atere rahi

E ta’ata māmahu ’e te hau o Elder Jorge T. Bercerra ’a tupu ai ’oia i te pa’arira’a, terā rā, ’ua hōro’a tōna peresideni misiōni i te hō’ē rāve’a nōna ’ia arata’i. ’Ua ho’i o Jorge i te fare mai roto mai i te misiōni nō Arcadia Karifonia ma te hina’aro ’ia rave i te ’ohipa a te Fatu nō te toe’a o tōna orara’a.

’Ua tae mai te tahi atu mau ’ohipa fa’aterera’a, ’oi’oi atu i tāna i feruri. I te 27 o tōna matahiti, ’ua pi’ihia ’oia i roto i te hō’ē ’episekōpora’a. I te 32 o tōna matahiti, ’ua pi’ihia ’oia ’ei ’episekōpo. I te ha’amatara’a ’ua feruri ’oia ē, e’ita e tano iāna, ’a haere mai ai te ta’ata e fārerei iāna nō tō rātou mau fifi.

« ’Aita roa hō’ē ferurira’a tō’u nō ni’a i tā’u ’ohipa e rave nei » tāna ïa parau i tōna metua tāne.

’Ua riro te pāhonora’a a tōna metua tāne ’ei ha’api’ira’a pūai nōna, tei fa’aha’amana’o iāna i te fa’aro’o o tōna peresideni misiōni i roto iāna, ’e tei tauturu iāna ’ia fa’aineine nō te mau pi’ira’a fa’atere a muri a’e, tae roa atu i tōna pi’ira’a ’ei peresideni titi i te 37 o tōna matahiti.

« ’Ua parau mai tō’u metua tāne, ’tamaiti, e hia matahiti tō te Vārua Maita’i’ » ? Tē fa’aha’amana’ora’a ïa a Elder Bercerra. « ’Ua riro tāua taime ra ’ei taime ha’api’ira’a fa’ahiahia roa nō’u i te mea ē, ’ua ’ite au ē, e nehenehe tā’u e rave i te mau mea ato’a tā te Fatu e ani mai iā’u ».

’Ua vai noa tāua ha’api’ira’a ra i roto ia Elder Becerra i te roara’a e rave rahi matahiti tāvinira’a ma te ’ā’au tae i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei.

’Ua fānauhia o Jorge Eduardo Torres Becerra i te 18 nō Tītema 1962, nā Juan C. Becerra ’e o Celia T. Becerra i Salt Lake City, Utah, Marite, i reira ’oia i te pa’arira’a.

I muri a’e i tōna tāvinira’a i te hō’ē misiōni rave tāmau, ’ua fa’aipoipo o Elder Becerra ia Debbie Ilene Schneberger i roto i te hiero nō Roto Miti i te 10 nō ’Ātete 1984. E metua rāua nō e pae tamari’i.

’Ua fāri’i o Elder Becerra hō’ē fāito tū’ite i roto i te mau ha’api’ira’a rarahi i te fare ha’api’ira’a teitei nō Utaha, ’e hō’ē fāito i roto i te tōro’a mātutu i roto i te fare ha’api’ira’a tuarua nō Roto Miti. ’Ua ha’api’i ato’a ’oia i te tōro’a putu faufa’a i te fare ha’api’ira’a teitei nō Phoenix. I te matahiti 1998, ’ua riro mai ’oia ’ei ’āpiti nō te Pupu Allegis Advisor, e taiete ha’api’i mātutu faufa’a. I te taime ’a pi’ihia ai ’oia ’ei Hitu ’Ahuru Huimana fa’atere rahi, tē ’ohipa ra ’oia ’ei ta’ata ha’api’i nō te fa’a’ohipara’a i te moni nō te taiete Intermountain Financial Parteners.

’Ua tāvini o Elder Becerra ’ei peresideni nō te feiā ’āpī pāroita, ’ei tauturu i roto i te hō’ē peresidenira’a misiōni, ’ei tauturu i roto i te hō’ē peresidenira’a ’āma’a, ’ei ’orometua nō te seminaire, ’ei tauturu i roto i te hō’ē ’episekōpora’a, ’ei ’episekōpo, ’ei peresideni titi, e ’ei peresideni nō te misiōni nō Arcadia i Kalifonia. I te taime o tōna pi’ira’a, tē tāvini ra ’oia ’ei Hitu ’Ahuru āre’a.