Siya Miayo Kanako
Ang akong higala nakadungog nga nasakit ko ug mipadala og usa ka hinimo niya nga puzzle [dula sa pagsumpay-sumpay sa mga bahin sa hulagway] nga gituyo sa pagbuhat alang kanako.
Paghulagway pinaagi ni Joshua Dennis
Kanunay kong naghunahuna sa akong kaugalingon isip usa ka himsog nga tawo. Mao nga nakalitan ko dihang pagmata nako usa ka buntag mibati nga ang akong dughan mura og napiit og maayo nga mora og mobuto. Gidali ko og dala ngadto sa ospital, apan human sa daghang mga oras sa pag-testing, ang mga doktor wala makakita sa problema. Ilaha ko nga gipapauli, bisan og nag-antus gihapon ko sa tumang kasakit. Mao nga nagsugod ang pito ka bulan nga kalisud sa pakigkita sa doktor, mga pag-istar sa ospital, ug grabing kasakit nga gibati nako sa akong kinabuhi.
Nagsugod ko sa pagkaguol. Kinahanglan ko nga moundang sa kolehiyo ug mopuyo og balik uban sa akong mga ginikanan. Dili ko makagawas aron makig-uban sa akong mga higala. Sakitan kaayo ko sa pagbuhat sa bisan unsa nako nga mga kalingawan. Mibati ko nga ang tanang butang nga akong giamuma [ganahan]—ang akong mga pangandoy, ang akong mga relasyon, ang akong mga talento—nagun-ob, ug karon ang mga piraso sa akong kanhi nga kaugalingon ingon og imposible nang mabalik pa. Ug nagsugod ko og kahibulong: Nganong nakatugot man ang Langitnong Amahan nga mahitabo kini kanako? Wala ba Siya mahigugma kanako?
Human sa laing makasagmuyo ug sakit nga pakigkita sa doktor, ang gusto ra nakong buhaton mao ang pagluklok ug paghilak. Apan sa dihang miabut ko sa balay, nakakita ko og butang nga lahi diha sa balkon: usa ka daan, gision nga kahon sa sapatos nga giputos og tape ug gi-address diri nako.
Usa ka sulat diha sa kahon mibutyag nga ang putos nga miabut nagagikan sa usa sa akong mga higala. Nadunggan niya nga nasakit ko ug gusto nga mopalipay kanako. Sa dihang akong giablihan ang kahon sa sapatos, akong nakita nga puno kini sa gagmay nga piraso sa Styrofoam. Hinimo niya kadto nga puzzle gituyo og himo para lang nako.
Samtang akong giporma ang puzzle, misugod ko sa paghilak. Ang puzzle nagporma sa akong ngalan, nga gilibutan sa matam-is nga mga mensahe sa gugma ug pag-awhag. Gibati nako nga ang nabungkag nga mga piraso sa akong kaugalingon karon ingon nga napahimutang na og balik sama sa kanhi samtang akong gisumpay-sumpay ang gasa sa akong higala.
Sa wala madugay, nagsugod ko og tumar sa tambal nga nakapakunhod sa akong simtumas ug mitabang sa mga doktor nga makadayagnos sa sakit. Aduna koy talagsaon apan matambalan ra nga kahimtang, ug sa paggamit sa tukma nga medisina, makabalik ra ko sa normal nga kinabuhi.
Bisan samtang ang akong lawas naayo, nasayud ko nga dili gayud nako makalimtan unsay akong nakat-unan. Tungod sa maanindot nga gasa sa akong higala, nasayud ko nga gihigugma ako ug ang Langitnong Amahan wala makalimot kanako. Human sa daghang mga bulan nga mibati nga nawad-an og paglaum, salamat sa kamabination sa usa ka higala ug sa gugma sa akong Amahan sa Langit, naayo ako pag-usab.