Ij Mōņōņō in Lo Tampeļ eo
Ej wōt ilo tampeļ eo me jemaron̄ bōk jeļā eo ewāppen kōn koneekjen ko an baam̧le me emaron̄ wōnm̧aanļo̧k ālikin mej im n̄an indeeo.
Ro jeiū im jatū rejitōn bōro, ij kam̧m̧oolol bwe imaron̄ pād ippāmi ilo m̧wen̄an in kein kajuon an kweilo̧k in eļap. Rikōnono ro, al ko, im jar eo ekar em̧ōj an boktok Jetōb—barāinwōt juon en̄jake in meram im kōjatdikdik.
En̄jake eo ej bōklikļo̧k eō n̄an emeemļo̧kijeņ eo aō kōn raan eo m̧oktata in aō deļo̧n̄eļo̧k Salt Lake Temple. Iar juon likao. Jinō im jema rekar kōm̧pānien ro wōt aō raan eo. Ilowaan, juon rijerbal in tampeļ ekar kabōjrak er ilo jidik iien n̄an karuwaineneik er. Ikar etal wōt jān er, makeļo̧k iaaō ilo jidik iien.
Kar karuwaineneik eō jān juon kōrā ekadu im uwwaņ eo ej kōņak juon nuknuk in tampeļ aibojooj. Eaar reilōn̄ tak n̄an eō im ettōn̄ dikdik innem kar mera an ba, “Ruwainene n̄an tampeļ in, Brother Eyring.” Ikar ļōmņak jidik bwe e ekar juon enjeļ kōnke ekar jeļā etta. Ikar jab jeļā bwe juon kaat jidikdik ewōr etta ie kar likūt ilo kopā eo aō.
Ikar etalļo̧k wōt jān e im bōjrak. Ikar reilōn̄ļo̧k n̄an ceiling eo emouj im utiej me ekar kōm̧m̧an bwe ruum̧ eo en meram jon̄an āinwōt n̄e ekar peļļo̧k n̄an lan̄. Im ilo iien eo, ļōmņak eo ekar itok n̄an kōļmenļo̧kijeņ eo aō kōn naan kein ralikkar: “Em̧ōj aō kar pād ijin emeram m̧oktalo̧k.” Bōtaab em̧ōkaj an itok n̄an kōļmenļo̧kijeņ eo aō, ejjab ilo ainikiō make, naan kein: “Ejjab, kojjan̄in kar pād ijin m̧oktatļo̧k. Kwoj keememej juon iien m̧okta jān am̧ kar ļotak. Kwaar pād ilo juon jikin ekwojarjar āinwōt in.”
Ilo nabōj in aolep ad tampeļ, jej likūt naan kein “Kwojarjar n̄an Irooj.” Ijeļā n̄an n̄a make bwe naan ko rem̧ool. Tampeļ eo ej juon jikin ekwojarjar ijo revelesōn epidodo an itok n̄an kōj eļan̄n̄e būruōd rej peļļo̧k n̄an e im jej erreo n̄an e.
Tokālik ilo raan eo m̧oktata ikar bar juon alen en̄jake ejja Jetōb eo wōt. Kōjeraam̧m̧an eo an tampel eo ekoba jet naan ko me rej boktok juon okmāņāān in en̄jake ilo būruō, kalikkar bwe ta eo ekar bōk jikin em̧ool. Ta eo ikar en̄jake ekar aorōk n̄an n̄a make kōn ilju im jekļaj eo aō, im ekar erom̧ juon men em̧ool an 40 iiō ko tokālik kōn juon kūr n̄an jerbal n̄an Irooj.
Ikar en̄jake ejja en̄jake eo wōt ke ikar m̧are ilo Logan Utah Tampeļ. Būreejtōn Spencer W. Kimball ekar kōm̧m̧ane liāp eo. Ilo naan ko reiet ekar ba, ekar letok kapilōk in “Hal im Kathy, mour bwe n̄e eitok kūr eo, emaron̄ pidodo am̧iro ilo̧k.”
Ilo an ba naan ko reiet, ekar alikkar aō loe ilo kōļmenļo̧kijeņ eo aō, ilo alikkar in kōļar, juon tōļ ekom̧laļ im juon iaļ lōn̄ļo̧k n̄an lōn̄tata. Juon oror emouj ej ettōrļo̧k ilo tuanmiin̄ in turājet in iaļ eo im jakoļo̧k ilo wōjke ko rej ekkar ilo lōn̄ in tōļ eo. Juon em̧ mouj ejjab alikkar an waļo̧k ibuļōņ wōjke ko.
Juon iiō tokālik, ikar kile tōļ eo ke jemen kōrā eo ippa ej ettōr lōn̄ļo̧k kake kōm ilo iaļ eo. Ikar loe meļeļein ta eo ikar loe ke Būreejtōn Kimball ekar leļo̧k naan in kapilōk eo an ilowaan tampeļ eo.
Ke kōm ekar tōprakļo̧k lōn̄tata in tōļ eo, jemen kōrā eo ippa ekar bōjrakļo̧k tūrin em̧ mouj eo. Ekar ba n̄an kōm bwe e im kōrā eo pāleen rej wiaki jikin eo im bwe ekōņaan bwe n̄a im ledik eo nejin kom̧ro en jokwe ilo m̧ōn rilotok eo. Renaaj kar jokwe ilo m̧weo eļap, jejjo wōt ne ettoļo̧k. Kōn menin, ilowaan 10 iiō ko kōm kar jokwe ilo jikin eo em̧m̧an an baam̧le, n̄a im korā eo pāleeō kajoor ba aolep raan, “Jej aikuj m̧ōņōņō ilo menin kōnke eban aitok arro pād ijin.”
Juon kūr ekar itok jān Church commissioner of education, Neal A. Maxwell. Kakōl eo kar letok jān Bureejtōn Kimball n̄an maron̄ “pidodo am̧iro ilo̧k” ekar kūrm̧ool. Ekar juon kūr n̄an em̧m̧akūt jān ta eo ilo kalimjōkļo̧k juon jekjek eo ekam̧ōņōņō an juon make n̄an jerbal ilo juon ijjitōn̄ ilo juon jikin me ejjeļo̧k aō jeļā kake. Baam̧le eo am ekar pojak n̄an em̧m̧akūt jān iien im jikin eo ejeram̧m̧an kōnke juon rikanaan, ilo juon tampeļ ekwojarjar, juon jikin revelesōn, ekar lo juon iien eļap ilju im jōkļaj eo im jenaaj kar pojak n̄ane.
Ijeļā bwe tampeļ ko an Irooj rej jikin ko rekwojarjar. Un eo aō rainin ilo aō kōnono kōn tampeļ ko ej n̄an kōļapļo̧k ikdeelel eo am̧ im aō n̄an erreo im pojak n̄an iien ko rem̧m̧an im rellōn̄ n̄an en̄jake ko an tampeļ me rej itok wōt n̄an kōj.
N̄an n̄a, kōketak eo eļaptata n̄an erreo n̄an bōk en̄jake ko an tampel ej ta eo Irooj ekar ba kōn mo̧ko Im̧ōn rekwojarjar:
“Toun wōt an armej ro Aō kalōk juon em̧ n̄an Eō ilo etan Irooj, im jab kōtļo̧k jabdewōt men ettoon n̄an itok n̄an e, bwe en jab ettoonon, Aō aiboojoj enaaj pād ioon;
“Aaet, im Inaaj pād ijo, bwe Inaaj itok n̄an e, im aolep ro erreo būrueer renaaj itok n̄an e naaj lo Anij.
“A eļan̄n̄e ej ettoonon I ban itok n̄an e, im Aō aiboojoj ejamin pād ijo; bwe Ij jamin itok ilo tampeļ ko rejjab kwōjarjar.”1
Bureejtōn Russell M. Nelson ekar kalikkar n̄an kōj bwe jemaron̄ “lo” Rilo̧mo̧o̧r ilo tam̧peļ eo ilo ļōmņak eo bwe Ej erom̧ juon eo ejako ad jaje kajjeen. Būreejtōn Nelson ekar ba menin: “Jemeļeļe kōn E. Jemeļeļe kōn jerbal eo An im aiboojoj eo An. Im jej jinoe en̄jake kajoor eo eļap in mour eo An ejjeļo̧k āinwōt.”2
Eļan̄n̄e kwe ak kojero enaaj etal n̄an tampeļ ilo an jabwe ad erreo, jeban maron̄ lo, kōn kajoor eo an Jetōb Kwojarjar, katak ko ilo jetōb kōn Rilo̧mo̧o̧r me jemaron̄ bōki ilowaan tam̧peļ eo.
N̄e jej erreo n̄an bōk katak rōt in, ijo emaron̄ eddōkļo̧k kōn en̄jake eo ad ilo tampeļ kōjatdikdik, lan̄lōn̄, im kōjatdikdik kōn ilju eo em̧m̧an ilo aolepān mour ko ad. Kōjatdikdik eo, lan̄lōn̄, im kōjatdikdik kōn ilju eo em̧m̧an rej pād wōt ilo ad būki kain̄i ko rej kōm̧m̧an ilo tampel ko rekwojarjar. Ej wōt ilo tampeļ eo me jemaron̄ bōk jeļā eo ewāppen kōn koneekjen ko an baam̧le me emaron̄ wōnm̧aanļo̧k ālikin mej im n̄an indeeo.
Iiō ko remootļo̧k, ke ikar jerbal āinwōt juon bisop, juon likao lōkatu ekar kejool kūr eo aō n̄an erom̧ erreo n̄an mour ippān Anij ilo baam̧le ko n̄an indeeo. Ilo juon jekjek in kabbwil ekar ba n̄an n̄a kōn iien ko rem̧m̧an an ippān ro m̧ōttan. Ikar kōtļo̧k bwe en kōnono. Innem ekar ba n̄an n̄a kōn juon iien ilo juon iaan bade ko an, ilo ibuļōņ ainikien eo ekawaron̄ron̄, ke ekar m̧ōkaj an kile bwe ekar en̄jake an make iaan. Ikar kajitōk ippān ta eo ekar waļo̧k. Ekar ba bwe ekar keememej juon iien ke ekar juon ļaddik jidikdik, ekar jijet ioon neen jinen, im pein jinen ej jepooļe. Ejjab to ilo iien eo ekar ba kōn bwebwenato in, ekar jino to̧o̧r dānin mejān. Ikar ba n̄an e ta eo ijeļā bwe ej m̧ool: “Iaļ eo de eo wōt n̄an am̧ maron̄ bōk en̄jake eo me aorōk an baam̧le n̄an indeeo ej n̄an erom̧ erreo ippam̧ make im jipan̄ ro jet bōk kain̄i ko in liāp ilo tampel.”
Jejjab jeļā dipdikin meļeļe ko kōn ekkeijel ko an baam̧le ilo laļ eo an jetōb ak ta eo enaaj itok ālkin jerkakpeje. Ak jejļā bwe rikanaan Elijah ekar itok āinwōt kar kallim̧ur n̄an ukōtļo̧k būruōn ro jemāer n̄an ro nejier im ro nejier n̄an ro jemāer.3 Im jejļā bwe m̧ōņōņō indeeo eo ad ej pedped wōt ioon ad kōm̧m̧an ijo jemaron̄ e n̄an leļo̧k ejja m̧ōņōņō in ejjeļo̧k jem̧ļo̧kin n̄an jon̄an wōt eo jemaron̄ e n̄an ro jibūd im jim̧m̧ad.
Ij en̄jake ejja ikdeelel eo n̄an tōprak ilo aō karuwaineneik ro uwaan baam̧le eo aō rej mour wōt n̄an erom̧ erreo n̄an bōk im n̄an kautiej kain̄i in liāp ko an tampeļ. En̄in ej m̧ōttan kalliim̧ur eo n̄an aiintok doon Israel ilo raan ko āliktata jim̧or ilo jait ko in ran̄ōl eo.
Juon iaan iien ko rem̧m̧antata ej n̄e ro uwaan baam̧le ko ad rej iddik wōt. Rej ļotak kōn meram eo an Kraist āinwōt juon mennin letok. Ej kōm̧m̧an bwe ren jeļā ta em̧m̧an im ta eo enana. Kōn un in, aaet loe juon tam̧peļ ak juon pija in tam̧peļ emaron̄ kaddōk juon ikdeelel ilo juon ajri n̄an bōk kōjeraam̧m̧an eo n̄an deļo̧n̄ e juon raan.
Raan eo emaron̄ kiiō naaj itok n̄e, āinwōt juon jodikdik, rej bōk juon peba in mālim n̄an deļo̧n̄e tampeļ eo n̄an kōm̧m̧ane peptaij ko an ro remej ilo tam̧peļ eo. Ilo jekjek eo, en̄jake ko aer remaron̄ eddōļo̧k bwe kain̄i ko an tampeļ rej aolep iien jitōn̄ļo̧k Rilo̧mo̧o̧r im Pinmuur eo An. Ilo aer en̄jake aer leļo̧k an juon armej ilo laļ en an jetōb bar juon iien em̧m̧an n̄an erreo jān jerawiwi, en̄jake eo aer n̄an jipan̄ Rilo̧mo̧o̧r ilo jerbal in An ekwojarjar in kōjeraam̧m̧an ajri nejin Jemedwōj Ilan̄ enaaj eddōkļo̧k.
Em̧ōj aō loe kajoor eo an en̄jake in an ukot juon jodikdik. Iiō ko rem̧ootļo̧k ikar ital ippān juon nejū leddik n̄an tampeļ ilo ālkin rāelep. Kar e eo āliktata n̄an peptaij n̄an rimej ilo jikin peptaij eo. Kar kajjitōk ippān ledik eo nejū eļan̄n̄e emaron̄ katoikļo̧k an pād n̄an kadedeļo̧k aolep kain̄i ko n̄an aolepen armej ro em̧ōj kōpooj etāer. Leddik in ekar ba aaet.
Iaar lale an leddik jidikdik eo nejū deļo̧n̄eļo̧k jikin peptaij eo. Peptaij ko rekar ijjinoe. Ledik jidikdik eo nejū ekar to̧o̧r dān jān mejān kajjojo iien rej lelōn̄tak jān dān eo. Kar kajjitōk ippān alen im bar alen, “Komaron̄ ke kōm̧m̧ane elōn̄ļo̧k?” Kajjojo iien leddik in ekar ba aaet.
Āinwōt juon jemen eo ej inepata, ikar jino kōjatdikdik bwe renaaj kar kōtļo̧k e jān an kōm̧m̧ane elōn̄ļo̧k. Ak ij kemeemej an kar dim wōt ke rekar bar kajjitōk ippān eļan̄n̄e emaron̄ kōm̧m̧ane elōn̄ļo̧k im ekar ba ilo juon ainikien edik e peran, “Aaet.” Ekar pād m̧ae armej eo āliktata ilo laajrak eo raan eo ekar bōk kōjeraam̧m̧an in peptaij ilo etan Jisōs Kraist.
Ke ikar etal jān tampeļ eo ippān bon̄in eo, ikar bwilōn̄ kōn ta eo ikar loe. Juon ajri kar kōketak e im ukōte im̧aan meja ilo an jerbal n̄an Irooj ilo m̧weo Im̧ōn. Ij kemeemej wōt en̄jake in meram im aenōm̧m̧an ilo am̧ro kar jim̧or etal jān tampeļ eo.
Emootļo̧k elōn̄ iiō. Ej ba wōt aaet n̄an kajjitōk eo jān Irooj eļan̄n̄e emaron̄ kōm̧m̧ane elōn̄ļo̧k n̄an E n̄e ej lukkuun in pen. En̄in ej ta eo jerbal in jipan̄ ilo tampeļ emaron̄ kōm̧m̧ane n̄an ukōt im kotak kōj. En̄in ej unin kōjatdikdik eo aō n̄an eok im n̄an aolepān baam̧le eo ejitōnbōro am̧ ej bwe kwonaaj eddōkļo̧k ilo ikdeelel im peran n̄an erreo n̄an etal n̄an m̧weo im̧ōn Irooj jon̄an ikutkut in wōt ekkar n̄an jekjek ko kwoj pād ie.
E ekōņaan karuwaineneik eok ijeņ. Ij jar bwe kwonaaj kajjieon̄ kalōk ikdeelel ilo būruōn ajri ro nejin Jemedwōj Ilan̄ n̄an etal n̄an ijo, ijo remaron̄ en̄jake aer epaakeļo̧k E, im bwe kwonaaj bar āinwōt kūr ro jibūm̧ im jim̧m̧am̧ n̄an maron̄ in bar mour Ippān im ippem̧ n̄an indeeo.
Naan kein remaron̄ ad:
Ij m̧ōņōņō in lo tampeļ eo.
Ij etal n̄ane ijo juon raan
N̄an en̄jake Jetōb Kwojarjar,
N̄an ron̄jake im n̄an jar.
Bwe tampeļ eo ej juon im̧ōn Anij,
Juōn jikin iakwe im aiboojoj.
Inaaj Kōppopo ilo tōre eo ij em̧m̧an ded;
En̄in ej eddo eo aō ekwojarjar.4
Ij kwaļo̧k aō kam̧ool bwe jej ajri ro nejin Jemedwōj Ilan̄ eo ej iakwe kōj. E ekar kālet Eo Jitōn bōro Nejin, Jisōs Kraist, bwe en ad Rilo̧mo̧o̧r im Ripinmuur. Iaļ eo wōt n̄an jepļaak im mour Ippāer im ippān baam̧le ko ad ej ilo kain̄i ko an tampeļ eo ekwojarjar. Ij kam̧ool bwe Būreejtōn Russell M. Nelson ej kabwijer im kōjerbal aolepān kii ko an priesthood me ej kōm̧m̧an bwe mour indeeo en peļļo̧k n̄an aolepān ajri ro nejin Anij. Ij kwaļo̧k aō kam̧ool ilo et eo ekwojarjar etan Jisōs Kraist, amen.