Mga Pangutana ug mga Tubag

Unsaon nako nga mabuntog ang pagbati sa kamingaw?

Gilitratohan ni Kay Lynn Hodges

Palamboa ang Inyong Mga Talento

Nalagpasan nako ang akong mga pagbati sa kamingaw pinaagi sa pagpalambo sa akong mga talento, mahimo kini pinaagi sa mga instrumento sa musika, usa ka kalingawan, ug uban pa. Kini makatabang nimo sa pagkalimot sa imong pagbati sa kamingaw, ug kasagaran hingpit kining mawala. Mosangpot usab kini sa pagkaplag og ubang tawo kinsa parehas nimo og mga hilig.

Steven H., edad 12, New Mexico, USA

Tinguhaa ang Kahayag

Akong gitinguha ang suporta, pagdasig, ug gugma sa Langitnong Amahan ug sa Espiritu Santo aron mohatag kanako og kalinaw, paglaum, ug kalig-on kon mamalandong, mag-ampo, ug magbasa sa mga kasulatan. Sama sa giingon sa 3 Nephi 11:11, si Jesukristo mao “ang kahayag ug kinabuhi sa kalibutan.” Siya miabut aron sa pag-iway sa tanang kangitngit.

Andrea B., edad 18, Zulia, Venezuela

Motabang sa mga Higala ug Pamilya

Kon mobati ko nga nag-inusara, ganahan ko nga modalit og tabang sa akong mga higala ug pamilya, makapalipay gayud kini kaayo kanako. Motan-aw ko sa mga panalangin sa akong kinabuhi ug magpasalamat sa Langitnong Amahan kon unsa ka dako ang Iyang nahatag ngari kanako!

Talli N., edad 16, Oregon, USA

Hinumdumi ang Plano sa Dios

Hibaloi nga pinaagi sa plano sa Dios, dili gayud kita kinahanglan nga mobati og kamingaw. Ang Espiritu Santo kanunay nga nagauban kanato, ug ang Dios nasayud kon unsay atong gipanglimbasugan. Ang Ginoo nakasinati sa matag pagsulay ug pakigbisog nga inyong giatubang. Usa sa labing importanting butang nga atong mabati dinhi sa mortalidad mao ang kalipay, apan dili kita makaangkon og kalipay kon walay kasub-anan (tan-awa sa 2 Nephi 2:11). Pag-ampo sa Dios ug pangayo og tabang; Siya dili mopakyas ni bisan kinsa kanato.

Brock S., edad 17, Utah, USA

Salig sa Ginoo

Ang pagbiya sa panimalay aron moanhi sa Brazil alang sa akong misyon lisud. Naglisud gani ko sa pagsulti sa pinulongan! Apan akong nakat-unan nga kon ang Espiritu sa Ginoo maga-uban kaninyo, kamo dili gayud mobati og kamingaw. Siya nakaila kaninyo, ug kanunay nga motabang ninyo. Salig Kaniya!

Elder Joseph Tolen, edad 20, Brazil Campinas Mission

“Ang kasakit sa kamingaw ingon nga kabahin sa mortal nga kasinatian. Apan ang Ginoo sa Iyang kalooy mihimo niini aron nga kita dili gayud kinahanglan nga mosagubang sa mga hagit sa mortalidad nga mag-inusara. … Kita gisaaran sa makanunayon nga pakig-uban sa ikatulo nga sakop sa Dios nga Kapangulohan ug mao nga dunay kahigayunan sa pagdawat og pagpadayag alang sa atong mga kinabuhi. Kita wala mag-inusara!”

Sheri L. Dew, kanhi magtatambag sa Kinatibuk-ang Kapangulohan sa Relief Society “We Are Not Alone,” Liahona, Ene. 1999, 112.

Unsa May Imong Gihunahuna?

“Unsay akong buhaton kon ako naghinulsol na apan dili makahunong sa paghunahuna kon unsay akong nabuhat nga sayop?”

Isumiter ang inyong tubag ug, kon gusto, usa ka high-resolution nga litrato inig ka Nobyembre 15, 2020, sa liahona.ChurchofJesusChrist.org (i-klik ang “Submit an Article or Feedback”).

Ang mga tubag tingali i-edit alang sa gitas-on o sa pagklaro. Ang gimantala nga mga tubag gituyo alang sa tabang ug panglantaw, dili isip opisyal nga mga pamahayag sa doktrina sa Simbahan.

• Direkta sa Punto