Atong Paglaum, Atong Kahayag, Atong Kalig-on

Ni Elder Ronald A. Rasband

Sa Korum sa Napulog Duha ka mga Apostoles

Gikan sa usa ka Gabii uban sa usa ka General Authority nga sibya alang sa mga magtutudlo og relihiyon nga gipahigayon niadtong Peb. 8, 2019.

Sa dihang giordinahan ko nga usa ka Apostol, ang minahal nga si Presidente Thomas S. Monson (1927–2018) miingon nga kinahanglan akong mahimong linain nga saksi sa ngalan ni Jesukristo sa tibuok kalibutan. Wala nako gipakasayon kana nga responsibilidad. Gitun-an nako pag-ayo ang mga kasulatan, miila sa Ginoo pinaagi sa Iyang mga ngalan ug mga titulo. Kining tanan nga akong ipaambit kaninyo gikan sa mga bersikulo sa kasulatan nga nagpahinumdom kanato sa atong paglaum nga anaa Kaniya.

Siya mao ang Kalauman sa Israel (Jeremias 17:13), Masidlak nga Bitoon sa Kabuntagon (Pinadayag 22:16), Maayo nga Magbalantay (Doktrina ug mga Pakigsaad 50:44), Magtatambag (Isaias 9:6; 2 Nephi 19:6), Prinsipe sa Kalinaw ( Isaias 9:6; 2 Nephi 19:6), Manluluwas (Mga Taga-Roma 11:26), Kahayag alang sa Kalibutan (Juan 8:12), ug Labawng Sacerdote sa mga maayong butang nga nanagpangabut (Mga Hebreohanon 9:11). Siya Gamhanan sa pagluwas (Alma 34:18; Doktrina ug mga Pakigsaad 133:47) ug ang Usa kinsa aduna sa tanan nga gahum (Doktrina ug mga Pakigsaad 61:1).

Ang impluwensya, tatak, ug tabang ni Kristo malukpanon. Anaa Siya kon kita manlimbasug ug maningkamot sa pagpadayon. Ug kon kita masayop, ang Iyang “kahayag nga nagdan-ag sa kangitngit” (Doktrina ug mga Pakigsaad 6:21) mas labaw nga nagdan-ag. Gimahal kita Niya sa atong labing nindot ug sa atong labing lisud nga panahon.

Ang pagkahimong disipulo ni Jesukristo dili pagtag-an-tag-an sa unsay gusto Niya nga atong buhaton. Ang iyang dalan klarong gimarkahan sa Iyang mga lakang. Samtang mosunod kita Kaniya, makapalambo kita og gugma sa unsay Iyang gihigugma. Samtang atong bag-ohon ang atong mga pakigsaad Kaniya matag semana sa pag-ambit sa balaan nga sakramento, molambo ang atong pagsabut Kaniya isip ang Manunubos sa kalibutan (Doktrina ug mga Pakigsaad 93:9), ang Espiritu sa Kamatuoran (Doktrina ug mga Pakigsaad 93:9), ug ang Pulong (Doktrina ug mga Pakigsaad 93:8).

Minahal nga mga higala, mao kana ang Manluluwas nga akong nailhan, nga akong gimahal ug gitahud sa tibuok nakong kasingkasing. Gikan sa kinahiladman sa akong kalag mopamatuod ako Kaniya ug sa Iyang kaayo ug kalooy. Siya misaad, “Kamo akong mga higala, ug kamo adunay kabilin uban kanako” (Doktrina ug mga Pakigsaad 93:45).

Si Jesukristo mao kanunay ang tubag sa mga problema ug mga hagit nga kabahin niining mortal nga kasinatian. Sa pagsabut sa Iyang misyon ug sa Iyang ebanghelyo, ang atong gugma alang Kaniya ug ang atong pagtuo ug pagsalig diha Kaniya mohatag kanato og kalig-on.