Faneva ang Misyonaryo
Si Faneva mitambo sa bintana sa busy nga dalan gawas sa iyang balay. Iyang makita ang mga tawo nga nagguyod og mga karomata sa mga utanon, bugas, panapton, ug ubang mga palaliton nga baligyaon. Madungog niya ang busina sa sakyanan ug mga iro nga nanag-usig. Dayon nakadungog siya og laing tingog.
“Mama, dunay tawo nga nanuktok!” Si Faneva mitawag. Giablihan ni mama ang pultahan. Duha ka batan-ong lalaki nga nagsul-ob og amerikana ug kurbata naa sa bakanan sa pultahan. Si Faneva wala pa gayud makakita ni bisan kinsa nga nagsul-ob og ingon niana sa iyang kasilinganan sa Madagascar.
“Kami ang mga misyonaryo gikan sa Ang Simbahan ni Jesukristo sa mga Santos sa Ulahing mga Adlaw,” ang usa nila miingon. “Kami nagtudlo sa mga tawo mahitungod ni Jesus. Mahimo ba kami nga mopaambit og usa ka mensahe uban kaninyo?”
Nalipay kaayo si Faneva sa dihang gipadayon sila ni Mama. Ang tibuok pamilya nagpundok aron maminaw mahitungod ni Jesukristo ug sa unsang paagi ang Iyang Simbahan nabalik dinhi sa yuta.
Human nianang adlawa, ang mga misyonaryo mibisita sa pamilya ni Faneva sa makadaghan nga higayon. Nagdala sila og libro nga gitawag og Mga Sugilanon sa Ang Basahon ni Mormon. Si Faneva ganahan nga mobasa niini uban sa iyang pamilya!
Ugma damlag ako mahimong usa ka misyonaryo ug mopaambit sa Basahon ni Mormon sa uban, miingon si Faneva sa iyang kaugalingon.
Laing higayon sa dihang miabut ang mga misyonaryo, ilang gitudloan ang pamilya ni Faneva unsaon sa pag-ampo. Nakat-unan ni Faneva nga siya mahimong makig-istorya sa Langitnong Amahan bisan kanus-a, bisan asa.
Ugma damlag ako mahimong usa ka misyonaryo ug motudlo sa mga tawo mahitungod sa pag-ampo, hunahuna ni Faneva.
Usa ka adlaw ang mga misyonaryo adunay usa ka importanting pangutana.
“Sundon ba ninyo ang ehemplo ni Jesukristo ug magpabunyag?” usa kanila nangutana.
Si Faneva mibati og kalipay sa iyang kasingkasing. “Oo!” miingon siya.
“Oo!” miingon ang iyang igsoong lalaki ug ang iyang Mama.
Si Papa miingon nga dili pa siya andam nga magpabunyag. Apan OK ra siya kon ang tanan sa pamilya mabunyagan. Ug busa nabunyagan sila! Si Faneva gibunyagan sa usa sa mga misyonaryo kinsa mitudlo kaniya mahitungod ni Jesus.
Ugma damlag ako mahimong usa ka misyonaryo ug motabang sa mga tawo nga mabunyagan, naghunahuna si Faneva.
Usa sa labing maayo nga bahin sa pagka-miyembro sa Simbahan mao ang pag-adto sa Primary. Ganahan si Faneva sa mga kalihokan ug sa pagpakighimamat og bag-ong mga higala. Apan ang iyang paborito nga butang sa tanan mao ang pagkanta sa mga kanta sa Primary. Usa ka Dominggo sa Primary, nanganta sila og mga kanta nga mahitungod sa pagpaambit sa ebanghelyo.
“Gusto ko karon nga mamisyonaryo,” mikanta si Faneva. “Bisan kon gamay pa ako.”
Mahimo nakong sugdan karon ang misyonaryo nga buhat, nakaamgo si Faneva. Dili kinahanglang maghulat ko hangtud nianang panahona!
Sukad niana, si Faneva nangita og paagi nga siya makapaambit sa ebanghelyo. Naningkamot siya nga mahimong maayo nga ehemplo. Midapit siya sa mga tawo ngadto sa simbahan. Mitabang siya sa iyang mga silingan. Human sa pipila ka tuig, igo na ang iyang pangidaron sa pagtabang sa mga misyonaryo nga motudlo sa mga tawo sa iyang siyudad. Sulod sa pipila pa ka tuig, miserbisyo siya mismo og misyon—nakighimamat og bag-ong mga tawo ug mipakigbahin sa ebanghelyo, sama sa mga misyonaryo nga mipaambit diha kaniya. ●