Mga Young Adult
7 ka Sugyot aron sa Pagbuntog sa Paggamit sa Pornograpiya
Ang tagsulat nagpuyo sa Utah, USA.
Sa pakigtrabaho uban sa mga young single adult nga naningkamot sa pagbuntog sa dili mapugngan nga paggamit sa pornograpiya, nakakaplag ko og mga sugyot nga mahimong makatabang usab kaninyo.
Stick figure art gikan sa Getty Images
Sa dihang gi-set apart ko isip bag-ong bishop sa usa ka young single adult ward, dihay linya sa mga young single adult sa gawas sa pultahan sa akong opisina nga naghulat aron makigkita kanako. Tag-ana kon unsay among gihisgutan nianang una nga interbyu?
Pornograpiya.
Ug sulod sa mosunod nga tulo ka tuig, ang pagpaningkamot sa pagtabang sa mga young adult nga makabuntog sa usa ka dili mapugngan nga kinaiya usa ka dako nga aspeto sa akong calling, mao nga nasayud ko nga kinahanglan nakong makat-on kutob sa akong mahimo. Nagpuasa ko, nag-ampo, mitambong sa templo, nakigtambag sa ubang mga lider, miribyu sa tanang anaa nga mga kapanguhaan, mitambong og mga klase kabahin sa pagkaayo gikan sa pagkaadik, ug nagkat-on gikan niadtong mga naningkamot nga makakaplag og pagkaayo. Gusto kong mopaambit og pipila ka hunahuna nga puno sa paglaum mahitungod sa unsay akong nakat-unan.
1. Hibaloi Nga Kamo Anak sa Langitnong mga Ginikanan Kinsa Nahigugma Kaninyo
Kon kamo naningkamot sa pagbuntog sa dili mapugngan nga paggamit sa pornograpiya, tingali mobati kamo nga magpalayo sa Langitnong Amahan tungod kay naghunahuna kamo nga dili takus sa gugma o tabang hangtud nga masulbad ninyo kini. Mao gayud kini ang gusto ni Satanas—nga ipalayo kamo gikan sa tanan nga naghigugma kaninyo uban sa ideya nga mabuntog ninyo ang pornograpiya sa inyong kaugalingon ug nga mao lamang kini ang higayon nga kamo mahimong takus nga higugmaon.
Tungod sa inyong balaanong kinaiya, kanunay kamong takus nga makadawat sa paglaum, inspirasyon, ug personal nga pagpadayag gikan sa Langitnong Amahan ug sa makaayo nga gahum ni Jesukristo sa pagbuntog sa pornograpiya.1 Ayaw pagpalayo Kanila o sa mga tawo kinsa naghigugma kaninyo.
2. Tangtanga ang Kaulaw
Akong nakat-unan nga ang pagtangtang sa kaulaw importante sa pagbuntog sa pornograpiya. Ang kaulaw mao ang pagbati nga kamo ingon og naguba, nadaot, o usa ka dautan nga tawo. Ang pagtuo niining makadaot nga mga ideya mahitungod sa inyong kaugalingon sa pagkatinuod makalit-ag kaninyo sa balik-balik nga pagkaadik. Ang pagbati og pagmahay alang sa usa ka butang nga inyong nahimo usa ka bahin sa proseso sa paghinulsol ug makatabang kaninyo sa pag-usab sa inyong kinaiya. Apan ang kaulaw makapahimo ninyo nga mobati nga ingon og ang inyong tibuok nga pagkatawo dautan ug nga kamo dili na matabangan sa Manluluwas.2
Gusto sa Langitnong Amahan nga kamo adunay hingpit nga paglaum kang Jesukristo ug sa mga panalangin sa Iyang Pag-ula. Ang kaulaw makapahimo kaninyo nga magsige og hunahuna sa nangagi nga magpabilin kaninyo diha sa usa ka lilo sa mga bakak ug pagbasol sa kaugalingon. Palihug palayo sa dalan sa kaulaw.
3. Ayaw Dayon og Gamit sa Pulong nga Gitawag og “Pagkaadik”
Daghang mga tawo ang motawag sa ilang kaugalingon nga “naadik” sa pornograpiya. Ako mopasidaan kaninyo nga dili mogamit niana nga tawag sa sayop nga paagi. Kadaghanan sa mga batan-on nga nakigbisog sa pornograpiya sa pagkatinuod wala maadik.3 Ug ang sayop nga paggamit niini nga tawag tingali makapalisud sa pagtapos sa paggamit sa pornograpiya tungod sa kaulaw, sa mikunhod nga paglaum, ug sa pagbasol sa kaugalingon nga nagauban niini.
4. Paghimo og usa ka Sinulat nga Personal nga Plano sa Pagpugong
Ang usa ka personal nga plano sa pagpugong usa ka dokumento nga adunay tulo ka bahin nga makatabang kaninyo sa pagbuntog sa pornograpiya.
Bahin 1: Ilista ang mga makatintal ninyo. Ang mobati nga natintal mao ang unang lakang sa pabalik-balik nga proseso [cycle] nga mosangput sa pagtan-aw og pornograpiya.
Adunay pipila ka matang sa mga makatintal:
-
Nahimutangan: mga kahimtang nga makatintal tungod sa nangagi nga mga hunahuna o kinaiya (sama sa pagkaanaa sa samang kwarto o sa usa ka piho nga oras sa adlaw)
-
Stress/kabalaka/kamingaw/makalilisang nga mga panghitabo: lisud nga mga emosyon o mga sitwasyon nga makatintal kaninyo sa pagtan-aw og pornograpiya isip usa ka paagi sa paglingkawas ug pag-atubang niini nga mga pagbati
-
Biswal: inosenting pagkakita og usa ka butang nga dili pornograpiya apan makatintal pinaagi sa social media, mga sine, mga litrato, ug uban pa.
Bahin 2: Paghimo og plano kon unsaon sa pagpaminos sa mga makatintal.
Sama pananglit, kon kamo adunay makatintal nga sitwasyon sama sa pagbati nga mahuyang sa lawom nga gabii, ang pagpalong sa inyong phone 30 minutos sa dili pa ang tingkatulog o ang pagkatulog nga wala ang inyong phone sa inyong kwarto makatabang. Kon ang pornograpiya usa ka paagi nga kamo makasugakod sa malisud nga mga pagbati, pangita og mga paagi nga mas maayong makasagubang niini nga mga emosyon. Makatabang ba kaninyo ang pag-ehersisyo o ang tambal sa pagpaminos sa lebel sa inyong stress o kabalaka? Makapaminos ba sa kamingaw ang pagpakig-uban sa mga higala, o ang pag-enrol sa usa ka klase sa institute? Ikonsiderar kon unsay inyong panlimbasug ug kon unsa nga mga opsyon ang makatabang kaninyo.
Usab, ayaw ibaliwala ang espiritwal nga mga himan. Ang pag-ampo, pagtuon sa kasulatan, pagserbisyo, ug pagtambong sa simbahan ug sa templo gamhanan nga mga himan nga importante sa pagpaminos sa mga makatintal ug sa pagtabang kaninyo nga magpabiling lig-on.
Bahin 3: Pagplano unsay inyong buhaton kon kamo mobati nga natintal. Alang sa matag makatintal, isulat ang inyong plano nga dunay daghang lakang.
Sama pananglit, kon kamo mobati nga natintal, mahimong palungon ninyo diha-diha dayon ang inyong phone, mo-text o motawag sa usa ka tawo, maglakaw-lakaw o mag-ehersisyo, mobasa sa Basahon ni Mormon, o mobuhat sa bisan unsang butang nga tingali makatabang ninyo sa pag-usab sa inyong mga hunahuna.
Isulat ang mga lakang nga makatabang kaninyo! Usahay molabay ang mga makatintal nga wala nagkinahanglan sa pagbuhat sa inyong tanan nga mga lakang sa plano sa pagpugong. Apan ang inyong mga lakang makatabang sa pagbitad kaninyo pagawas gikan sa pagtintal. Sa higayon nga ang makatintal molabay, i-update ang inyong plano sa pagpugong sa unsay misalir ug sa unsang paagi kini mahimong mausab aron mahimong mas epektibo sa sunod higayon. Ibutang kini sa dapit nga makit-an ninyo matag adlaw.
5. Sabta ang Sipyat [Lapse] batok sa Sugmat [Relapse]
Ang sipyat mao kanang kamo makahimo og sayop, apan kamo daling maulian ug magamit kini isip usa ka kasinatian sa pagkat-on sa pagpalambo sa inyong plano sa pagpugong. Ang sugmat mao kanang kamo magpapildi, magpatuyang, ug dili magpakabana.
Hibaloi nga ang pagkasipyat kabahin sa pagpalambo sa inyong plano sa pagpugong. Ayaw paghukom nga nawala ninyo ang inyong tanang pag-uswag o nga ang tanan nga paningkamot nga nabuhat ninyo walay bili—tungod kay kini aduna. Pagpaabut uban sa usa ka positibo nga kinaiya ug hibaloi nga kamo nagkaduol og usa ka adlaw ngadto sa pagkaayo.
Kon kamo adunay sipyat, pangutan-a ang inyong kaugalingon:
-
Unsay nahitabo?
-
Ngano man nga kini nga pagtintal lahi?
-
Na-stress ba kamo bag-ohay lang? Kumusta man ang inyong emosyonal nga pagbati?
-
Ang wala pagtuon sa kasulatan sulod sa usa ka panahon nakapahuyang ba kaninyo?
-
Wala ba kamo maka-ehersisyo bag-ohay lang?
-
Adunay butang sa inyong plano sa pagpugong nga dili makatabang?
-
Unsay lahi nga mabuhat ninyo sa sunod higayon?
Isulat ang unsay inyong nakat-unan ug padayon!
6. Tuo sa Makaayo nga Gahum sa Manluluwas
Si Jesukristo makatabang ninyo sa makapalambo nga proseso sa paghinulsol, ug Siya adunay gahum nga makahatag og kusog kaninyo samtang kamo maningkamot sa pagbuntog sa pornograpiya. Nakasabut Siya unsay inyong gibati ug naghulat nga mokuha niana nga palas-anon gikan kaninyo. Ayaw hunahunaa nga ang pagduol ngadto Kaniya makadugang sa Iyang palas-anon. Miantus na Siya alang kaninyo. Hinoon, buhata ang inyong labing maayo, paduol sa Manluluwas, ug hangyoa Siya sa pagtabang kaninyo nga maayo, sa pag-usab sa inyong mga tinguha, ug sa paghatag kaninyo og dugang kusog nga makapadayon sa unahan.
Sama sa gitudlo ni Elder Ulisses Soares sa Korum sa Napulog Duha ka mga Apostoles: “Samtang kita mopadayon nga maningkamot sa pagbuntog sa atong mga hagit, ang Dios mopanalangin nato sa mga gasa sa hugot nga pagtuo nga mamaayo ug sa pagbuhat og mga milagro. Iyang buhaton alang kanato kon unsay dili nato mahimo sa atong kaugalingon.”4
7. Ayaw Buhata Kini nga Mag-inusara
Ang pagpakiglambigit ug ang pakighigala makahatag usab kaninyo og gahum ug tabang aron magmalampuson. Kinahanglan kamo adunay usa ka tawo nga makatabang ninyo sa pagpabilin sa inyong kaugalingon nga andam motubag sa kaakohan ug motabang ninyo sa inyong labing maayo ug labing bati nga mga adlaw. Sila kinahanglang mosuporta kaninyo nga dili maghusga kaninyo. Ug kamo usab makahatag sa sama nga suporta alang kanila. Pagtinguha og tambag gikan sa inyong mga lider sa Simbahan o sa mga sakop sa pamilya. Ug kon gikinahanglan, ang usa ka therapist o propesyonal nga magtatambag sa kahimsog sa pangisip makatabang usab ninyo sa pagdiskubre sa mga rason nga dili dayon kanunay makita kon nganong nanlimbasug kamo sa pornograpiya.
Hinumdumi Nga Kamo ang mga Ginikanan ug mga Lider sa Umaabut
Kamo ang unang henerasyon nga nagsagubang og 24/7 nga access sa pornograpiya. Nagtuo ko nga kini nga hagit moabut sa kinatas-ang punto niini sa inyong henerasyon tungod kay kamo magkanaa og mas maayong mga himan ug kaalam sa paggiya sa uban palayo o pagawas niini nga lit-ag sa dihang kamo mao na ang mga ginikanan ug mga lider sa umaabut nga adlaw. “Ang atong Langitnong Amahan wala mobutang kanato dinhi sa yuta aron mapakyas apan aron molampus sa mahimayaong paagi.”5
Bisan tuod kini nga mga sugyot makatabang sa inyong mga paningkamot sa pagbuntog sa pornograpiya, ayaw kahadlok sa paggamit usab sa ubang mga kapanguhaan. Lahi-lahi ang panaw ngadto sa pagkaayo sa tanang tawo. Pangita og unsa ang makatabang kaninyo. Ayaw pagpapildi. Buhata kini usa ka lakang matag higayon. Mahimo ninyo kini. Kamo sa pagkatinuod makabuntog niini (tan-awa sa Mga Taga-Filipos 4:13). Ug kamo mamahimo kon kinsa gayud kamo nga gitumong nga mamahimo.