Inadlaw-adlaw nga Pagserbisyo ni Marta
Kini nga inahan ug anak nga babaye naningkamot sa pagpuyo sa ebanghelyo nga magkauban. Ug si Marta nakatuman niini pinaagi sa pagserbisyo sa iyang inahan sa talagsaong mga paagi.
Mga litrato pinaagi ni Leslie Nilsson
Si Marta usa ka 11 anyos nga taga Portugal, ug sama sa daghang babaye nga kaedad niya, ganahan siya nga mogahin og panahon uban sa iyang mga higala, mokaon og pagkaon, ug magdula sa iyang mga munyeka. Malingaw usab siya sa paggahin og panahon uban sa iyang inahan. Apan ang pagpuyo uban sa iyang inahan nagpasabut nga si Marta magpuyo nga medyo lahi kay sa ubang mga bata.
Ang inahan ni Marta, si Sonia, natawo nga adunay pisikal nga kakulangan nga nakapalisud niya sa paglakaw. Dili siya hingpit nga paralisado, apan nagkinahanglan siya og walker aron makalakaw-lakaw. Dili siya makahimo sa pagsinina sa iyang kaugalingon, sa pagkaligo sa iyang kaugalingon, o sa pagpahimutang sa iyang kaugalingon sa higdaanan. Kini nakapahimong lisud alang kaniya nga magpuyo nga mag-inusara. Si Marta nakahimo sa pagserbisyo ni Sonia sa pipila na ka tuig pinaagi sa pagtabang kaniya sa mga butang nga dili niya mahimo sa iyang kaugalingon.
“Akong gipabiling limpyo ang mga dapit diin ako magdula o magtrabaho aron ang akong mama mas sayon nga makalakaw-lakaw,” miingon si Marta. “Ako usab mohunong-hunong gikan sa pagdula aron ako adunay panahon sa pagsusi sa akong mama ug motino kon siya nagkinahanglan og tabang. Kon ako nagdula ug siya motawag, moadto ko diha-diha dayon tungod kay kini tingali usa ka dinalian nga butang.”
Apan si Sonia naningkamot sa pagtugot ni Marta nga magpuyo nga normal kutob sa iyang mahimo. Kon si Sonia wala magkinahanglan og bisan unsa nga tabang, iyang gisigurado nga si Marta adunay panahon sa pagdula uban sa iyang mga higala.
Pagpuyo sa Ilang Hugot nga Pagtuo
Si Marta adunay oportunidad sa pagpuyo sa ebanghelyo matag adlaw pinaagi sa pagserbisyo sa iyang inahan. Daghan siya og mga responsibilidad nga kasagaran wala sa ubang mga bata. Sama pananglit, momata siya og sayo aron tabangan ang iyang inahan nga mag-andam para sa trabaho sa dili pa moeskwela. Kon wala ang tabang ni Marta, si Sonia dili makalakaw-lakaw o makaadto sa trabaho kada adlaw.
Si Marta ug si Sonia kuyog usab nga mosimba. Si Sonia nabunyagan sa dihang otso anyos pa siya, mao nga si Marta nagtubo sa Simbahan. Si Sonia nagtudlo kang Marta mahitungod sa kaimportante sa ebanghelyo matag adlaw. Usa ka paagi nga iyang gihimo kini mao ang pagbutang og daghang litrato ni Jesukristo sa ilang panimalay.
“Nasayud ko nga ang Dios buhi ug nga tinuod si Jesukristo,” Si Sonia miingon. “Ug gusto ko nga ang tanan nga moanhi sa akong balay mahibalo nga ang hugot nga pagtuo importante kaayo para kanako. Importante usab alang kanako ang pagtudlo niini ngadto kang Marta aron modako siya uban niini nga kahibalo kabahin ni Jesukristo.”
Si Marta misunod sa unsay gitudlo kaniya sa iyang inahan ug nagpadayon sa pagkat-on og dugang mahitungod sa ebanghelyo sa iyang kaugalingon. Usa ka paagi nga ganahan siya nga makat-on mao ang pinaagi sa pagbasa sa mga kasulatan, nga nakatabang kaniya sa pag-establisar og mas lig-on nga relasyon sa Langitnong Amahan ug sa Manluluwas. “Samtang nagbasa ko sa mga kasulatan, gibati nako nga si Kristo anaa sa akong kiliran,” miingon siya.
Pagkaplag og Kahupayan
Samtang lisud nga adunay daghan kaayong responsibilidad, ang pagsimba matag semana nakatabang ni Marta nga makakaplag og kahupayan nga iyang gikinahanglan aron sa pagpadayon og tabang sa iyang inahan. “Inig sulti nila sa mga pag-ampo sa pagsugod ug pagtapos sa miting sa sakramento, malinawon kini kaayo,” siya miingon. “Kon naa ko didto, usahay mobati ko nga ingon og ang Langitnong Amahan nagsulti kanako nga maayo ko nga tawo ug nga ako kinahanglan nga magpadayon nga mahimong maayo nga tawo aron sa pagtabang sa akong mama.”
Matag higayon nga siya mobati niini, siya mapahinumduman kon unsa siya kamapasalamaton sa iyang inahan. Gibati niya nga ang Langitnong Amahan mipadala og mga anghel aron sa pagsuporta kaniya. “Nagtuo ko nga Siya nagpalig-on kanako aron momata ug magmalipayon ug magmapasigarbuhon sa inahan nga aduna ako,” miingon si Marta.
Usa sa mga leksyon nga nakat-unan nilang duha ni Sonia ug ni Marta mao nga ang kinabuhi dili sayon o dili hingpit—alang ni bisan kinsa. Si Sonia miingon, “Walay usa sa akong mga kalisud nga makapaguol kanako. Nasayud ko nga ang Dios mihatag kanako niini nga unod ug dugo ug mga bukog sa ingon niini nga paagi tungod kay ako talagsaon, ug ang Dios misulti kanako nga makaya nako kini. Gibuhat nako ang akong labing maayo. Makahimo pa ako og dugang, apan karong adlawa OK ang akong gibati sa akong kaugalingon. Mapasigarbuhon ko sa akong gibuhat, sa unsay naa nako, ug sa unsay akong mabuhat sa umaabut.”
Si Marta usab nakaamgo nga ang mga butang mamaayo ra, bisan tuod ang kinabuhi mahimong lisud usahay samtang siya nag-atiman sa iyang inahan. Siya nakakita nga ang tanang tawo adunay lain-laing mga hagit. “Walay usa nga hingpit ang kinabuhi,” miingon siya. Apan bisan pa sa iyang kaugalingong personal nga mga hagit, si Marta nakakaplag gihapon og maayo nga mga butang sa matag sitwasyon—ang iyang relasyon sa iyang inahan mao ang usa ka ehemplo. “Ang akong inahan adunay pisikal nga limitasyon, apan sa mental ug emosyonal nga paagi siya maalamon kaayo. Maayo gayud kami nga managhigala.”
Paglantaw sa Unahan
Busa unsa man ang umaabut ni Marta ug Sonia? Si Marta miingon, “Gusto nako nga magpabiling duol sa akong mama, ug siyempre gusto ko nga maminyo, makabaton og mga anak, ug usa ka pamilya. Apan sa umaabut, kon mahimo nako, gusto nakong mopalit og balay alang sa akong pamilya ug sa akong mama tungod kay dili ko gusto nga malayo gikan kaniya bisan og usa ka adlaw!”
Si Sonia mibati nga malaumon usab mahitungod sa umaabut ug kanunay nga mapasalamaton alang sa pakig-uban ug gugma ni Marta. “Nindot gayud nga adunay usa ka matahum nga anak nga babaye. Nindot kaayo nga naa si Marta sa akong kinabuhi. Usa siya ka gasa gikan sa Dios. Iyang giandam si Marta nga mopuyo dinhi uban kanako.”