Elder Clark G. Gilbert

Ritōl Eutiej Jiljilimjuonn̄oul an Kabun̄ in

Elōn̄ rejeļā kajjien Elder Clark G. Gilbert āinwōt būreejtōn eo an BYU–Pathway Worldwide eo im āinwōt kar m̧okta būreejtōn eo an Brigham Young University–Idaho. Elōn̄ rebarāinwōt jeļā kajjien kōn innovative development an kōn online higher education būrookraam̧ ko jim̧or ilo institution ko.

Elder Clark ej nōbar jerbal in jipan̄ ko an Kabun̄ in eļap meļeļeier—jipan̄ likao ro ilowaan Boston, Massachusetts, USA—kōn kōpooj e n̄an bōk iien ko rem̧m̧an kōn jeļāļo̧kjeņ n̄an jarlepju ko reļļapļo̧k. Iien in em̧m̧an an jerbal in jipan̄ eo ekar itok ke ekar poub kōn graduate school im kōjparok baam̧le eo an edik.

“Likao ro raar jab aolep iien eļap ippāer jipan̄. Raar erom juon m̧ōttan mour ko am, im ekar ļapļo̧k am iakwe er,” ekar ba. “Ikar ekkatak n̄an ron̄jake Irooj im kar jeļā E ekar pād ilo mour ko am. Imaron̄ kar ron̄ An jiron̄ eō ta eo ikar aikuj in kōm̧m̧ane n̄an er.”

Elder Gilbert ekar ba bwe Irooj ekar katakin e kōn aikuj ko im armej ro jet. “Ekar jab menin wōt Ekar kōpooj eō n̄an jeļāļo̧kjeņ, bōtaab Ekar kwaļo̧k n̄an eō ta eo Emaron̄ kar kōm̧m̧ane ilo mour ko an armej ro ilo juon jekjek em̧wilaļ, an juon make.”

Clark Gordon Gilbert ekar ļotak ilo Oakland, California, USA, ilo Juun 18, 1970 eo, n̄an Paul im Susan Gilbert. Ekar rūttoļo̧k ilo Pheonix, Arizona, USA. Ālkin jerbal ilo Japan Kobe Mijen, ekar m̧areik Christine Calder ilo 1994 eo ilo Salt Lake Tampeļ. Ewōr ruwalitōk nejierro ajri ro.

Elder Gilbert ekar bōk bachelor degree eo an ilo international relations ilo 1994 eo jān Brigham Young University, master degree eo ilo Asian ekkatak ko ilo 1995 eo jān Stanford University, im doctor degree ilo business administration ilo 2001 eo jān Harvard University. Ekar jerbal āinwōt juon assistant professor ilo Harvard Business School eo, associate academic vice būreejtōn ilo BYU–Idaho, im būreejtōn im chief executive opija n̄an Deseret News im Deseret Digital Media.

Juon Eria Jiljilimjuonn̄oul ilo iien kūr eo an, Elder Gilbert ekar jerbal āinwōt būreejtōn an doulul eo an elder ro, rikakpilōklōk ilo būreejtōnji eo an Doulul eo an Likao ro ilo stake, im bisop.