“Kamo ba Adunay Asul nga Basahon nga adunay mga Letrang Inskripsyon nga kolor Bulawan?”
Paglabay sa panahon human gilabay ang basahon, ako nakuryuso nga makahibalo kon unsa ang sulod niini.
Paghulagway pinaagi ni Greg Newbold
Sa miaging katuigan, nakadawat ko og usa ka asul nga basahon nga adunay mga letrang inskripsyon nga kolor bulawan gikan sa mga misyonaryo nga nagserbisyo sa base sa militar diin ako nagbansay alang sa akong trabaho sa Navy sa Estados Unidos.
Samtang nagsugod ko sa pagbasa sa basahon, usa ka tawo ang misulti kanako nga bakak kini tungod kay kini gikopya gikan sa Biblia. Kini nakapahimo kanako sa pagduda sa katinuod sa basahon, apan gitagoan gihapon nako kini. Mibasa ko og gamay niini, gibutang kini sa ilawom sa akong seabag, ug dayon nakalimot na niini.
Kapin usa ka tuig ang milabay, nakahukom ko nga limpyohan ang akong seabag. Nakit-an nako ang basahon apan nawad-an na og bisan unsa nga interes niini, mao nga ako kining gilabay. Apan paglabay sa panahon, nahimo kong kuryuso mahitungod kon unsa ang sulod niana nga asul nga basahon nga adunay mga letrang inskripsyon nga kolor bulawan. Ako karon nagtuo nga kini nga pagbati naggikan sa Espiritu, “nga nagtultol sa pagbuhat og maayo” (Doktrina ug mga Pakigsaad 11:12).
Niadtong 2005, usa ka bag-ong higala ang midapit kanako sa pagpaminaw sa mga misyonaryo. Sa sinugdanan, ako adunay mga pangutana ug mga pagduha-duha mahitungod sa unsay ilang gitudlo, apan masaligon ang mga misyonaryo ug mihatag og mga tubag nga nasabtan nako.
Sa dihang nakaamgo ko nga kini nga mga misyonaryo sama sa akong mga nahimamat pipila ka tuig ang milabay, matinguhaon kong nangutana kanila, “Kamo ba adunay asul nga basahon nga adunay mga letrang inskripsyon nga kolor bulawan?”
“Oo, aduna kami!” mitubag ang usa kanila. “Gitawag kini nga ang Basahon ni Mormon!”
Mahinamon ko nga magkanaa sa Basahon ni Mormon pag-usab. Sa pagkatinuod, mahinamon kaayo ko nga gibasa nako kini og sobra sa kausa sa wala pay duha ka semana! Samtang nagbasa ug nag-ampo ko, nasayran nako nga kini mao ang pulong sa Dios.
Si Elder Rubén V. Alliaud sa Seventy miingon og usa ka butang sa kinatibuk-ang komperensya nga may kalabutan sa akong kasinatian sa Basahon ni Mormon: “Bisan kinsa nga tigbasa nga mopasalig sa usa ka sinsero nga pagtuon [sa Basahon ni Mormon], uban sa diwa sa pag-ampo, dili lamang makakat-on mahitungod ni Kristo apan makakat-on gikan kang Kristo —ilabi na kon sila mohimo sa desisyon nga ‘mosulay sa hiyas sa pulong’ [Alma 32:5] ug dili kini isalikway dayon tungod sa pagpihig sa pagkawalay pagtuo pinaagi sa gisulti sa uban bahin sa mga butang nga wala pa gayud nila mabasa.”1
Pinaagi sa pagbasa sa Basahon ni Mormon, pag-ampo, ug pagsalig sa Espiritu, ako nakakita sa mahinungdanon nga mga butang nga nahinabo sa akong kinabuhi.