Giunsa Nako sa Pagkaplag og Pagkaayo gikan sa Sekswal nga Pang-abuso
Mipuyo ko sa usa ka makalilisang nga panghitabo. Apan sa wala madugay akong nasayran nga atol sa akong kinalisuran nga mga higayon, ako makasalig sa akong Manluluwas.
Litrato gikan sa Getty Images, gigamit alang sa mahulagwayon nga mga katuyoan, giposing sa modelo
Ang akong makalilisang nga panghitabo nagsugod sa dihang siyete anyos pa ko ug ang akong inahan nagminyo og usab. Ganahan kaayo kami sa akong bag-ong ama-ama. Mabination siya ug maayong mihaum sa among pamilya. Ako mibati nga luwas gayud kuyog niya. Maayo kaayo ang tanan hangtud usa ka adlaw, sa dihang ang tanan dunay daghang gibuhat, iyaha kong giabuso sa sekswal nga paagi.
Wala ko nakasabut kon unsay iyang gibuhat kanako. Mibati ko nga nahadlok, naglibug, ug naulaw gayud. Apan ako hilabihan nga nahadlok sa pagsulti ni bisan kinsa. Naghunahuna ko nga kini moguba sa bag-ong nakaplagan nga kalipay sa akong pamilya ug nga walay motuo gihapon kanako. Busa nakahukom ko nga magpabilin nga hilum.
Gipasakitan ko niya niadtong usa lang ka higayon, apan ang panumduman sa pag-abuso kanunay nga nakapabalaka sa akong hunahuna. Ako sa katapusan nahimong matahapon [paranoid] kaayo nga ang usa ka tawo makakita sa akong kasakit ug mabisto ang akong sekreto nga ako naningkamot sa pagtago sa kamatuoran pinaagi sa pagkahimong maayong higala sa akong ama-ama. Siya mabination kaayo kanako, ug ako sa pagkatinuod nagsugod nga maganahan kaniya pag-usab.
Apan dayon migrabe ang sitwasyon. Sa dihang si Mama nagsugod og trabaho sa gabii, ang akong ama-ama misugod sa pag-abuso kanunay nako. Mibati ko nga wala gayuy mahimo. Gusto kong mosulti, apan daghan ang ganahan sa akong ama-ama, ug naghunahuna ko nga ang tanan modapig kaniya. Mao nga sa gabii sa dihang nag-inusara ko, nangamuyo ko sa Dios sa pagtabang kanako sa pagtago sa akong sekreto.
Pagsulti
Usa ka adlaw ang pag-abuso sa katapusan mihunong. Wala koy ideya kon ngano. Bisan og wala na siya nagpasakit kanako, kanunay kong mibati nga hugaw ug naulaw. Gikasilagan nako ang akong kaugalingon. Usahay gidebatihan gani nako kon ang kamatayon mahimong mas sayon kay sa akong reyalidad. Gusto pa gihapon ko nga mosulti, apan nahadlok ko kon unsay sangputanan sa kamatuoran.
Dayon usa ka Dominggo diha sa simbahan sa dihang 14 anyos ko, naminaw ko sa usa ka leksyon mahitungod sa paghimo og dagkong mga desisyon. Ang akong magtutudlo miawhag kanamo sa pagpuasa ug pag-ampo ug misaad nga ang Dios molig-on kanamo sa pagbuhat sa sakto nga butang. Human sa pagsimba, kanunay kong naghunahuna mahitungod sa unsay iyang gisulti. Naghunahuna ko kon mangutana ko, ang Dios ba gayud motabang kanako sa pagsulti?
Pagkasunod adlaw nagpuasa ko alang sa kaisug sa pagsulti ni Mama mahitungod sa pag-abuso. Dili ko makapokus atol sa pag-eskwela tungod ang tanan nakong gihunahuna kay mahitungod kon sa unsang paagi siya mo-react. Sa dihang naabot ko sa balay, lain kaayo akong gibati. Nag-ampo ko pag-usab alang sa kalig-on, apan wala ko mobati nga andam sa pagsulti kaniya.
Nianang gabhiona, miduol ko ni Mama sa dihang nagluto siya og panihapon. Wala ko masayud unsay isulti, apan sa dihang mitan-aw ko sa iyang mga mata, ako nakakaplag og kaisug sa pagsugod lang og sulti. Sa dihang misugod ko, ang tanan nga akong gitago sulod sa katuigan migawas.
Si Mama ug ako naglingkod lang sa sopa ug kami nanghilak. Pagkahuman, gikontak namo ang among presidente sa branch ug gitawagan ang pulis. Ang akong ama-ama nanubag sa unsay iyang gibuhat kanako, ug ako gihatagan sa panalipod nga akong gikinahanglan—dili na gayud ako makakita kaniya pag-usab.
Ang Dalan padulong sa Pagkaayo
Nianang panahona, lisud ang pagsaysay og usab sa akong kasinatian ngadto sa mga awtoridad ug ang pagpangutana sa akong mga higala kon asa ang akong ama-ama, apan uban sa suporta sa akong pamilya, wala na ako mag-inusara. Magkauban, kami nagkahiusa sa usa ka bag-ong tema sa pamilya: “Mahimo ko ang tanang butang pinaagi [ni Kristo] nga nagapalig-on kanako” (Mga Taga-Filipos 4:13). Ang among kabanay mitanyag usab sa ilang gugma ug suporta ug, paglabay sa panahon, kami magkauban nga nagsugod sa pagkaayo.
Si Mama ug ako mitambong og propesyonal nga pagtambag, nga usa ka dako nga tabang! Ang akong magtatambag mao gayud ang akong gikinahanglan. Gitabangan ko niya nga makasabut sa tanang mga emosyon nga akong gibati ug gitabangan ko niya nga makasugakod sa akong dili maayo nga mga panumduman. Wala gayud ako makaamgo kon unsa ka sakit ang akong gisinati hangtud nga ako misugod sa pagbati nga naayo pag-usab.
Wala ko maghunahuna nga ang kasakit mawala tungod lang kay misulti ko, apan wala usab ako makaamgo kon unsa ka taas sa panahon (ug pailub) ang gikinahanglan niini aron mamaayo. Sa dugay nga panahon, ako mibati nga walay bili. Gikinahanglan nakong kat-unan pag-usab ang paghigugma sa akong kaugalingon.
Nakaplagan nako ang tumang kalinaw samtang ako midangup sa akong Manluluwas ug sa akong Langitnong Amahan. Ang pag-ila nga Sila nasayud gayud kon unsay akong gibati naghatag kanako og kusog ug paglaum. Ako misalig Kanila atol sa kinalisuran nga mga higayon. Paglabay sa panahon ang mga panumduman misugod sa pagkawala, ug gibati gayud nako ang kalinaw pinaagi sa gugma sa Manluluwas.
Usa sa labing magantihon nga bahin sa proseso sa pagkaayo mao ang pag-ila nga ako diay adunay usa ka mahayag nga kaugmaon. Niadtong ako giabuso, ako dili gani makahunahuna nga makabaton og usa ka normal nga kinabuhi. Ako mibati nga permanenteng nadaut. Apan pinaagi sa tabang ug pagkaayo, ako nakakaplag og mga butang nga akong gilauman nga mahitabo. Nagsugod ko sa pagsulti sa akong istorya ngadto sa ubang mga babaye nga nagsinati og kasakit, ug gani mihukom ko nga moserbisyo og misyon. Ang pagpaambit sa akong pagpamatuod ngadto sa uban nakapalig-on kanako.
Ang gibuhat sa akong ama-ama kanako wala nagdeterminar sa akong bili o kon si kinsa ako. Siya sa kahangturan nakapausab sa akong kinabuhi, apan akong gipili nga gamiton ang akong kasinatian sa pagtabang sa uban. Lisud gihapon ang ubang mga adlaw, apan sa tanang butang, ang Ginoo mipalig-on kanako, ug ako nasayud nga Siya mopadayon sa pagtabang kanako. Ako nausab gikan sa usa ka biktima ngadto sa usa ka nakalingkawas.