“Pedped in Katak ko an Gospel eo Aō”
Kar kwaļo̧k ilo tukaduin im alikkarin, juon pedped in katak an gospel ej juon katak eo ej pedped ium̧win unin tōl n̄an kōjerbal ilo jim̧we im erreo an anemkwoj in kālet.
Ilo kweilo̧k eo eļap an Kabun̄ eo an Jisōs Kraist im Armej ro Rekwojarjar ilo Raan Ko Āliktata ilo Oktoba 1849, Elder John Taylor jān Doulul eo an Jon̄oulruo Rijilōk ro kar kūr e n̄an kōpeļļo̧k laļ eo an France n̄an kwaļo̧k gospel eo an Jisōs Kraist. Jerbal eo an ekoba kōm̧m̧an kajim̧we im oktak jidik ilo Kabun̄ in jinointata ilo laļ en. Elder Taylor ekar kōpooj im publish i juon ennaan ekadu ilo 1851 n̄an uwaakeļo̧k kajjitōk ko me em̧akijkij aer kajjitōkini kaki kōn Kabun̄ in. Im turin ļo̧k jem̧ļo̧kin jeje ko an, Elder Taylor ekar bar kakeememej kōn ta in ekar waļo̧k:
“Jet iiō ko remootļo̧k, ilo Nauvoo, juon em̧m̧aan ikar ron̄ an kōnnaan, rijerbal in kien, ekar kajjitōk ippān Josep Smith wāween an maron̄ kar tōl elōn̄ armej ro, im n̄an kōjparoki kain laajrak rot in ejejjet; ekar kwaļo̧k ilo ejja iien eo wōt bwe ekar pen n̄an er n̄an kōm̧m̧ane menin ilo aolep jikin. Mr. Smith ekar ba bwe ekar lukkuun pidodo n̄an kōm̧m̧an menin. ‘Elmen?’ em̧m̧aan eo ej ba; ‘n̄an kōm elukkuun pen.’ Mr. Smith ekar uwaak, ‘Ij katakin er pedped in katak ko rejim̧we, im rej tōl er make.’”1
Ij jar bwe Jetōb Kwojarjar eo enaaj katakin im kōketak kajjojo iaad ilo aō kwaļo̧k aorōkin pedped in katak ko ilo jepļaaktok eo an gospel eo an Jisōs Kraist.
Pedped in Katak Ko
Irooj ekar kwaļo̧k n̄an Rikanaan Josep Smith bwe “elder ro, pris ro, im rūkaki ro an kabun̄ in renaaj katakin kōn pedped ko an gospel eo Aō, ko rej pād ilo Baibōļ eo im Bok in Mormon eo, eo ilo e epād tarlep in gospel eo.”2 Ekar bar ba bwe Armej ro Rekwojarjar ilo Raan Ko Āliktata rej aikuj “bōk naan in tōl ilo eļapļo̧k weeppān ilo ļamļam, ilo pedped, ilo katak, ilo kien gospel eo, ilo aolep men ko rej ekkejeltok n̄an aelōn̄ in Anij, im rej mennin aikuj n̄an meļeļe.”3
Kar kwaļo̧k ilo tukaduin im alikkarin, juon pedped in katak an gospel ej juon katak eo ej pedped ium̧win unin tōl n̄an kōjerbal ilo jim̧we im erreo an anemkwoj in kālet. Pedped in katak ko rej itok jān m̧ool ko an gospel im rej letok tōl im jon̄ak ko ilo ad bun̄ m̧aanļo̧k ilo iaļan bujen eo.
N̄an waanjon̄ak, Laajrak in Tōmak ko jilu jinointata rej kwaļo̧k m̧ōttan ko an pedped in katak ko an jepļaaktok eo an gospel eo an Jisōs Kraist: kadkad in doulul in Anij ilo laajrak in tōmak juon, tokjen ko an Wōtļo̧k eo an Adam im Iv ilo laajrak in tōmak ruo, im kōjeraam̧m̧an ko me rekar kūrm̧ool kōn Pinmuur eo an Jisōs Kraist ilo laajrak in tōmak jilu.4 Im laajrak in tōmak emān ej kwaļo̧k kōn pedped in katak ko m̧oktata—unin tōl ko n̄an kōjerbal tōmak ilo Jisōs Kraist im ukweļo̧k—im kain̄i eo jinointata an priesthood eo im ej kōm̧m̧an bwe Pinmuur eo an Jisōs Kraist en bōk jikin ilo mour ko ad.5
Naan in Māletlet ej bar juon waanjon̄ak kōn juon pedped in katak āinwōt juon unin tōl. Jouj im keememej eoon kein rej kōmeļeļeiki ilo jekjen 89 ilo Katak im Bujen Ko.
“Eo letoke kōn juon pedped ippān kallim̧ur, kakkoņkoņ tok n̄an maron̄ an rikwojarjar ro rem̧ōjņo̧ im rem̧ōjņo̧tata, ro rej ak maron̄ kūr er ro rekwōjarjar.
“Lo, em̧ool, āindein Irooj ej ba n̄an kom̧: Ilo waļo̧kin nana ko im kōttōbalbal ko me kōm̧m̧ani im renaaj pād ilo būruōn armej ro renana ilo raan ko āliktata, Iaar kakkōl kom̧, im kakkōl kom̧ im̧aanļo̧k, jān lewōj n̄an kom̧ naan in mālōtlōt in jān revelesōn.”6
Katak ko reim̧we me rej itok ippāntok kadkad in kōmeļeļe in ej letok unin tōl ko n̄an ājmour eo an jim̧or mour in kanniōk im jetōb im kam̧ool kōn kōjeraam̧m̧an ko rekkar pedped ioon ad tiljek n̄an pedped in katak eo.
Ekkatak, meļeļe, im mour kōn pedped in katak ko an gospel eo rej kōkajoorļo̧k tōmak eo ad ilo Rilo̧mo̧o̧r, kam̧wūlaļļo̧k ad wūjlepļo̧k n̄an E, im ej bōktok eļap kōjeraam̧m̧an ko im menin letok ko an jetōb ilo mour ko ad. Pedped in katak ko kōn mour jim̧we im erreo rej bar jipan̄ kōj n̄an erreim̧aanļo̧k ilōn̄inļo̧k kōņaan ko ad im ikdeleel ko ad make ilo an letok jeļā in eaorōk kōn m̧ool indeeo ilo ad jelm̧aeiki jekjek ko rokkotaktak, apan̄ ko, im kālet ko, im men ko jej jelm̧aeiki ilo mour in.
Waanjon̄ak ko Raan Kein Kōn Katakin Pedped in Katak ko Rejim̧we
Ennaan eo jān Rikanaan Josep Smith kōn katakin pedped in katak ko rejim̧we ej bōlen juon iaan katak ko emakijkij aer kouti. Im jej lo waanjon̄ak ko rekajoor kōn jon̄ak in katak ko reim̧we ilo katak ko an rikarejar ro an Irooj remālim rainin.
Pedped in Katak ko Kōn Men ko Rejjab Kōm̧ad
Būreejtōn Dallin H. Oaks ekar kōnono ilo kweilo̧k eo eļap ilo 1998 kōn eddo ko an rikabwijer Priesthood eo an Aron me ej iookļo̧k kōpooj im ajeje kwojkwoj eo. Ekar kōmeļeļeiki pedped in katak eo kōn men ko rejjab kōm̧ad im ekar kwaļo̧k bwe juon rikabwijer Priesthood eo an Aron rejamin kōņaan jabdewōt men ilo paatok eo an make ak m̧wil n̄an kam̧ad jabdewōt membōr ro an Kabun̄ in jān aer kabun̄jar im kōkāāle bujen ko an. Būreejtōn Oaks ekar bar kwaļo̧k aorōkin pedped in katak ko ikkijeen kōlaajrak, erreo, kautiej, im utiej.
Kabwilōn̄lōn̄ eo, Būreejtōn Oaks ekar jab letok n̄an likao ro juon laajrak eaitok kōn ta ko rej aikuj kōm̧m̧ani im ko me rejjab aikuj kōm̧m̧ani. Ijjeļo̧kin, ekar kōmeļeļeiki pedped in katak eo ilo an kōtmene bwe likao ro im ro jineer im jemāer remaron̄ kar im aikuj kōjerbal bōklōkōt eo aer make im im̧we n̄an ļoor unin tōl eo.
Ekar kōmeļeļeiki: “Iban kwaļo̧k kōn kakien ko ilo tipdikin, kōnke jekjek ko ilo kajjojo ward im branch ilo Kabun̄ in ilo aolepān laļ in roktak jon̄an juon kakien me emenin aikuj bwe en kōm̧m̧an ilo juon jikin ejakkar ilo bar juon jikin. Ijjeļo̧kin, inaaj kwaļo̧k juon pedped in katak eo me ej pedped ioon katak ko. Eļan̄n̄e aolep im meļeļe pedped in katak in im kōm̧m̧an ilo inem̧m̧an, ej aikuj bwe en wōr jidik kakien. Eļan̄n̄e kakien ko ak kapilōk ko remenin aikuj ilo jekjek ko kajjojo an armej, ritōl ro ilo jikin ko remaron̄ letoki, jejjet wōt ippān katak ko im pedped in katak ko me rej iookļo̧k.”7
Pedped in Katak eo kōn Raan in Jabōt āinwōt juon Kōkaļļe
Ilo Eprōļ 2015 kweilo̧k eo eļap, Būreejtōn Russell M. Nelson ekar katakin kōj bwe “Jabōt Ej Juon Menin Lan̄lōn̄.”8 Ekar barāinwōt kōmeļeļeik wāween an kar make meļeļe kōn juon pedped in katak em̧m̧an kōn kautiej raan in Jabōt:
“Ewi wāween ad kokwōjarjar raan in Jabōt? Ke iaar lukkuun dik, iaar katak laajrak ko me armej ekkā aer kōm̧m̧ane ikkijeen men ko rej aikuj kōm̧m̧ani im ko rejjab kōm̧m̧ani ilo raan in Jabōt. Eaar jab to jān iien eo ke iaar ekkatak jān jeje ko rekwojarjar bwe makūtkūt im m̧wil ko m̧wilū ilo raan in Jabōt en kwaļo̧k juon kōkaļļe ikōtaaō im Jemedwōj Ilan̄. Kōn aō meļeļe, iaar jab bar aikuj laajrak in ta ko ij aikuj kōm̧m̧ani im ta ko ijjab aikuj kōm̧m̧ani. N̄e ij tin kōm̧m̧ane kālet eo aō n̄an kōm̧m̧ane ak jaab juon makūtkūt ilo raan in Jabōt, ij kajjitōkin eō make, ‘Ta kōkaļļe eo ikōņaan bwe in leļo̧k n̄an Anij?’ Kajjitōk in ekar kōm̧m̧an bwe kālet ko aō kōn raan in Jabōt ren alikkar.”9
Kajjitōk eo an Būreejtōn Nelson eļamwan im ekajoor ej kwaļo̧k aorōkin juon pedped in katak eo me ej eļļā jān jabdewōt men ko rejjab alikkar kōn ta meļeļein im ta eo jej aikuj kōm̧m̧an n̄an kautiej raan in Jabōt. Kajjitōk eo An ej kōkaduduik tok meļeļein juon unin tōl im jon̄an ko me remaron̄ kōjeraam̧m̧an kōj aolep ilo jekjek ko kajjojo jej pād ie.
Pedped in Katak kōn Kōņaan bwe Anij en Anjo̧
Jiljino allōn̄ ko remootļo̧k ilo kweilo̧k eo eļap, Būreejtōn Nelson ekar kōmeļeļeik m̧ōņōņō eo ilo an kar tōlļo̧k e n̄an juon meļeļe ekāāl kōn naan in Israel. Ekar ba n̄an kōj bwe jetōb eo an ekar ļap an im̧we ilo an kar ekkatak bwe lukkuun āt eo etan Israel ej armej eo ej kōņaan bwe Anij en anjo̧ ilo mour eo an.”10 Innem Būreejtōn Nelson ekar kile jet iaan men ko raorōk me rej itok jān jeļā in.
Ennaan eo an kōn kōņaan bwe Anij en Anjo̧ ej juon waanjon̄ak ekabwilōn̄lōn̄ kōn katakin pedped in katak ko rejim̧we bwe jen maron̄ tōl kōj make. Im āinwōt an kar ba ilo ennaan eo an kōn kōm̧m̧an bwe Jabōt en juon menin lan̄lōn̄, Būreejtōn Nelson ekar kwaļo̧k kajjitōk ko me rej pedped ioon pedped in katak ko me rej jerbal āinwōt jet unin tōl im jon̄ak ko n̄an kōj kajjojo.
“Kwoj ke kōņaan bwe Anij en anjo̧ ilo mour eo am̧? Kwoj ke kōņaan bwe kajoor eo an Anij en im̧we mour eo am̧?”
Ekar wōnm̧aanļo̧k wōt:
“Ļōmņake elmen an kōņaan naaj kōjeraam̧m̧an eok. Eļan̄n̄e kwojjan̄in m̧are im kwoj kappukot juon eo m̧ōttam̧ n̄an indeeo, kōņaan eo am̧ bwe en jān ‘Israel’ enaaj jipan̄ eok kālet wōn eo kwoj m̧ōttāiki im elmen.
“Eļan̄n̄e em̧ōj am̧ m̧are n̄an eo m̧ōttam̧ eo em̧ōj an rube bujen ko an, am̧ kōņaan bwe Anij en anjo̧ ilo mour eo am̧ enaaj kōtļo̧k bwe bujen ko am̧ ippān Anij rejamin jako. Rilo̧mo̧o̧r enaaj kōmour bōro ko rerub. Lan̄ ko renaaj peļļo̧k ilo am̧ kappukot n̄an jeļā elmen bun̄ m̧aanļo̧k. Kwojjab aikuj in bwilōn̄ ak ļōmņak.
“Eļan̄n̄e ewōr am̧ kajjitōk em̧ool kōn gospel in ak Kabun̄ in, ilo am̧ kālet bwe Anij en anjo̧, kwonaaj tōlļo̧k n̄an lo im lukkuun meļeļe, m̧ool ko indeeo me renaaj tōl mour eo am̧ im jipan̄ eok dāpdep wōt ilo iaļen bujen in.
“N̄e kwoj ioon kapo—em̧ool n̄e kapo rej itok n̄e kwoj m̧ōk ak ajimakeke ak jab meļeļe—ļōmņake ļo̧k ke kwomaron̄ bōk peran ilo am̧ kālet bwe Anij en anjo̧ ilo mour eo am̧ ilo am̧ akweļap n̄an E n̄an kōkajoorļo̧k eok.
“N̄e ikdeleel eo am̧ eļap bwe Anij en anjo̧, n̄an m̧ōttan Israel, elōn̄ kālet ko remaron̄ pidodo. Elōn̄ men in kōnono ko rej jino erom̧ jab unin kōnono ko! Kwojeļā ewi karbab eo am̧ make. Kwojeļā ta eo n̄an alooje im riiti, ia n̄an joļo̧k am̧ iien, im ro kwoj iaio̧ ippāer. Kwojeļā ta eo kwoj kōņaan n̄an kadedeļo̧k. Kwojeļā kain rot armej eo kwoj kōņaan āinwōt.”11
Je jete kālet ko raorōk im men ko kwar iooni remaron̄ im̧we jān pedped in katak eo kōn kōņaan bwe Anij en Anjo̧: jerā im m̧are, kajjitōk im abōņōņō ko kōn gospel in, kapo ko, erreo am̧ make, ta eo n̄an alooje im riiti, ia n̄an joļo̧k iien ko, ippān ro n̄an iiaiio im elōn̄, elōn̄ men ko jet. Kajjitōk ko reim̧we an Būreejtōn Nelson ej kwaļo̧k aorōk in juon pedped in katak eļam waan ej letok tōl ilo aolep m̧ōttan ko ilo mour ko ad im kōmaron̄ kōj n̄an tōl kōj make.
Juon Jila Ekanooj Dik
Ke Josep Smith ekar pād ilo Kalbuuj Liberty, ekar je leta in kōmeļeļe ko n̄an membōr im ritōl ro an Kabun̄ in im kakeememej er bwe “juon wa eļap ekanooj jeraam̧m̧an jān juon jila ekanooj dik ilo iien an lan̄ bun̄, jān wōt kajebwābweiki ippān kōto eo im ņo ko.”12
Juon “jila” ej juon jōbwe im kein jerbal ko jet rekillep n̄an kōjerbwābweik juon tima ak juon ļoon. Im “kōjebwābweik ippān kōto eo im ņo ko” ej kōjebwābweik juon tima bwe en maron̄ dāpij wōt an peļan im jab pedo ilo iien an lan̄ bun̄.
Pedped in katak ko an gospel eo rej n̄an n̄a im kwe ta eo juon jila ej n̄an juon tima. Pedped in katak ko rejim̧we rej kōmaron̄ kōj n̄an kappukot iaļad im n̄an jutak pen im dim, im jab m̧akūtkūt bwe jejjab ellālee im wōtļo̧k ilo ļan̄ ko remarok rekōmetak im tarpok ko ilo raan ko āliktata.
Em̧ōj kōjeraam̧m̧an kōj eļap ilo kweilo̧k in eļap n̄an ekkatak kōn pedped in katak ko indeeo jān rikarejaran Irooj ro ewōr aer mālim. Kiiō, eddo ko ad kajjojo ej n̄an tōl kōj make n̄an m̧ool ko me em̧ōj kam̧ool kaki.13
Naan in Kam̧ool
Būreejtōn Ezra Taft Benson ekar katakin, “Ilowaan jiljino allōn̄ ko rej pedotok, bok kape in kweilo̧k eo am̧ ak [Liaonaej aikuj jutak turin bok ko jet rekwojarjar an kabun̄ in im en emakijkij am̧ lali im kōjerbali.”14
Kōn aolepān kajoor in jetōb eo aō, ij kūr aolep kōj n̄an ekkatak, mour im iakwe pedped in katak ko an mour jim̧we. M̧ool ko wōt an gospel in emaron̄ kōmaron̄ kōj n̄an “m̧ōņōņō ko im rej pād ilo ad kajoor” n̄an bun̄ m̧aanļo̧k ilo iaļan bujen eo im n̄an “lo lo̧mo̧o̧r an Anij, im n̄an an kwaļo̧k Pein.”15
Ijeļā bwe katak ko im pedped in katak ko an gospel eo an Jisōs Kraist rej kein jipan̄ n̄an bōk tōl kōn mour ko ad im niknik ilo lan̄lōn̄ ilo mour in im mour indeeo. Im ilo Jabōt in Ijtō in Eaiboojoj, ij m̧ōņōņō ilo aō kam̧ool bwe ad Rilo̧mo̧o̧r emour ej Ij kam̧ool menin ilo et eo ekwojarjar etan Irooj Jisōs Kraist, amen.