Mga Baruganan sa Pagpangalagad

Pagpangalagad pinaagi sa Programa sa Kabataan ug Kabatan-onan

Ang pagdapit sa uban nga molambo ug ang pagtabang kanila samtang magpadayon mao ang diwa sa pagpangalagad.

Litrato pinaagi ni Tom Garner

Adunay daghang oportunidad alang sa pagpangalagad pinaagi sa programa sa Kabataan ug Kabatan-onan. Tingali kamo adunay inyong kaugalingong mga bata o mga batan-on sa panimalay. Tingali kamo usa ka lider sa programa o nangalagad sa mga pamilya nga adunay mga bata ug mga batan-on. O tingali kamo nakaila og pipila ka mga bata ug mga batan-on (siguro halos kitang tanan nalakip niini). Bisan unsa tingali ang inyong sitwasyon, adunay daghang paagi sa paggamit sa programa o sa mga baruganan niini aron sa pagpanalangin sa kinabuhi sa uban.

Pagpalambo sa atong Kaugalingon nga MagkaubanAng sentro

sa Kabataan ug Kabatan-onan mao ang usa ka pokus nga mosulay sa matag adlaw nga mas mahisama sa Manluluwas, kinsa hingpit nga nangalagad. Daghan niadtong kinsa miapil sa programa nakakat-on nga kon kamo mas mouswag diha sa lain-laing mga aspeto sa inyong kinabuhi, kamo mas mahimong andam sa pagtabang o sa pagpangalagad sa uban.

Apan sa programa sa Kabataan ug Kabatan-onan, ang pagpanalangin sa uban dili na kinahanglang maghulat hangtud nga kamo makakat-on og usa ka butang. Ang buhat sa pagkat-on mismo mohatag og mga oportunidad sa pagpangalagad.

Alang sa usa ka batan-ong lalaki nga ginganlan og Prophet nga nagpuyo sa Ghana, ang pagtakda og tumong sa Kabataan ug Kabatan-onan sa pagkat-on unsaon sa pagtukar sa piano mao lamang ang sinugdanan. “Akong tumong ang pagtabang usab sa ubang mga tawo nga masayud sa unsay akong gikat-unan,” miingon si Prophet.

Bisan og siya dili pa usa ka magtutudlo, ang iyang tumong milambo na ngadto sa usa ka butang nga mas dako pa kay sa iyang gihunahuna. Adunay 50 na ka estudyante karon nga nagkuha og mga klase sa piano sa meetinghouse uban ni Prophet. Ug kinsa man ang nagtudlo ni Prophet ug niadtong ubang 50 ka estudyante? Sila si Alexander M. ug Kelvin M., parehong 13 anyos. “Gusto namong mopakita og mga buhat sa pagkamabination ngadto sa ubang tawo,” miingon si Kelvin.

Tulo ka adlaw matag semana ang duha ka batan-on nagtudlo og sukaranan nga mga leksyon sa piano nga libre ngadto sa tanan nga moadto og magkat-on. Dihay usa ka nadugang nga benepisyo ngadto sa mga leksyon sa piano. Pipila sa mga estudyante nga napaila ngadto sa Simbahan pinaagi sa mga leksyon sa piano sa wala madugay nagtuon sa ebanghelyo ug mihukom nga magpabunyag.

Samtang kita mohimo og mga paningkamot sa pagpalambo sa atong kaugalingon, kita makapangalagad ngadto sa uban pinaagi sa pagdapit kanila sa pag-apil kanato.

Litrato pinaagi ni Jonas Rebicki

Usa ka Madaugon nga Resipe alang sa Pagpangalagad

Isip presidente sa Primary sa stake, si Sabrina Simões Deus Augusto sa Curitiba, Brazil, nakakita kon sa unsang paagi ang personal nga mga aspeto sa kalamboan sa programa nagpanalangin sa mga bata ug mga batan-on sa iyang stake. Apan nakita usab niya ang daghang mga paagi sa paggamit sa unsay iyang nakat-unan mahitungod sa personal nga kalamboan sa iyang tahas isip usa ka tigpangalagad nga sister.

“Kon ako magpalambo og usa ka talento,” miingon si Sister Augusto, “Ako makagamit niana nga talento sa pagpanalangin sa usa ka tawo nga akong gipangalagaran.”

Si Sister Augusto mitudlo sa usa sa mga sister nga gi-assign niya kon unsaon sa paghimo og tsokolate nga mga truffle. Kana nga sister naghimo ug namaligya na og mga truffle karon aron madugangan ang kinitaan sa iyang pamilya. “Mga bulan ang milabay, napanalanginan ko sa dihang ang laing sister nagtudlo kanako unsaon sa paghimo og pan nga may dugos nga pwede nakong mabaligya,” miingon si Sister Augusto. “Ang pagpalambo ug pagpaambit sa atong mga talento makapanalangin sa kinabuhi sa usag usa ug makapalig-on sa atong relasyon isip tigpangalagad nga mga sister.”

Sa Unsang Paagi ang Programa sa Kabataan ug Kabatan-onan Makatabang Kanimo sa Pagpangalagad?

1. Dapita ang uban sa pag-apil sa programa sa Kabataan ug Kabatan-onan.

   Mahimo ninyong dapiton ang mga pamilya sa mga batan-on ug sa mga bata nga inyong gipangalagaran sa pag-apil sa programa sa Kabataan ug Kabatan-onan. Sila mahimong interesado sa pag-apil sa mga kalihokan, sa personal nga kalamboan, o gani sa mga aspeto sa programa bahin sa pagtuon sa ebanghelyo. (Alang sa dugang nga impormasyon mahitungod sa pagpangalagad pinaagi sa Dali, Sunod Kanako, tan-awa sa “Pagpangalagad pinaagi sa Dali, Sunod Kanako,” diha sa Septyembre 2020 nga Liahona.)

2. Suportahi ang ilang mga tumong.

   Isip usa ka tigpangalagad nga brother o sister ngadto sa mga pamilya nga adunay mga batan-on, kamo anaa sa natural nga posisyon sa pagsuporta sa mga tumong nga tingali ilang gipaningkamutan diha sa Kabataan ug Kabatan-onan. Samtang personal ang ilang mga tumong, kon kamo nasayud kon unsa ang ilang interes, mahimo kamong motanyag sa pagtabang sa nagkadaiyang mga paagi. Mahimong pinaagi kini sa pagpangita og mga suplay sa art nga ilang gipangita, pagsilbi isip usa ka maghuhukom sa ilang paghimo og cookie, o mahimong usa ka tigtambag sa usa ka butang diin kamo adunay kahibalo. Kahibalo ba kamo unsaon sa pag-ilis sa asyete sa usa ka sakyanan? Pagtahi sa nagisi nga sinina? Eksperto ba kamo sa pag-interbyu para sa mga trabaho? Mahimong motanyag kamo sa pagpaambit sa inyong kahibalo o mga kahanas kon interesado sila.

3. Dapita ang uban nga mahimong kabahin sa inyong personal nga kalamboan.

   Ang personal nga kalamboan wala gitagana alang sa mga bata ug mga batan-on. Kamo mismo makaapil sa programa bisan pila pa ang inyong edad. Samtang kamo mogahin og panahon sa pagpalambo sa espiritwal, sosyal, pisikal, ug intelektwal nga mga bahin [area] sa inyong kinabuhi, kamo mahimong mas andam sa pagpangalagad sa mga indibidwal, bisan kinsa pa ang inyong mahimamat. Ug sama ni Prophet didto sa Ghana, kamo makapanalangin sa uban pinaagi sa pagdapit kanila sa pag-apil uban kaninyo, bisan kon kana mao ang pag-organisar og mga leksyon sa piano, pag-adto sa usa ka klase sa pag-ehersisyo, o pagkat-on og pinulongan nga magkauban.

4. Himoa nga tumong ang pagpangalagad.

   Ikonsiderar ang paggahin og panahon matag adlaw sa pagpangalagad. Mahimong pinaagi kini sa pagpadala og text o paghapit aron mangumusta o pag-organisar og usa ka pagkita-kita. Kini mahimong maglakip sa paggahin og panahon sa pagsulat sa mga adlawng natawhan diha sa kalendaryo niadtong inyong mga gipangalagaran o ang pagsunod kanila sa social media aron mahibaloan kon unsa ang ilang interes o kon unsa ang ilang mga kalihokan bag-ohay lang. Bisan ang paggahin lamang og lima ka minuto sa paghunahuna kon unsa ang gikinahanglan sa usa ka tawo mahimong mosangput ngadto sa dinasig nga mga ideya nga makahimo og kalainan.

Sa Tinagsa-tagsa

“Ang timailhan sa tinuod ug buhi nga Simbahan sa Ginoo kanunay mao ang organisado, gidumala nga paningkamot sa pagpangalagad ngadto sa indibidwal nga mga anak sa Dios ug ilang mga pamilya. Tungod kay kini Iyang Simbahan, kita isip Iyang mga sulugoon mangalagad ngadto sa usa, sama sa Iyang gibuhat.”

Presidente Russell M. Nelson,“Ang Pagpangalagad uban sa Gahum ug Katungod sa Dios,” Liahona, Mayo 2018, 69.

Ipaambit ang Inyong mga Kasinatian

Ipadala kanamo ang inyong mga kasinatian sa pagpangalagad o kon kamo ang gipangalagaran. Adto sa liahona.ChurchofJesusChrist.org ug i-klik ang “Mosumiter og usa ka Artikulo o Feedback.”