Ang Katuyoan sa Akong Bunyag
Sa wala pa ang akong bunyag, naglingkod ko nga nag-inusara ug nag-ampo nga ang akong mga higala milagrusong mopakita.
Paghulagway pinaagi ni Julia Yellow
Isip usa ka bata nga nagpuyo gawas sa siyudad sa Taipei, Taiwan, wala gayud ako masayud mahitungod sa mga misyonaryo. Mao nga sa unang higayon nga ako nakahimamat kanila, nakuryuso ko mahitungod sa ilang mensahe. Wala ra magdugay nga ako nagmatinguhaon sa pagsunod sa ilang mga pagtulun-an ug sa pagsunod sa ebanghelyo sa akong kinabuhi. Mibati ko nga kini usa ka paagi alang kanako sa pagsusi kon aduna ba gayuy Dios.
Sulod sa usa ka bulan, gitudloan ko sa ebanghelyo ug sa mga sugo nga itudlo sa dili pa ang bunyag. Ang kalinaw miabut kanako pinaagi sa pag-ampo, nakadawat ko og personal nga pagpadayag gikan sa pagtuon sa mga kasulatan, ug wala gayud ko makapalta og miting sa Simbahan. Mihukom ko nga ako kinahanglang mabunyagan.
Ang kinalisuran nga hagit nga akong nasinati nianang higayuna mao ang mga problema nga mitumaw sa akong mga relasyon sa pipila sa akong mga higala tungod kay sila supak sa akong kalambigitan sa Simbahan. Nag-ampo ko pag-ayo kabahin niini nga mga problema, apan ang among mga relasyon ingon og mas migrabe.
Gidapit nako ang akong mga higala sa akong bunyag, apan hingpit nila nga gibaliwala ang akong pagdapit. Wala gayud ako masayud kon unsay buhaton. Sa wala pa ang akong bunyag, naglingkod ko nga nag-inusara sa sofa diha sa pasilyo sa chapel, nag-ampo nga ang akong mga higala milagrusong mopakita aron makasulti ko nila mahitungod sa positibong mga kausaban nga akong gihimo sa akong kinabuhi ug sa pagmatuod sa ilaha nga naghimo ko sa husto nga desisyon pinaagi sa pagpabunyag.
Ang akong mga higala wala gayud mitunga, apan samtang sinsero akong nag-ampo sa Dios, mibati ko og usa ka impresyon. Nianang higayuna, mibati ko sa dakong gugma gikan sa akong Langitnong Amahan. Nasayud ko nga Siya anaa didto ug tinuod nga naminaw sa akong pag-ampo.
Sa sinugdanan gusto kong magpabunyag tungod lamang sa tanang talagsaong mga butang nga nahitabo sa akong kinabuhi, apan nianang higayona, nasabtan nako ang katuyoan sa akong bunyag.
Ang impresyon nga akong nadawat sama sa tingog sa Ginoo nga namulong sa malumo ug direkta nga paagi ngari kanako, nag-ingon, “Wala kay kinahanglang pamatud-an ni bisan kinsa. Ikaw kinahanglan lang momatuod ngari kanako nga ikaw andam nga moduol ngari kanako ug magpabiling matinud-anon sa akong ebanghelyo alang sa tibuok nimong kinabuhi.”