Pagpaambit sa Ebanghelyo

Ni Elder Edward Dube

Sa Seventy

“Pagtuon kamo gikan kanako … ug makakaplag kamog pahulay alang sa inyong mga kalag”. (Mateo 11:29).

Usa ka tawo nga akong gitrabahoan mihatag nako og kopya sa Basahon ni Mormon. Apan wala nako basaha kini sulod sa hapit duha ka tuig. Usa ka Dominggo, akong gipunit ang Basahon ni Mormon ug miadto sa usa ka linya sa riles gawas sa lungsod diin ako nagpuyo sa Zimbabwe. Milingkod ko ug misugod sa pagbasa.

Sa sinugdanan, lisud kadto masabtan. Apan gibalik-balik nako sa pagbasa ang pagpamatuod ni Joseph Smith. Ang iyang mga pulong mitandog sa akong kasingkasing.

Wala madugay, adunay tawo nga midapit nako sa pag-adto sa simbahan. Sa sinugdanan, dili ko komportable, mao nga milingkod ko sa katapusan nga laray. Apan sa dihang ang mga tawo misugod sa pagpaambit sa ilang mga pagpamatuod mahitungod sa Manluluwas nga si Jesukristo ug sa Basahon ni Mormon, aduna koy nindot nga nabati sa kahiladman.

Wala magdugay human niini, ang mga misyonaryo miabut sa akong kasilinganan. Wala madugay nabunyagan ko. Paglabay sa katuigan, nakabaton ko og kadungganan sa pagserbisyo og misyon ug sa pagpaambit sa ebanghelyo kauban sa kadaghanan.

Ang Simbahan mitubo og maayo sa Zimbabwe. Apan daghan pa gihapon ang atong mahimo aron mapaambit ang ebanghelyo, bisan asa kita nagpuyo. Pinaagi sa pag-ampo, pagtuon sa kasulatan, ug gabii sa panimalay, kamo makapalambo sa inyong pagpamatuod ug makapaduol sa Langitnong Amahan. Ang inyong pagpamatuod makapanalangin sa kinabuhi sa daghang mga tawo sa tibuok kalibutan. ●