Kraist Em̧ōj an Jerkakpeje; Tōmak ilo E Enaaj Kōm̧akūt Toļ ko
Tōmak ilo Jisōs Kraist ej kajoor eo eļaptata epojak n̄an kōj ilo mour in. Men otemjej remaron̄ kūrm̧ool n̄an er ro rej tōmak.
Ro jeiū im jatū rejitōn bōro, eļap aō kam̧m̧oolol kōn iien in em̧m̧an bwe imaron̄ kōnono n̄an kom̧ ilo Jabōt in Ijtō in.1 Katok in pinmuur eo im Jerkakpeje eo an Jisōs Kraist rekar ukōt mour ko ad kajjojo n̄an indeeo. Jej iakwe E im kam̧m̧oolol ilo ad kabun̄jar n̄an E im Jemedwōj Ilan̄.
Ilo jiljiljino allōn̄ ko rem̧ootļo̧k, jekar etal wōt ilo ad tariņaeiki ajedeed in nan̄inmej in ipeļaakin laļ in. Ij bwilōn̄ kōn ami ekkōt im kajoor ilo jetōb ilo ami jelm̧ae nan̄inmej, mej, im ettoļo̧k jān armej ak make iaami. Ij jar im bar jar bwe, ilo aolepān men kein, kom̧ naaj en̄jake iakwe ejjab likjab an Irooj n̄an kom̧. Eļan̄n̄e kom̧ jelm̧ae mālijjon̄ ko ami kōn juon mour in rijilōk ekajoor, iiō eo ej jem̧ļo̧k ekar jab waan.
Jibbon̄ in, jekar ron̄ jān ritōl ro an Kabun̄ in ro rej itok jān laļ ko robrak kōn armej ioon laļ in. Em̧ool, kōjeraam̧m̧an ko an gospel eo rej n̄an aolep kūl, kajin, im armej. Kabun̄ eo an Jisōs Kraist ej juon kabun̄ me ej pād ipeļaakin laļ in. Jisōs Kraist ej ad ritōl.
Kam̧m̧oolol, men̄e juon ajedeed in nan̄inmej ekar jab maron̄ karum̧wijļo̧k an wōnm̧aanļo̧k wōt m̧ool eo An. Gospel eo an Jisōs Kraist ej ta eo ejejjet im ej menin aikuj ilo laļ in me eobrak kōn tarpok, jum̧ae im epoktak, iakweleel, im em̧ōk.
Kajjojo ajri ro nejin Anij ejim̧we bwe en wōr aer iien em̧m̧an n̄an ron̄jake im bōk kōmour eo, ennaan in lo̧mo̧o̧r eo an Jisōs Kraist. Ejjeļo̧k bar juon ennaan eļapļo̧k an aorōk n̄an m̧ōņōņō eo ad—kiiō im n̄an indeeo.2 Ejjeļo̧k bar juon ennaan eļapļo̧k an kobrak kōj kōn kōjatdikdik. Ejjeļo̧k bar juon ennaan emaron̄ joļo̧k jum̧ae ko ilo jukjukin pād eo ad.
Tōmak ilo Jisōs Kraist ej pedped eo an aolep tōmak im wāween ko n̄an tōpar kajoor eo ekwojarjar. Ekkar n̄an Rijilōk Paul, “Eļan̄n̄e ejjeļo̧k tōmak; armej reban kabun̄būruon [Anij]: bwe eo ej itok n̄an Anij, ej aikuj tōmak kōn an Anij pād, im kōn An leļo̧k jinōkjeej n̄an ro rej kappukot E.”3
Men otemjej rem̧m̧an ilo mour—aolep kōjeraam̧man ko an mour indeeo—rej ijjino kōn tōmak. Kōtļo̧k bwe Anij en anjo̧ ilo mour ko ad ej ijjino kōn tōmak bwe E ej m̧ōņōņō in tōl kōj. Ukweļo̧k eo em̧ool ej ijjino kōn tōmak bwe Jisōs Kraist ewōr an kajoor n̄an kareeo, kōmour, im kōkajoorļo̧k kōj.4
“Kaarmejjete kajoor eo an Anij,” rikanaan Moronai ekar ba, “bwe E ej jerbal kōn kajoor, ekkar n̄an tōmak an ro nejin armej.”5 Ej tōmak eo ad me ej kōppeļļo̧k kajoor eo an Anij ilo mour ko ad.
Im aaet, kōjerbal tōmak emaron̄ pen n̄an jelm̧ae. Ilo jet iien, jemaron̄ in kōļmenļo̧kjeņ eļan̄n̄e jemaron̄ kōļapļo̧k tōmak bwe jen bōk kōjeraam̧m̧an ko me jej lukkuun aikuji. Ijo wōt ke, Irooj ej kōjem̧ļo̧k mijak ko ad kōn naan ko an rikanaan Alma ilo Bok in Mormon.
Alma ej kajjitōk ippād n̄an mour ekkar n̄an naan eo im “kōjerbal juon pilin̄ in tōmak, aaet, em̧ool eļan̄n̄e [jej] kōņaan wōt tōmak.”6 Naan in “pilin̄ in tōmak” ej kakeememej eō kōn kallim̧ur eo an Irooj ilo baibōļ bwe eļan̄n̄e “ewōr ami tōmak āinwōt juon ine in mōstad,” jenej maron̄ in “ba n̄an toļ in, kwon ruwaakļo̧k n̄an ijjuwe; im enaaj ilo̧k, im ejjeļo̧k men ko [jenaaj] bane.”7
Irooj emeļeļe kōn mōjņo̧ ko ad ilo mour in. Kōj aolep jej wōtlo̧k ilo elōn̄ iien. Ak E ej barāinwōt jeļā kōn ta eo eļap jemaron̄ erom̧ ak kōm̧m̧ane. Ine in mōstad eo ej ijjino ilo an dik ak ej eddōkļo̧k n̄an juon wōjke kileplep n̄an an bao ko imejatoto el ioon ra ko. Ine in mōstad in ej bōk jikin juon tōmak jidikdik ak tōmak eo ej eddōkļo̧k.8
Irooj ejjab aikuji juon tōmak ewāppen n̄an kōj bwe jen maron̄ bōk kajoor eo An ewāppen. Ak E ej kajjitōk ippād n̄an tōmak.
Ro jeiū im jatū rejitōn bōro, kūr eo aō n̄an kom̧ ilo jibbon̄ in Ijtō in ej n̄an jino rainin n̄an kōļapļo̧k tōmak eo ami. Jān tōmak eo ami, Jisōs Kraist enaaj kōļapļo̧k maron̄ eo ami n̄an kōm̧akūt toļ ko ilo mour eo ami,9 men̄e apan̄ ko ami make remaron̄ in waļo̧k āinwōt kilep in Toļ Mount Everest.
Apan̄ ko ami remaron̄ in ajimakeke, pere, nan̄inmej, ak jorrāān ko jet ami make. Apan̄ ko am̧i renaaj oktak ilo jon̄aer, im aaet uwaak eo n̄an kajjojo apan̄ ko ami ej n̄an kōļapļo̧k tōmak eo ami. Menin ebōk jerbal. Rikatak ko rejowan im rikaļoor ro rejatiljek renaaj aolep iien apan̄ n̄an kōļapļo̧k juon pilin̄ in tōmak.
N̄an kōm̧m̧ane jabdewōt men bwen em̧m̧an eaikuj kijejeto. Erom̧ juon rikaļoor em̧ool an Jisōs Kraist ejjeļo̧k oktak ej bar aikuj kijejeto. Kōļapļo̧k tōmak eo am̧ im lōke E ebōk kijejeto. Imaron̄ ke lewaj ļalem elmakot ko n̄an jipan̄ kom̧ kōļapļo̧k tōmak im lōke eo ami.
Juon, ekkatak. Erom̧ juon rikatak eo ej bōk koņaan. Leļo̧k aolepān am̧ ilo jeje ko rekwojarjar n̄an lukkuun meļeļe mijen im jerbal eo an Kraist. Jeļā katak ko an Kraist bwe kwon maron̄ meļeļe kajoor eo an n̄an mour eo am̧. Lukkun meļeļe im mour kōn m̧ool in ke Pinmuur eo an Jisōs Kraist ej n̄an kwe. Ekar bōk ioon Make burom̧ōj ko ami, bōd ko ami, mōjņo̧ ko ami, im jerawiwi ko ami. Ekar kōļļāiki wōņāān eo im lewaj kajoor eo n̄an kwe bwe kwon kōm̧akūt ak anjo̧ ioon aolep apan̄ ko kwonaaj jelm̧ai. Kwoj bōk kajoor in kōn tōmak eo ami, lōke im m̧ōņōņō in ļoor E.
Kōm̧akūt ak anjo̧ ioon apan̄ ko emaron̄ aikuji juon menin bwilōn̄. Ekkatak kōn menin bwilōn̄ ko. Menin bwilōn̄ ko rej itok ekkar n̄an tōmak eo ami ilo Irooj. Ioļapļap in tōmak in ej lōke Ankilaan im iien eo An—wāween im n̄āāt Enaaj kōjeraam̧m̧an eok kōn jipan̄ in kabwilōn̄lōn̄ eo kwoj kōņaan. Ami jab tōmakenaaj dāpij Anij jān an kōjeraam̧m̧an eok kōn menin bwilōn̄ ko n̄an kōm̧akūt ak anjo̧ ioon apan̄ ko mour eo ami.10
Ilo an ļapļo̧k am̧ ekkatak kōn Rilo̧mo̧o̧r, enaaj pidodoļo̧k n̄an lōke tūriam̧o̧ eo An, iakwe eo An eļap, im An kōkajoorļo̧k, kōmour, im kajoor in lo̧mo̧o̧r. Rilo̧mo̧o̧r eo ej jāmin epaake eok jān n̄e kwoj jelm̧ae ak tallōn̄e juon toļ kōn tōmak.
Ruo, kālet n̄an tōmak ilo Jisōs Kraist. Eļan̄n̄e kwoj pere kōn Anij Jemān im Nejin Ejitōn Bōro ak kōn Jepļaaktok eo ak m̧ool eo kōn kūr eo ekwojarjar an Josep Smith āinwōt juon rikanaan, kālet n̄an tōmak11 im tiljek wōt. Leļo̧k kajjitōk ko ami n̄an Irooj im n̄an kein jipan̄ ko jet retiljek. Ekkatatak kōn ikdeleel n̄an tōmak ijjelo̧k in kōn kōjatdikdik bwe kwomaron̄ loe juon ettonoon ilo nuknuk eo an mour eo an juon rikanaan ak oktak ilo jeje ko rekwojarjar. Bōjrak am̧ kōļapļo̧k pere ko am̧ ilo am̧ kōnono kaki ippān ripere ro jet. Kōtļo̧k an Irooj tōl eok ilo iaļ eo ami n̄an elolo men ko an jetōb.
Jilu, m̧akūtkūt kōn tōmak. Ta eo kwonaaj kōm̧m̧ane eļan̄n̄e ekar ļapļo̧k ami tōmak? Ļōmņak kake. Jeje kake. Innām bōk eļapļo̧k tōmak itok jān am̧ kōm̧m̧ane juon men enaaj aikuji eļapļo̧k tōmak.
Emān, bōk koņaami ilo kain̄i ko rekwojarjar ilo erreo. Kain̄i ko rej kōppeļļo̧k kajoor an Anij n̄an mour eo ami.12
Im ļalem, kajjitōk ippān Jemedwōj Ilan̄, ilo etan Jisōs Kraist, kōn jipan̄.
Tōmak ebōk jerbal. Bōk revelesōn ebōk jerbal. Ak “bwe eo ej kajjitōk ej bōk, im eo ej kappukot ej lo, im eo ej kaļļaļļaļ naaj kappeļļo̧k n̄an e.”13 Anij ejeļā ta eo enaaj jipan̄ tōmak eo ami eddōkļo̧k. Kajjitōk, im bar kajjitōk.
Juon eo ejjab tōmak emaron̄ ba bwe tōmak ej n̄an juon eo emōjņo̧. Ak kōmlet in ej kajejtokjān kajoor eo an tōmak. Rijilōk ro an Rilo̧mo̧o̧r rekar ke wōnm̧aanļo̧k im katakin katak ko An ālkin mej eo An, ilo ibuļōn kauwōtata an mour ko aer, eļan̄n̄e rekar pere E?14 Josep im Hyrum Smith ren kar ke en̄taan kōn mej jān m̧ōrō ilo aer bōbrae Jepļaaktok eo an Kabun̄ eo an Irooj m̧ae iien ekar wōr juon aer kam̧ool em̧ool bwe ekar m̧ool? Turinļo̧k 2,000 rikwojarjar ro renkar ke mej ilo iaļ in paineer eo15 eļan̄n̄e ekar ejjeļo̧k aer tōmak bwe gospel eo an Jisōs Kraist em̧ōj an jepļaaktok? Em̧ool, tōmak ej kajoor eo ej kōmaron̄ jabdewōt men ko rejjāmin kar tōprak bwe ren tōprak.
Jab kadikļo̧k tōmak eo em̧ōj an wōr ippāmi. Ej bōk tōmak n̄an kobatok ilo Kabun̄ in im tiljek wōt. Ej bōk tōmak n̄an ļoore rikanaan ro ijjelo̧kin jeļā ko an rimāletlet im rebun̄bun̄. Ej bōk tōmak n̄an jerbale juon mijen ilo juon iien ej ajedeed nan̄inmej in. Ej bōk tōmak n̄an mour juon mour erreo n̄e laļ in rej kien erreo an An bwe ej kiiō m̧antin etto. Ej bōk tōmak n̄an katakin gospel eo n̄an ajri ro ilo juon laļ ejjab ekwojarjar. Ej bōk tōmak n̄an akweļap kōn mour an juon eo ejitōnbōro im eļapļo̧k tōmak n̄an bōk juon uwaak ejjab kabun̄buruōd.
Ruo iiō ko remootļo̧k, Sister Nelson im n̄an kar kom̧ro kar loļo̧k Samoa, Tonga, Fiji, im Tahiti. Kajjojo āne kein rekar jelm̧ae wōt mijeljel ko ium̧win elōn̄ raan ko. Membōr ro rekar jitlo̧k im jar bwe en jab wōt e kweilo̧k ko aer ko renaaj bōk jikier inabōj.
Ilo Samoa, Fiji, im Tahiti, ke kweilo̧k ko rekar ijjino, ekar bōjrak an wōt. Ak ilo Tonga, ekar jab bōjrak an wōt. Jekdo̧o̧n ak 13,000 Rikwojarjar ro retiljek rekar itok elōn̄ awa ko m̧okta jān kweilo̧k eo im jijet, kōttar wōt ilo jekdo̧o̧n wōt mijeljel eo, innām jijet ilo awa in kweilo̧k ko ruo jekdo̧o̧n wōt.
Kōm ar loe tōmak eo ekajoor ej jerbal llubwilijin riaelōn̄ kein—tōmak eo eļap n̄an kabōjrak wōt eo im tōmak eo n̄an wōnm̧aanļo̧k wōt jekdo̧o̧n n̄e ekar jab bōjrak an wōt.
Apan̄ ko ilo mour ko ad rejjab aolep iien jako ak em̧m̧akūt ilo wāween ak iien eo jekōņaan. Bōtaab tōmak eo ad enaaj aolep iien kōm̧akūt ak iuun kōj m̧aanļo̧k. Tōmak aolep iien ej kōļapļo̧k ad maron̄ tōpar kajoor in Anij.
Jouj im jeļā menin: eļan̄n̄e men otemjej im aolep ro jet ilo laļ in ro kwoj lōke rej wōtlo̧k ak likjab, Jisōs Kraist im Kabun̄ eo An re jāmin likjab jān eok. Irooj ej jāmin mejki, barāinwōt Eban kiki.16 E “ej āinwōt inne, rainin, im [ilju].”17 E ej jāmin meļo̧kļo̧k bujen ko An,18 kallim̧ur ko An, ak iakwe eo An n̄an armej ro An. E ej jerbale menin bwilōn̄ ko rainin im E enaaj jerbale menin bwilōn̄ ko ilju.19
Tōmak ilo Jisōs Kraist ej kajoor eo eļaptata ej pojak n̄an kōj ilo mour in. Men otemjej remaron̄ n̄an er ro rej tōmak.20
Ami eddōkļo̧k ilo tōmak ilo E enaaj kōm̧akūt toļ ko ak anjo̧ jān apan̄ ko—ejjab toļ dekā ko me rej kaiboojoje laļ in ak toļ in burom̧ōj ilo mour ko ami. Ami tōmak enaaj ebbōl im jipan̄ ukōt apan̄ ko n̄an eddōkļo̧k ko rejjab ettōr jelmen doon im iien ko rem̧m̧an.
Ilo Jabōt in Ijtō in, kōn en̄jake ko aō rem̧wilaļ kōn iakwe im kam̧m̧oolol, ij kwaļo̧k aō kam̧ool bwe Jisōs Kraist, em̧ool, em̧ōj an jerkakpeje. Em̧ōj an jerkakpeje n̄an tōl Kabun̄ in An. Em̧ōj an jerkakpeje n̄an kōjeraam̧m̧an mour ko an aolep ajri ro nejin, jekdo̧o̧n ia eo rej jokwe ie. Kōn tōmak ilo E, jemaron̄ kōm̧akūt toļ ko ak anjo̧ jān apan̄ ko ilo mour ko ad. Ij kwaļo̧k aō kam̧ool ilo et eo ekwojarjar etan Jisōs Kraist, amen.