O Le Meamoni e Uiga i Aoga o le Pathway

Saunia e Lillian Arp

Na tuua e Latu Vailahi Kata le aoga i le iva o tausaga. Ao ia faamoemoe ia iu ina toe foi i ana aoga, ao faasolo ina matua o ia, na foliga mai na sili atu ma sili atu ona faigata ona ia mauaina lava se aoaoga lelei.

Ini tausaga mulimuli ane, na filifili ai Latu e lesitala i se tasi o kosi fou o le Ola Tutoatasi a le Ekalesia: Amataina ma Faatupulaia la’u Lava Pisinisi. “Sa ou galue malosi ia faauma galuega e totofi mai taitasi,” ua ia manatua ai, ma o le mauaina o lona tusipasi mo lena vasega na fagua lona manao mo nisi aoaoga. “Sa ou mafaufau ia te au lava ia, afai e faapea le a’oga, ou te fiafia e taumafai.”

E lei umi mulimuli ane, ae faailoa atu e le toalua o Latu o Seteone Kata—o se fesoasoani i le au epikopo o le Uarota a Avondale o le Siteki o Aukilani Niu Sila Waterview o Le Ekalesia a Iesu Keriso o le Au Paia o Aso e Gata Ai—o ia i le avanoa o le PathwayConnect ma uunaia o ia e faataitai i ai.

O le malaga i le Pathway na iloaina e matuai faigata lava mo Latu, ae maise lava i lona kuata muamua. “Ou te lei iloa tautala Igilisi (i le taimi lea), sei vagana ai le fai atu Talofa ma le oā mai oe, ma isi.” Sa ia iloaina o le tuuina atu o ni lesona a tamaiti aoga i se vasega e tautatala Igilisi sa faalumaina ma faavaivai loto.

Ma le isi, ona ua 22 tausaga talu ona ia i ai i se aoga, na tauivi Latu ia malamalama i anomea o le kosi o le Pathway. Sa ia manaomia le fesoasoani.

“Sa ou tagi i taimi uma ma ole atu i le Tama Faalelagi . . . ia tuu mai ia te au le lototoa e faaauau ai,” ua fai mai ai Latu, ae o lana lava aoga e le pau lea o lana sini. “Sa ou (manao e faaali) atu i soo se tasi e tutusa ma tulaga e mafaia mea uma lava.”

O ana tatalo na taliina e ala mai i ni faagasologa o vavega laiti. Muamua, na ia maua le lototoa e feagai ai ma le amusia e lana vasega e tautatala Igilisi ma faaaoga o se uunaiga ia galue ai ia sili atu le malosi. O lona toalua sa o se faamanuiaga pele i lena taimi. Na ia faia le tele o feau a Latu i le fale ma tiute a le aiga ina ia mafai e ia ona iloilo ana meaaoga i le tele o taimi na ia manaomia ina ia malamalama ai.

E lei lava le moe a Latu i lona tausaga o le Pathway, ae maise lava pe a i ai ni meaaoga ma suega pupuu e auina atu, ae sa ia aoao ia faatuatua ma tuu atu lona faalagolago i taimi uma i le Tama Faalelagi.

“Ou te fiafia ma ou usiusitai i uunaiga a le Agaga Paia na tau mai ia te au e aua lava le fiu,” ua ia fai mai ai. Ana faapea e fiu o ia iina, semanu na te le oo i le aafiaga o le sasaa mai o faamanuiaga ia na oo mai ona o lona faamanuiaina mulimuli ane i le Pathway.

Ia Iulai 2017, na faauu ai Latu mai le PathwayConnect—ma le maualuga o togi e 4.0! na ia vave lava ona talosaga atu mo le Iunivesite o Polika Iaga—i le polokalama o le tikeri i Aitaho ma na ootia o ia i le faafetai ina ua taliaina lana talosaga i le na o ni nai itula mulimuli ane. I le mavae ai o nei mau tausaga, ua iu lava ina mafai ona ia faaauau lana aoga.

E na o le 6 masina (2 kuata) na faauma ai e Latu tusipasi o le Pule Lagolago, ma i le aso lua o Iulai 2019, sa avea ai o ia ma le tagata Niu Sila muamua lava ua faauu ma se Tikeri Lagolago a le UPI Aitaho i le Initoneti. O lana mataupu autu o le Faaaogaina o le Saienisi i le Faafoeina ma le Puleaina o le Ofisa, ma na ia mauaina faatasi ma faailoga aloaia maualuluga.

“Ua suia mea uma i lou olaga mo le lelei sili atu ona o lau filifiliga e aoga. O se faamanuiaga ofoofogia mo lou aiga ma au.” Na sili le faafetai o Latu ona e mafai ona ia aveina atu lona malamalama fou faatasi ma ia i soo se mea, e oo lava i le isi olaga.

Ae e lei uma lelei lava o ia i lana aoga aloaia. O loo galue nei Latu i se faailoga Maualuga o le Saienisi i le Faaaogaina o le Puleaina faatasi ma se faamamafa lona lua i le Puleaina Lagolago ma le Muai-Tulafono. O lana sini umi faapolofesa o le mauaina o se PhD i le Tulafono ma avea ma se faamasino.

Ona o ona amataga maualalo, e i ai le alofa o Latu mo tagata uma e le talitonu latou te mafai ona faamanuiaina i le aoga. “Afai ou te mafaia, e te mafaia, foi,” o lana tala lea. “O le Pathway e taugofie ma e mafai ona maua, ae e mafai ona taitai atu i ni avanoa tetele.

“Ou te iloa o le suesue e mafai ona avea o se aafiaga oona i nisi taimi, ae o ona fua e suamalie! O faamanuiaga o le aoga e le mafai ona faamatalaina—mo oe lava ia, lou aiga ma le alalafaga foi. E le mafai lava ona faapea ua tuai tele ona toe aoga. Ou te folafola atu, o le a e le faanoanoa lava na e faia.”