Katakin ilo Wāween eo an Rilo̧mo̧o̧r
Eddo eo ej pād ioon airar n̄an ļoor waanjon̄ak eo an M̧aajta im katakin āinwōt E.
Rūkaki Ro Em̧m̧an
Jet allōn̄ remootļo̧k, juon iaan ro ilo kūlaaj eo aō jān bukwōn eo ilo Overton, Nevada, ekar kajjitōk n̄e jemaron̄ aiin menin leļo̧k ko an kūrijm̧ōj n̄an rūkaki in kindergarten eo am ejitōnbōro, eo ekar m̧ōņōnō bwe ejejjet 98 an iiō. Ekar katakin kōm bwe kōmin ettā, aorōk in kiki kōtan awa, m̧ōņōņō eo jān am m̧ōn̄ā graham cracker ippān milik, im n̄an iakwe doon. Kom̧m̧ol, Sister Davis, bwe kokar juon rūkaki em̧m̧an.
Ekwe bar wōr juon aō rūkaki em̧m̧an ilo iien eo ikar jikuuļ ilo Ricks College elōn̄ iiō ko remootļo̧k. Ikar kōppopo n̄an mijen im ikar ļōmņak enaj ļap an jipan̄ n̄e inej pād ilo kūlaaj im kōppopo eo an mijenede. Ta eo ikar en̄jake me ekar ukot mour e aō.
Jān raan eo kein kajuon ilo kūlaaj eo, Iaar kūle ke Iaar pād im̧aan mejān juon rūkaki eo eļap an jeļā rūkaki. Etan rūkaki eo ej Brother F. Melvin Hammond. Ikar jeļā ke Brother Hammond ekar iakwe Irooj im ekar iakwe n̄a. Ikar maron̄ loe ilo turin mejān im ron̄ ilo ainikien. N̄e ej katakin, jetōb ej kōmeramļo̧k aō kōļmenļo̧kjen. Ekar katakin katak ko, bōtaab ekar bar karuwaineneik eō bwe in ekkatak ippa make. Karuwainene in ekar jipan̄ n̄a loe eddo ko aō n̄an ekkatak katak ko an Irooj ippa make. En̄jake in eaar ukōt eō n̄an indeeo. Kom̧m̧ool, Brother Hammon, kōn am̧ kar katakin ilo wāween eo an Rilo̧mo̧o̧r.
Ro jeiū im jatū, aolep ewōr aer jim̧we n̄an bōk ekkatak rot in ilo m̧weo im ilo m̧ōnjar eo.
N̄an kwaļok kadkadin Itok, Ļoor Eō ej letok juon kōļmenļo̧kjeņ kōn ta ekkatak ko n̄an āinwōt Kraist emaron̄ tōpari. “Jibadbad in unin aolep ekkatak im katakin ko an gospel eo,” ej ba, “ej n̄an kam̧ūlaļļo̧k ad oktak n̄an Jisōs Kraist im jipan̄ kōj kōļapļo̧k ad āinwōt E. … Kain ekkatak gospel eo me ej kōkajoorļo̧k tōmak eo ad im tōlļo̧k n̄an menin bwilōn̄ kōn oktak tok rejjab bōk jikier ilo juon wōt iien. Ej ererakļo̧k eļapļo̧k jān juon kūlaaj ruum̧ n̄an būruwōn kajjojo armej im im̧ōko.”1
Jeje ko rekwojarjar rej kwaļo̧k bwe ilo iien kwaļo̧k eo an Rilo̧mo̧o̧r eo n̄an armej in Amedka eo jem̧aan ekar juon men ejelet aolep jikin im pedjake aolep jikin bwe “armej ro raar aolep oktaktok n̄an Irooj, ioon aolepān mejān āneo, jim̧or riNipai im riLeman, im eaar ejjeļo̧k akwāālel ko im epelōn̄lōn̄ ko ilubwiljier, im armej otemjej eaar kōm̧m̧an jim̧we n̄an eo juon.”2
Ekōjkan an katakin ko ad maron̄ barāinwōt jelet ro jej iakwe er ilo ejja wāween eo wōt? Ekōjkan ad maron̄ katakin ilo ejja jōkjōk eo an Rilo̧mo̧o̧r eo im jipan̄ ro jet lukkuun oktak tok? Kōtļo̧k bwe in kwaļo̧k jet elmakot ko.
Anōk Rilo̧mo̧o̧r eo
Jinoin im m̧oktata, bōk ioom̧ n̄an katak jabdewōt men eo komaron̄ kōn Rūkaki Maajta eo Make. Ekōjkan ad kwaļok iakwe n̄an ro jet? Ewi wāween aer en̄jake ke E ekar katakin? Ta eo E ekar katakin kake? Ta eo ekar kōtmāne ippān ro ekar katakin er? Ālkin am̧ etale kajjitōk rōt kein, etale im ukōte jōkjōk in wāween am̧ katakin bwe en āinwōt E.
Kabun̄ in em̧ōj an letok elōn̄ kein jipan̄ katakin ko ilo Gospel Library app eo im ilo ChurchofJesusChrist.org. Juon iaan kein jipan̄ kein ej ba Teaching in the Savior’s Way. Ij karuwaineneik eok n̄an riiti im ekkatak aolep naan ko ie. Pedped kein an rej jipan̄ kwe ilo am kate kwe bwe kwon āinwōt Kraist ilo am̧ katakin.
Kōtļo̧k Kajoor eo an Baam̧le Ko
Elmakot in aō juon emaron̄ keidi n̄an en̄jake eo Aō jejjo allōn̄ remootļo̧k ke ikar loļo̧k juon m̧ōtta ejitōn bōro. Ij maron̄ ron̄ ainikien kōrā eo jān itulik ej kōnnaan ippān juon armej, kōn menin ikar m̧ōkaj aō etal bwe en roolļo̧k ippān baam̧le eo an.
Juon awa tokālik Ikar bōk juon text message jān kōrā eo em̧m̧an pāleen: “Brother Newman, kom̧m̧ool kōn am̧ kar itok. Kōmin kar karuwaineneik eok n̄an lowaan m̧we, bōtaab ikōņaan kwaļo̧k n̄an eok ta eo kōm̧ ar kōm̧m̧ane. Jen jinoun kar pandemic in kōm ļak kar kōnono kōn Itok, Ļoor Eō ippān ajri ro nejūm̧ro rōrūtto aolep Jabōt ilo Zoom. Eļap jerbal in menin kabwilōn̄lōn̄ ko jene. Ij ļōmņak ejkab kein kajuon an leddik eo nejūm̧ro riiti Bok in Mormon eo ippān make. Rainin ej raan eo āliktata n̄an katak eo kōn Bok in Mormon im ejkab m̧ōj am kam̧ōje ilo iien eo kwoj itok. … Ij ļōmņak konaj kōņaan ron̄jake ekōjkan an Itok, Ļoor Eō, Zoom, im ajedeed in nan̄inmej in letok iien em̧m̧an ilo iien in ejejjet n̄an ukot juon bōro. … Ekōm̧m̧an menin aō kōļmenļo̧kijen kōn jete kabwilōn̄lōn̄ dikdik ko rej bōk jikier ilo iien in.
Ej juon menin kam̧ool n̄an n̄a ilo an kar Būreejtōn Russell M. Nelson kōm̧m̧ane ilo Oktoba 2018. E ekar ba bwe ekkatak gospel ej pedped eo ilo m̧weo me Kabun̄ in ej rie “ewōr ippān maron̄ eo n̄an jab kabōjrak kajoor an baam̧le ko, āinwōt kajjojo baam̧le ej kajjieon̄ ilo aolepān iien in kijejeto im kōjparok n̄an ukōt m̧ōko m̧weer n̄an juon jikin kone an tōmak. Ij kallim̧ur bwe ilo ami tiljek jerbal n̄an bar kōkāāl m̧weo im̧ōmi n̄an juon jikin ekkatak gospel eo, ilo m̧ool raan in Jabōt ko ami renaaj em̧ool erom̧ juon men elan̄lōn̄. Ajri ro nejimi renaaj m̧ōņōņō in ekkatak im mour kōn katak ko an Rilo̧mo̧o̧r eo. … Oktak ko ilo baam̧le eo ami renaaj em̧m̧an im kajoorļo̧k.”3 Ej juon kallim̧ur aiboojoj!
N̄an juon m̧oolin mour oktak, oktak n̄an Jisōs Kraist ej aikuj koba aolepān am̧ im ilo aolepān m̧ōttan ko an mour ko ami. En̄in ej unin an aikuj bwe en dāpdep ilo pedped in mour ko ad—baam̧le ko im m̧ōko m̧ōd.
Keememej Bwe Oktak Ej N̄an Kajjojo Armej
Im kōļmenļo̧kjeņ eo aō āliktata ej n̄an keememej bwe oktak tok ej aikuj itok jān tulowa. Āinwōt kar kōmeļeļeiki ilo barābōļ eo an virgin ro jon̄oul, jejjab maron̄ leļo̧k n̄an jabdewōt oil in oktak eo ad make, jekdo̧o̧n n̄e jekōņaan. Āinwōt an Elder David A. Bednar kar katakin: “Oil in eaorōk ej aikuji juon pilin̄lin̄ ilo juon iien … kijenmej im kije. Ejjeļo̧k iaļ ekadu epād; ejjeļo̧k iien āliktata im ejedimkij n̄an kōppopo.”4
Itok, Ļoor Eō ej pedped ioon m̧ool in. Ij keidi n̄an enjeļ eo ekar jipan̄ Nipai ekkatak kōn Jisōs Kraist ilo an ba, “Reilo̧k!”5 Āinwōt kar enjeļ eo, Itok, Ļoor Eō ej kaurwaineneik kōj n̄an lale jeje ko rekwojarjar im naan ko an rikanan ro ad raan kein n̄an pukōt Rilo̧mo̧o̧r eo im ron̄jake E. Āinwōt Nipai, jenaj make katakin kōj jān Jetōb ilo ad riiti im ļōmņake naan ko an Anij. Itok, Ļoor Eō ej juon springboard eo ej kōm̧m̧an bwe maron̄ jipan̄ kōj kajjojo tulo̧k laļļo̧k n̄an dān in mour kōn katak an Kraist.
Ejja eddo in an jined im jemed ilo elōn̄ wāween ko. Ajri ro rej jeram̧m̧an kōn elōn men ko jān ro jineer im jemeer, ak juon naan in kam̧ool ejjab juon iaan jolet kein. Jejjab maron̄ leļo̧k an ajri ro naan in kam̧ool eļapļo̧k jen ad kaddōk juon ine. Bōtaab jemaron̄ leļo̧k juon jikin kallip ewāmourur, ippān juon bwidej em̧m̧an, ejjeļo̧k kālōkōk ko im renaj “wōran̄ļo̧k naan eo.” Jemaron̄ kajjeon̄ kōm̧m̧an itia ko n̄an ajri ro nejid—im ro jet jej iakwe er—remaron̄ loe jikin eo n̄an likūt ine eo,, “[ron̄jake] naan eo, im [meļeļe] kake”6 im loe n̄a er make “bwe juon ine em̧m̧an.”7
Jet iiō ko remootļo̧k, laddik eo nejū Jack im n̄a ekar wōr juon iien em̧m̧an n̄an am̧ro ikkure Old Course ilo St. Andrews ilo Scotland, ijo ikkure eo golf ekar ijino ie. Ekanooj in kar kabwilōn̄lōn̄! Ilo aō kar jepļaak ikar kajjeon̄ n̄an ba n̄an ro jet kōn en̄jake in. Bōtaab ikar jab maron̄, Pija, bitio ko, im kamļeļe eo em̧m̧antata rekar lukkuun jabwe. Ijkab kūle ke iaļ eo de in n̄an jabdewōt n̄an jeļā aibojoj eo an St. Andrews ej n̄an am̧ en̄jake make—n̄an loe jikin ko reļļap, menonoik mejatoto eo ie, en̄jake kōto ko ilo turin mejeer, im kōm̧m̧an jet makūtkūt ko n̄an cavernous bunker ko im burly gorse bushe ko, ko jekar kōm̧m̧ani kōn eļap wājabdik.
Innem ej pād ilo naan ko an Anij. Jemaron̄ katak kake, jemaron̄ kwaļo̧k kake, jemaron̄ kōmeļeļeik. Jemaron̄ kōnono kake, jemaron̄ kameļeļeik, jebar maron̄ kam̧ool kake—im kar kakien kōj n̄an kōm̧m̧ane. Bōtaab m̧ae iien eo armej rej en̄jake kwojarjar in naan ko an Anij enaj kakwojarjar ioon er āinwōt malawi in tutu jān lan̄ n̄an kajoor eo an jetōb,8 enaj āinwōt kwoj kalimjōk juon postcard ak jet pija in an armej kakkije. Kwoj aikuj etal n̄an ijen kwe make. Bwebwenato ej juon ito itak eo ad make—juon iien ito itak kōn aiintok doon.
Jabdewōt eo ej katakin ilo m̧ōko im ilo m̧ōn jar, jemaron̄ leļo̧k n̄an ro jet iien em̧m̧an n̄an er make n̄an en̄jake jetōb. Jān en̄jake kein, renaj itok n̄an “jeļā kōn m̧ool eo an aolep men ko otemjeļo̧k” ippāer make.9 Būreejtōn Nelson ekar katakin, “eļan̄n̄e ewōr am̧ kajjitōk em̧ool kōn gospel in ak Kabun̄ in, ilo am̧ kālet bwe Anij en anjo̧, kwonaaj tōlļo̧k n̄an lo im lukkuun meļeļe, m̧ool ko indeeo me renaaj tōl mour eo am im jipan̄ eok dāpdep wōt ilo iaļen bujen in.”10
Em̧m̧anļo̧k Katakin
Ij karuwaineneik ritōl ro im rūkaki ro ilo aolep doulul ko an Kabun̄ in n̄an kōnono ippen jinen im jemen im jodikdik ro bwe en maron̄ em̧m̧anļo̧k ekkatak ko ilo aolep lābōļ—an stake ko, ilo ward ko, im ilo m̧ōko. Menin enaaj tōprak ilo katakin katak eo im karuwaineneik Jetōb im kanne kameļeļe kōn m̧ool ko Jetōb Kwojarjar ekar katakin kōj ilo iien ikōn̄ ko ilo ad ekkatak make iaad.
Ro m̧ōtta ilo Kraist, eddo eo ej pād ioon airar n̄an ļoor waanjon̄ak eo an M̧aajta im katakin āinwōt E. Iaļ eo An ej iaļ eo em̧ool! Ilo ad ļoor E “n̄e Enaaj waļo̧k jenaaj āinwōt E, bwe jenaaj loe E ilo lukkuun nememen; bwe jen maron̄ bōk kōjatdikdik in, bwe jen maron̄ karreo em̧ool āinwōt E erreo.”11 Ilo etan eo em̧ōj An jerkakpeje, M̧aajta Rūkaki eo Emake, em̧ool Jisōs Kraist, amen.