Kon Kamo usa ka Biktima sa Pang-abuso

Unsa Ang Pang-abuso?

Ang pag-abuso mao ang pagpasagad o pagmaltrato sa uban (sama sa usa ka bata, tigulang nga tawo, baldado nga tawo, o ni bisan kinsa) sa paagi nga makahatag og pisikal, emosyonal, o sekswal nga kadaut. Kini supak sa mga pagtulun-an sa Manluluwas.

“Ang baruganan sa Simbahan mao nga ang pang-abuso dili ibaliwala sa bisan unsa nga klase” (General Handbook: Serving in The Church of Jesus Christ of Latter-day Saints [Kinatibuk-an nga Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw] [2020], 38.6.2). Ang pang-abuso naglapas sa mga balaod sa Dios ug mahimo usab nga usa ka kalapasan sa mga balaod sa katilingban.

Lain-lain nga Matang sa Pang-abuso

Pisikal nga Pang-abuso: Gituyo nga agresibo o bayolente nga kinaiya sa usa ka tawo ngadto sa lain nga moresulta sa lawasnong kadaut.

Sekswal nga Pang-abuso: Dili gusto nga sekswal nga kalihokan o kontak, nga ang mga nakasala mogamit og pagpamugos, maghimo og mga panghulga, o magpahimulos sa mga biktima nga dili makahimo sa paghatag og pagtugot. Ang tanang sekswal nga kalihokan tali sa usa ka hamtong ug sa usa ka bata kay pang-abuso bisan unsa pa ang pagtugot.

Berbal o Emosyonal nga Pang-abuso: Usa ka timailhan nga kinaiya diin ang usa ka tawo tinuyo ug balik-balik nga moataki sa usa ka tawo sa dili pisikal nga mga paagi, sama sa mapintas nga mga pulong, pagpanghadlok, manipulasyon, o pagpakaulaw. Kini makaingon sa magkaubos nga pagbati sa bili sa kaugalingon ug dignidad. Bisan og kini dili pisikal, kini nga matang sa pang-abuso makadaut sa kinatibuk-an nga mental ug emosyonal nga kaayohan sa usa ka tawo.

Unsaon sa Pagpangayo og Tabang

Ang Ginoo nagdahum kanato nga mobuhat kutob sa atong mahimo sa pagpugong sa pang-abuso ug sa pagpanalipod ug pagtabang niadtong kinsa nabiktima sa pang-abuso. Walay usa nga gidahuman nga molahutay sa abusadong kinaiya. Kon kini nahitabo karon o nahitabo dugay na nga panahon, makakita kamo og mga kapanguhaan sa pagtabang kaninyo sa abuse.ChurchofJesusChrist.org.