Elder Carlos G. Revillo Jr.

Ritōl Eutiej Jiljilimjuonn̄oul an Kabun̄ in

Jān ke ekar ajri wōt, Elder Carlos G. Revillo Jr. ekar ikdeelel n̄an jerbale juon mijen aolep raan. Bōtaab ilo kaļōj, ekar jokāālet n̄an karum̧wijļo̧k mijen eo an kōn juon iiō n̄an kadedeļo̧k degree in chemical engineering eo an ļalem iiō aitokan im pāāje national board certification teej ko. Ekar pād ilo jikin ko ļalem reutiej tata ilo teej ko an board eo im kar bōk jejjo jerbal ko rem̧m̧an jān elōn̄ kom̧bani ko.

“Ilo iien eo, ikar aikuj in kajjitōk ippa make, ‘Ij ke lukkuun aikuj in jerbale juon mijen? Ij ke lukkuun in jeļā bwe Josep Smith ekar juon rikanaan em̧ool im bwe Bok in Mormon ej m̧ool?’” Elder Revillo ekar ba. “Ij aikuj in jar im lukkuun lale ta ikar tōmak.”

Tokālik ekar ekkatak bwe jinen ekar jar im jitlo̧k kōn e. Elder Revillo ekar ba bwe Jetōb eo ekar un̄uri būruōn.

“Naan in kam̧ool eo aō ekar obrak kōn kalimomo ke ikar jerbale juon mijen aolep raan,” ekar ba. “Aolepān kōjeraam̧m̧an ko me ewōr ippa kiiō ij nōbar kōn jokāālet eo aorōk.”

Carlos Garcia Revillo Jr. ekar ļotak ilo General Santos City, Philippines, ilo Nobōm̧ba 8, 1965 eo n̄an Carlos G. Revillo Sr. im Amparo Revillo. Ekar rūttoļo̧k ilo General Santos, kar jerbale juon mijen aolep raan ilo Philippines Bacolod Mijen, im kar m̧areik Marites Enriquez Fernando Revillo ilo Manila Philippines Tampeļ ilo 1989 eo. Ewōr emān nejier ajri ro.

Elder Revillo ekar kadiwōjļo̧k kōn juon bachelor degree ilo chemical engineering jān University of Santos Tomas ilo Manilla ilo 1986 eo. Ekar jerbal ium̧win 22 iiō ko ilo elōn̄ jerbal in management ko n̄an Procter & Gamble ilo Philippines, the Asia-Pacific region eo, im ilo global headquarter ko ilo United States. Ekar barāinwōt jerbal āinwōt head of quality, food safety, im regulatory affairs ilo Asia n̄an Kellogg Company eo.

Elder Revillo, eo ekar welfare im self-reliance manager eo an Kabun̄ in ilo Philippines ilo iien kūr eo an, ekar jerbal āinwōt juon bisop, stake būreejtōn, rūkaki in jemenere, high ko̧o̧njōļōr, im būreejtōn an Philippines Quezon City Mijen jān 2013 n̄an 2016 eo.