Kon ako adunay mga problema sa kahimsog sa pangisip kaniadto, makaserbisyo pa ba ko og misyon?

Oo. Tanan nga “adunay tinguha sa pag-alagad sa Dios … gitawag ngadto sa buhat” (Doktrina ug mga Pakigsaad 4:3). Asa kita nagserbisyo dili kaayo importante kay sa giunsa nato pagserbisyo. Ug si bisan kinsa nga naghunahuna sa pagserbisyo og misyon kay ikonsiderar ang ilang pisikal ug mental nga kahimsog.

Kon kamo adunay tinguha sa pagserbisyo og misyon, pakig-istorya sa inyong bishop. Makatabang siya kaninyo sa pagsugod sa proseso sa pag-apply. Kabahin niana nga proseso maglakip sa pagkonsulta sa mga doktor ug sa ubang mga propesyonal, ingon man usab sa mga lider sa Simbahan ug sa mga ginikanan. Kini nga mga pagkonsulta wala gihimo aron sa pagtimbang-timbang kon kamo “angayan” alang sa Ginoo apan aron sa pagtabang og tino sa labing maayong mga opsyon alang sa inyong pagserbisyo.

Ang usa ka tawag sa pagserbisyo mahimong moabut ni bisan kinsa nga adunay tinguha sa pagserbisyo. Ang buluhaton nga inyong madawat sa pagserbisyo sa usa ka piho nga dapit o sa usa ka piho nga paagi magdepende sa daghang hinungdan. Ang mga tawo nga adunay mga problema sa panglawas (lakip na ang kahimsog sa pangisip) usahay misulay sa pagtago niini nga impormasyon sa proseso sa pag-apply, naghunahuna nga kana makatabang kanila nga makadawat sa buluhaton nga ilang gusto. Apan kon kamo hingpit nga matinuoron mahitungod sa inyong medikal nga kasaysayan (lakip na ang kahimsog sa pangisip), ang Ginoo mopanalangin kaninyo. Siya nagdahum nga buhaton ninyo ang tanan nga inyong mahimo aron mapalambo ang inyong panglawas. Ug daghan sa medikal nga suporta nga inyong madawat sa panimalay mahimong mapadayon sa misyon.