Savali i le Malamalama o Keriso

Saunia e Elder Kazuhiko Yamashita

Fesoasoani Lua, Au Peresitene o le Eria a le Pasefika

Ua te’a le ono masina o lenei tausaga. O faapefea ona faaaofia oe i le Taulaiga a le Eria 2020? E faamoemoe, o loo e fiafia i le Taulaiga a le Eria o lenei tausaga ma le lagona o loo e savali i le malamalama o Keriso.

O le Taulaiga a le Eria o lenei tausaga e sili atu le faigofie nai lo tausaga ua mavae ma o loo taulai atu ia Iesu Keriso ma le fautuaga ia “Savali i le Malamalama o Keriso.” Ona ua valaaulia i tatou e Iesu Keriso ina ia tasi i tatou ia te Ia, e tatau ona tatou savavali i Lona malamalama.

Savali i le Malamalama.

Matou te uunaia outou ina ia mulimuli pea ia Iesu Keriso. Aua e te savali i le pogisa.

I tausaga ua mavae, ao ou nofo ai i Iuta, sa ou avea se vasega faase’e i po. Ina ia faaleleia atili lo’u tomai, ou te mulimulita’i lava i lo’u faiaoga, e mulimuli atu lava i ona tua. Ae peitai, i se tasi po, sa ou le mulimuli atu ai ia te ia, ma le lē manatu i ai, sa ou filifilia ai se isi ala e ‘ese mai. Sa leai ni molī e fesoasoani ia te a’u e vaai ai. Na faafuase’i ona ou lelea i luga o le ‘ea, ma ‘ou pa’ū ma tau ai o’u foliga i le kiona. I lo’u manatu o loo lelei mea uma sa ou tu faavave ai i luga ma amata ona faasee atu e faatasi ma le faiaoga ma isi tamaiti. I le taimi lava na ou taunuu ai i le fale e malolo, na valaaulia a’u e le faiaoga ou te tilotilo ia te a’u [lava] i le fā’ata. Ao o’u tilotilo atu i lo’u ata, na ou iloa ai ua suia le lanu o lo’u pa’u. Na tuuina mai e le faiaoga ia te a’u ni solo mafanafana ma fautua mai ou te nofo i le fale e malolo. Ou te le’i iloaina ua amata ona ogaoga o’u manu’a mai le aisa. I lena po na ou savali ai i le pogisa ma ou mafatia ai i ona taunuuga.

O’u uso e ma tuafafine sei o tatou filifili e savavali i le malamalama.

Auala e Fa e Savali ai i le Malamalama o Keriso:

Faamamaluina o le sapati
Saili faamanuiaga o le malumalu
Ia ola-tutoatasi i le faaletino ma le faaleagaga
Auauna atu e ala i le faapotopotoina o Isaraelu ma auaunaga

Matou te talitonu o aiga ma tagata uma i le Eria o le Pasefika e mafai ona faatutuina sini patino mo ia lava ma le aiga i totonu o lenei Taulaiga a le Eria 2020.

Muamua: Savali i le malamalama o Keriso e ala i le faamamaluina o le sapati.

I le taunuuga o le faaesea ai mai fegalegaleaiga ona o faafitauli o le KOVITI-19 i lenei tausaga, ua faateleina ai avanoa tatou te lagonaina ai le suamalie o aoaoga o le talalelei e faatotonugalemu-i-le-aiga. Matou te talitonu ua faamalolosia molimau ona o nei aafiaga.

E leai se tasi na te iloaina le umi o le a tatou aafia ai i aafiaga o le KOVITI-19. Ae peitai, ia tatou faaauau pea ona lagonaina le olioli i a tatou suesuega e faatotonugalemu-i-le-aiga ma sauniga faaleagaga i totonu lava o ō tatou aiga. Pe a mavae le pipisi o le KOVITI-19, ia tatou o i le Lotu i taimi uma e mafai ai ma olioli i le faatasi ai ma isi. Ia tatou valaaaulia a tatou uo ma tuaoi e ‘o mai ina matamata’ i a tatou sauniga i Aso Sa. Ia tatou olioli faatasi foi i suesuega faaleaiga i afiafi mai le Sau, Mulimuli Mai Ia Te Au–mo Tagata Taitoatasi ma Aiga; e tusa lava pe mo na o le lima i le sefulu minute.

Lona Lua: Savali i le malamalama o Keriso e ala i le sailia o faamanuiaga o le malumalu.

O e umia se pepa faataga aoga o le malumalu? E ui lava o nisi o outou e le mafai ona agai soo i le malumalu, e tatau lava ona tatou umia se pepa faataga aoga o le malumalu i taimi uma. E tatau ona faaali atu lo tatou agavaa i le Atua. Alii Talavou ma Tamaitai Talavou, e mafai foi e outou ona umia se pepa faataga o le malumalu. Afai e te alu atu i lou epikopo ma fai atu “Epikopo, ou te manao e umia se pepa faataga o le malumalu,” o le a ia fesoasoani atu ia te oe ma le olioli tele.

Afai e te le iloa pe faapefea ona sailia ma faamaumau ou gafa o le aiga, fesili i lo tou taitai o le malumalu ma aiga i lau paranesi po o le uarota po o se faufautua. O le a latou matuai fiafia lava e fesoasoani atu ia te oe.

Lona Tolu: Savali i le malamalama o Keriso e ala i le ola ai i le talalelei i le aiga.

I lenei tausaga, ua faamanuiaina i tatou i le suesueina o le Tusi a Mamona i le aiga i aso taitasi e faaaoga ai le Sau, Mulimuli Mai Ia Te A’u–mo Tagata Taitoatasi ma Aiga. Matou te fautuaina tagata uma o le Ekalesia i le Eria atoa, ina ia fausia se aga masani faatuatuaina o le suesueina lea o le Tusi a Mamona i aiga i aso taitasi.

Ma le isi, mo Alii Talavou ma Tamaitai Talavou, matou te uunaia outou ina ia outou auai i le Polokalama o Tamaiti ma le Autalavou.

Lona Fa: Savali i le malamalama o Keriso e ala i le faapotopotoina ma le auaunaga.

O faapefea ona e faaaogaina le valaaulia o le “O mai ia ina Matamata”, “O mai ma Fesoasoani” ma le “O mai ma Nofomau”? O mea faigaluega masani ma faalenatura nei e valaaulia ai isi e o mai ia Keriso. Matou te fautuaina le faaaogaina o nei valaaulia, galulue faifai pea ma faifeautalai faamisiona, ma le taitai misiona ma faifeautalai a le uarota.

Alii talavou, matou te manaomia la outou fesoasoani! E pei ona sa saunoa mai Peresitene Russell M. Nelson, o outou o ‘autau a le Alii. O outou o ni agaga filifilia. Matou te fautuaina outou uma ina ia auauna atu faamisiona mo le Alii. E toatele ni uo faavavau o loo faatalitali mai mo oe ina ia aumaia i latou i le aiga.

O le muamua o le faia o faatinoga.

O nisi o outou atonu e faapea mai o nei mea e faigata. Ina ia ausia a tatou sini, tatou amata i mea faigofie. Ia fesoasoani le tasi i le isi.

I lana saunoaga, ‘Saili e Aoao e Ala i le Faatuatua’, na aoao mai ai Elder Bednar e faatatau i se tala o le Feagaiga Tuai e faapea:

O le faia o faatinoga o le galueaiina lea o le faatuatua. Na tauaveina e le fanauga a Isaraelu le atolaau o le feagaiga. Na latou taunuu mai i le vaitafe o Ioritana. Sa folafola atu o le a mafai ona latou savavali i le eleele matutu. O anafea na vaeluaina ai le vai? Ina ua susū o latou alofivae. Sa latou savavali i le vaitafe—na latou faatinoina. Na mulimuli mai le mana—na vaeluaina le vai. (“Saili e Aoao e Ala I le Faatuatua” [address to Church Educational System religious educators, Feb. 3, 2006], lds.org/media-library)

O Le Taulaiga a le Eria o lau taulaiga lea.

O le Taulaiga a le Eria 2020 o lau taulaiga lea. E le mo na’o le Au Peresitene o le Eria e faaaogaina. Aisea e tatau ai ona i ai se Taulaiga a le Eria?

O le galuega a se perofeta Iutaia anamua sa galue o se avefeau a le Atua ma faailoa le finagalo o le Atua. Na molimau malosi mai Amosa ina ua ia faapea mai, “E le faia lava se mea e le Alii o Ieova, a e faaalia lona finagalo i ana auauna o perofeta” (Amosa 3:7).

O perofeta i aso nei o loo i ai foi lenei matafaioi. Latou te talanoa mai ia i tatou ao musuia i latou e le Agaga Paia ma faaalia mai le finagalo o le Atua ia i tatou. Ana leai, o le a se mea tatou te faia? “A leai se faaaliga, e faasalalauina le nuu” (Faataoto 29:18). E mai i savali a tatou perofeta, ua tatou iloa ai faamoemoega o le Atua ia i tatou. Ua tuuina mai e Le Au Peresitene Sili ma Aposetolo e Toasefululua faatonuga fou ma taitaiga fou ia i tatou. O le Taulaiga a le Eria 2020 ua faamanino mai ai vaaiga ma faamuamua a o tatou perofeta. Ua i ai lenei taulaiga i le mavae ai o le sailia o musumusuga, e ala i talanoaga faaumiumi, ma e ala i le tatalo faamaoni.

Ua folafola mai e Peresitene Russell M. Nelson, “Ia faatumauina le Faaola i totonugalemu o au fuafuaga. Fesili ifo ia te oe lava ma ole atu ma le agaga tatalo i lou Tama o i le Lagi, ‘O le a se mea e mafai ona ou faia ia avea atili ai e pei o Iesu Keriso?’ A e faia lenei mea i aso taitasi, o le a tutupu vavega.” (O se savali faapitoa mo tamaiti ma le autalavou i le amataga o le sauniga Faafesagai ma Elder Gerrit W. Gong—Tamaiti ma le Autalavou: 17 Novema, 2019)