Amy A. Wright

Rikakpilōklōk eo Kein Karuo ilo Būreejtōnji eo Eļap an Būraimere

Ļalem iiō ko remootļo̧k, Sister Amy A. Wright ekar nan̄inmej kōn stage 4 ovarian cancer. Wāween eo de eo baam̧le eo an ekar deeor jān kōm̧adm̧ōd ko reļlap, liin ekar ba, ekar kōn pedped wōt ioon Rilo̧mo̧o̧r Jisōs Kraist.

“Ke ekar kōn wōt e, laļ in ekar erom juon jikin elukkuun in marok,” liin ekar keememej. “Bōtaab ke pedped eo aō ekar oktakļo̧k, ke ikar kajjieon̄ in jerbal n̄an ro jet im etetal ilo wāween an Kraist kar etetal, ekar wōr meram im lan̄lōn̄, em̧ool jekdo̧o̧n ilo iien metak ko reppen im en̄taan.”

Sister Wright ekar kōmeļeļeik tariņae eo an ippān kānjōr āinwōt juon “en̄jake in kōrabōlbōl im kōkāāl”—juon eo me ekar “jetjet ilo wāween eo” n̄an jipan̄ liin itok n̄an jeļā Rilo̧mo̧o̧r eo ilo juon wāween em̧wilaļ an juon make. Ekar barāinwōt katakin liin eļapļo̧k kajoor eo me ej itok ilo kappukōt n̄an ekkatak im meļeļe apan̄ ko an ro jet oktak jān doon.

“Jej aolep jerbal ilo m̧ōttan ko roktak an jikin kallib eo an Irooj ilo iien ko roktak ilo mour ko ad. Bōtaab ejja jikin kallib eo wōt ippān ejja M̧aajta eo wōt,” liin ekar ba.

“Kōjatdikdik eo ad ejja āinwōt, eo ej mour indeeo im mour āinwōt Anij. En̄in ej ta eo jej ikdeelel n̄an aolep ajri ro reddik raorōk, bwe Rilo̧mo̧o̧r eo enaaj erom m̧ōttan iaļ eo aer, im bwe renaaj bar ro̧o̧l n̄an m̧weo Ippān.”

Amy Eileen Anderson Wright ekar ļotak ilo Jānwōde 6, 1972, ilo Salt Lake City, Utah, USA n̄an Robert im Joy Anderson. Liin ekar m̧areik James McConkie Wright ilo 1994 eo ilo Salt Lake Tampeļ. Ewōr jilu nejier ajri ro.

Sister Wright ekar kadiwōjļo̧k kōn juon bachelor degree ilo human development im family study ko jān University of Utah ilo 1998 eo. Liin ekar jerbal āinwōt juon reading tutor im office manager im ekar juon baļintier an Parent Teacher Association. Ejjab to liin ekar jipan̄ kōn marketing im advertising n̄an juon opiij in kōm̧m̧an n̄i.

Sister Wright ekar jerbal ilo general advisory ko̧o̧njeļ eo an Doulul eo an Jiron̄ ro jān 2018 eo. Kūr ko an im̧aanļo̧k ekoba būreejtōn an Būraimere ilo ward ak stake eo, rikakpilōklōk ilo ward Būraimere būreejtōnji eo, rūkaki in Gospel Doctrine, im ritōl an Cub Scout.