Siya Atoa Gihapon
Ang akong bana ug ako magpasilyo, apan kining sagrado nga ordinansa mas dako pa og kahulugan kay sa kanamong duha.
Paghulagway pinaagi ni Joshua Dennis
Human sa pito ka tuig nga naglaum ug nagpaabut para makaanak, ang akong bana ug ako sa katapusan napanalanginan og usa ka anak nga babaye. Si Alicie mao ang kahayag sa among kinabuhi, apan siya nabuhi lang og lima ka bulan sa wala pa namatay tungod sa pneumonia.
Mao kadto ang kinalisuran nga kasinatian sa akong kinabuhi. Matag adlaw mopauli ko sa panimalay gikan sa trabaho ug molingkod ug maghilak. Ang akong mga in-law [kaliwat sa akong bana] sa kasagaran mitupad kanako ug mihatag nako og kalig-on. Mipadayon ko sa pag-ampo alang sa laing anak, apan walay miabut. Naguol ko og maayo.
Ang akong mga in-law misugod sa pag-awhag sa akong bana ug nako sa pagbyahe ngadto sa Suva Fiji Temple aron magpasilyo. Wala pa gayud kami makaadto sa templo, ug mihukom kami nga mao kini ang labing maayong paagi aron makakita kami og paglaum ug pagkaayo.
Walay butang nga takus makaandam nako sa unsay akong gibati nianang adlawa! Nasayud ko nga ang akong bana ug ako mag-uban nga masilyo sa kahangturan. Kini nga kahibalo mipuno kanako sa pasalamat ug gugma. Apan wala nako nasabti nga kining sagradong ordinansa mas dako pa og kahulugan kay sa kanamong duha.
Didto sa templo, akong nakat-unan nga si Alicie mabugkos ngari kanamo. Nakahilak ko og luha sa kalipay samtang nahibaloan nako kining sagrado nga doktrina. Ang among anak maamoa na hangtud sa kahangturan! Mopamatuod ko nga ang Dios naghatag sa tanang butang nga among gikinahanglan alang sa kalipay diha sa Iyang balaan nga balay.
Sa mga tuig sukad niana, ang akong bana ug ako napanalanginan og usa ka anak nga lalaki ug tulo ka sinagop nga mga bata. Apan dili gayud kami makalimot ni Alicie. Tungod sa mga ordinansa sa templo, ang among anak nga babaye kabahin na sa among pamilya hangtud sa kahangturan.
Kon makahimamat ko og usa ka tawo nga nawad-an og usa ka anak, mabati nako ang ilang kasakit. Apan nasayud usab ko nga kining kasakit dili ang katapusan. Tungod sa pagkawala ni Alicie, ingon man sa pagsinati sa uban pang mga pagsulay, nasayud ko nga ang Dios anaa alang kanako. Kon mawad-an ko og kadasig o magmulo mahitungod sa mga panghitabo, nasayud ko nga ang Dios anaa kanunay.
Nasayud ko nga akong makita si Alicie pag-usab, ug kana nga kamatuoran nagpadayon sa pagpuno sa akong bana ug kanako sa tumang kalipay.