Lōb Ejjeļo̧k An Anjo̧
Kōn Pinmuur in lo̧mo̧o̧r eo im Jerkakpeje eo eaiboojoj an Jisōs Kraist, bōro ko rerūb remaron̄ mour, būrom̧ōj eļap emaron̄ erom̧ aenōm̧m̧an, im en̄taan emaron̄ erom̧ kōjatdikdik.
Ilo Jabōt in Ijtō in eaiboojoj, ajri ro nejid rej lan̄lōn̄ im al, “On a golden springtime, Jesus Christ awoke and left the tomb where he had lain; the bands of death he broke.”1
Jej kam̧m̧oolol kōn jeļāļo̧kjeņ eo ad kōn Jerkakpeje eo an Jisōs Kraist. Im kiiō ilo jet wāween ilo mour ko ad, enaaj rub būruwōd ālkin an juon eo ejitōborō ippād ej jako jān mour in. Jān ajedeed in nan̄inmej in ipeļaakin laļ in kiiō, elōn̄ iaadwōj rekar luuji ro rejitōn bōro ippāer—emaron̄ ro uwaan baam̧le ak ro jerāer.2 Jej jar kōn ro rej liajļōļ kōn kain jako in.
Būreejtōn Russell M. Nelson ekar ba:
“Jekdo̧o̧n jete am̧ iiō, jej būrom̧ōj kōn ro rejitōn bōro im rejako. Būrom̧ōj ej juon iaan en̄jake ko rem̧wilaļ an iakwe eo erreo. …
“Barāinwōt, jeban maron̄ lukkuun lan̄lōn̄ kake bar ioon doon ko an baam̧le tokālik eļan̄n̄e ejjeļo̧k lukkuun dān in kōmjaļaaļ in jepelļo̧k ko kiiō. Wāween eo wōt n̄an bōk būrom̧ōj jān mej ej n̄an bōk iakwe eo jān mour.”3
Jemaron̄ pijaiki ilo ļōmņak ko ad wāween an ro jeran Jisōs, ro rekar ļoor E im jerbal in karejar n̄an E,4 kar en̄jake ilo aer kar kam̧oole mej eo An.5 Jejeļā bwe “rekar būrom̧ōj im jan̄ūti.”6 Ilo raan in Dōbwāāl eo, rekar jab jeļā ta eo enaaj waļo̧k ilo Jabōt eo, rekar bōlen lukkuun eddodo itok wōt jān ajelkā, ļōmņak ewi wāween aer nej wōnm̧aanļo̧k wōt ke ejako Irooj eo aer. Mekarta, rekar wōnm̧aanļo̧k wōt im jerbal in karejar n̄an E aaet ilo mej.
Joseph jān Arimathea ekar akweļap n̄an Pilate bwe en leļo̧k n̄an e ānbwinnin Jisōs. Ekar lelaļtak ānbwin eo, kitimi ilo nuknuk linen, kōbabuiki ānbwin eo ilo lōb eo an make ekāāl, im kōdābwilļo̧k juon ejm̧aan ekilep n̄an kōjem̧ eo an lōb eo.7
Nikodimōs ekar bōktok juon iiōk in mōr im aloes. Ekar jipan̄ Joseph bōk ānbwinnin Jisōs im kūtimi ilo nuknuk linen ippān tōļaj ko.8
Meri Magdalene, Meri Jinen Jisōs im kōrā ro jet rekar ļooreļo̧k Joseph im Nikodimōj, alooje aerro kōbabuiki ānbwinnin Jisōs, im kōpooji tōļaj ko im men in kapit ko.9 Ekkar n̄an kakien ko raan ko, rej kōttar n̄an kōpooje im kapiti ānbwinnin kōnke Jādede ekar Jabōt eo.10 Innām, jibbon̄tata ilo jibbon̄ in Jabōt eo, rekar etal n̄an lōb eo. Ālkin aer jeļā bwe ānbwinnin Rilo̧mo̧o̧r eo ekar jako jān ijo, rekar etal wōt im kōnnaanik rikaļoor ro ro rekar Rikaļoor ro an Jisōs. Rikaļoor ro rekar itok ippāer tok n̄an lōb eo im loe bwe ekar ejjeļo̧k kobban. Aolep ak Meri Magdalene wōt ekar jab etal, bwilōn̄ ta eo ekar waļo̧k n̄an ānbwinnin Rilo̧mo̧o̧r eo.11
Meri Magdalene eaar pād ilo lōb eo ippān make. Jejjo wōt raan m̧oktaļo̧k, ekar loe mej eo ekabūrom̧ōjm̧ōj an eo m̧ōttan im Maajta. Kiiō lōb eo Lūbōn ejjeļo̧k kobban, im ekar jab jeļā ia eo epād ie. Ekar lukkuun eddo buruōn kōn menin, im ekar jan̄. Ilo iien eo, Rilo̧mo̧o̧r em̧ōj an jerkakpeje ekar itok n̄an ippān im kajjitōk etke ej jan̄ im wōn eo ej pukote. Ļōmņak bwe rikallib eo ekar kōnono n̄an e, ekar kajjitōk bwe eļan̄n̄e ekar bōk ānbwinnin Irooj, kwaļo̧k n̄an e ijo bwe en maron̄ bōke.12
Ij pijaikiļo̧k bwe Irooj ekar bōlen kōtļo̧k bwe Meri Magdalene en liajļōļ im kwaļo̧k an metak.13 Innem ekar kūr e kōn et eo etan, im liin ekar oktak tok n̄an E im kar kile E. Liin ekar loe Kraist eo em̧ōj an jerkakpeje im ekar juon rikam̧ool kōn Jerkakpeje eo An eaiboojoj.14
Āinwōt kwe, ilo jet wāween, imaron̄ in keidi metak in eļap Meri Magdalene im ro m̧ōttan rekar en̄jake ke rej liajļōļ kōn mej eo an Irooj eo aer. Ke ekar ratimjuon aō iiō, ikar luuji ļaddik eo jeiū ilo juon m̧akūtkūt in laļ enana. Kōnke ekar waļo̧k menin ilo ejjeļo̧k kōtmāne, n̄an n̄a ekar bōk jidik iien bwe in meļeļe ta eo ekar lukkuun bōk jikin. Ekar rub būruo kōn būrom̧ōj, im ikōn kajjitikin eō make, “Ta eo ekar waļo̧k n̄an ļeo jeiū? Epād ia? Ia eo ekar etal n̄ane? Inaaj ke bar loe e?”
Tōre ko ijjan̄in kar jeļā kōn karōk in lo̧mo̧o̧r eo an Anij, im ikar kōņaan jeļā ia eo jekar itok jāne, ta unleplep eo an mour in, im ta ej waļo̧k n̄an kōj ālkin ad mej. Kōj aolep, jej ke bōk jan̄uwaade kein n̄e jej luuji juon eo ejitōnbōro ippād ak n̄e jej jelm̧ae men ko reppen ilo mour ko ad?
Jejjo iiō tokālik, ikar jino ļōmņak kōn ļaddik eo jeiū ilo juon wāween ejenolo̧k. Ij kijon̄ ļōmņake an ļaddik eo kōļļaļļaļ ilo kōjem̧ eo am. Ij kijon̄ kōppeļļo̧k wintō eo, im ej jutak ijo, im ej kijon̄ ba n̄an n̄a, “Ijjab mej. N̄a imour. Ijjab maron̄ itok n̄an ippam̧ ak kiiō inaaj pād wōt ippam̧ im jāmin bar etal.” Ļōmņak in, ekar āinwōt juon ettōņak, ekar jipan̄ eō jelm̧ae kōn metak eo ikar en̄jake ilo an jako. Ļōmņak in bwe enaaj pād ippa ekar itok ilo aō ļōmņak im bar itok. Jet iien ij kijon̄ kalimjōke kōjem eo, ļōmņak bwe enaaj kōļļaļļaļ im inej bar loe e.
Enan̄in 40 iiō tokālik, ilo iien Ijtō, ikar kejōkļo̧kjeņ kōn Jerkakpeje eo an Jisōs Kraist im kar jino ļōmņak kōn ļaddik eo jeiū. Ilo iien eo, juon men ekar jikrōk ilo kōļmenļo̧kjeņ eo aō. Ij keememej aō ļōmņake an itok im lotok eō.
Raan ņe ikar kile bwe Jetōb eo ekar letok n̄an eō kaenōm̧m̧an ilo juon iien epen. Ikar bōk juon kam̧ool bwe jetōb eo an brother eo aō ejjab mej; ej mour. E ej eddōkļo̧k wōt ilo pād eo an indeeo. Ijeļā kiiō bwe “ļaddik eo [jeiū] enaaj bar jerkak bar juon alen”15 ilo iien em̧m̧anm̧ōn in n̄e, kōnke Jerkakpeje eo an Jisōs Kraist, kōj aolep naaj jerkakpeje. Ilo kakkobaba, Ekar kapidodoiki n̄an kōj aolep bwe jen bar koba ippān doon āinwōt baam̧le ko im bōk juon lan̄lōn̄ ejjeļo̧k jem̧ļo̧kin ilo im̧aan mejān Anij eļan̄n̄e jenaaj kālet n̄an kōm̧m̧an im kōjparok bujen ko Ippān.
Būreejtōn Nelson ekar katakin:
“Mej ej juon m̧ōņakjeņ eo emenin aikuj an pād ilo indeeo eo ad. Ejjeļo̧k juon ejeļā n̄āāt menin enej bōk jikin, ak elukkuun aorōk n̄an karōk in m̧ōņōņō eo eļap an Anij. Kom̧m̧oolol n̄an Pinmuur eo an Irooj, m̧akūtkūt in jerkakpeje eo ej juon men em̧ool im mour indeeo ej juon men kōmaron̄e n̄an aolep armej. …
“… Bwe būrom̧ōje ro jej iakwe ekar likūti wōt … kein ire an mej ej anjo̧ jāne kōn juon tōmak edim ilo Kraist, juon kōjatdikdik ewāppen, juon iakwe n̄an Anij im n̄an aolep armej, im juon ikdeleel em̧wilaļ n̄an jerbal n̄an Er. Tōmak in, kōjatdikdik in, iakwe in renaaj kōmaron̄ ad itok n̄an jikin eo ekwojarjar im̧aan mejān Anij im, ippān kōmpānien ro ad indeeo im baam̧le ko, deļo̧n̄ Ippān n̄an indeeo.”16
Ij kam̧ool bwe “eļan̄n̄e Kraist eaar jab jerkak jān ro remej, ak kar tūm̧i to ko an mej bwe lōb en kar ejjeļo̧k an anjo̧, im bwe mej en kar ejjeļo̧k an kein ire, enaaj kar ejjeļo̧k jerkakpeje.
“A ewōr jerkakpeje, kōn menin lōb ejjeļo̧k an anjo̧, im kein ire an mej ej oran̄ļo̧k ilo Kraist.
“E ej meram eo im mour eo an laļ; aaet, meram eo ejjeļo̧k jem̧ļo̧kin, eo emaron̄ jab tinaad; aaet, im barāinwōt mour eo ejjeļo̧k jem̧ļo̧kin, kōn menin ejjab maron̄ wōr ļo̧k wōt mej.”17
Jisōs Kraist Make ekar ba, “N̄a jerkakpeje eo, im mour eo: eo ej lōke Eō, men̄e e mej, enaaj bar mour.”18
Ij kam̧ool bwe kōn Pinmuur in lo̧mo̧o̧r eo im Jerkakpeje eo eaiboojoj an Jisōs Kraist, bōro ko rerūb remaron̄ mour, būrom̧ōj eļap emaron̄ erom̧ aenōm̧m̧an, im en̄taan eo emaron̄ erom̧ kōjatdikdik. Emaron̄ bōk kōj ilo Pein etūriam̧o̧, kaenōm̧m̧an, kōkajoorļo̧k, im kōmour kōj kajjojo. Ilo etan Jisōs Kraist, amen.