គោលការណ៍ទាំងឡាយនៃដំណឹងល្អរបស់យើង ( គោលលទ្ធិ និង សេចក្តីសញ្ញា ៤២:១២ )

ការដកស្រង់

អែលឌើរ ដេវីឌ អេ បែដណា

ក្នុងកូរ៉ុមនៃពួកសាវកដប់ពីរនាក់

គោលការណ៍នៃដំណឹងល្អគឺជាសេចក្ដីណែនាំមួយដែលផ្អែកលើគោលលទ្ធិ ដើម្បីឲ្យអនុវត្តសិទ្ធិជ្រើសរើសខាងសីលធម៌តាមផ្លូវសុចរិត ។ គោលការណ៍ទាំងឡាយគឺដកស្រង់ពីសេចក្ដីពិតដ៏ទូលំទូលាយនៃដំណឹងល្អ ហើយផ្ដល់ការដឹកនាំ និងបទដ្ឋាន កាលយើងឈានទៅមុខនៅលើផ្លូវនៃសេចក្ដីសញ្ញា ។…

ការរៀនសូត្រ ការយល់ដឹង និងការរស់នៅតាមគោលការណ៍ទាំងឡាយនៃដំណឹងល្អ ពង្រឹងដល់សេចក្ដីជំនឿរបស់យើងលើព្រះអង្គសង្គ្រោះ បង្កើនភក្ដីភាពរបស់យើងលើទ្រង់ ហើយនាំឲ្យមានពរជ័យ និងអំណោយទានខាងវិញ្ញាណដ៏ច្រើនសន្ធឹកមកក្នុងជីវិតយើង ។ គោលការណ៍នៃសុចរិតភាពក៏ជួយយើងឲ្យមើលហួសពីចំណូលចិត្តផ្ទាល់ខ្លួនរបស់យើង និងបំណងប្រាថ្នាដែលគិតតែពីខ្លួនឯង តាមរយៈការផ្ដល់ទស្សនវិស័យដ៏មានតម្លៃអំពីសេចក្ដីពិតដ៏អស់កល្ប កាលយើងឆ្លងកាត់កាលៈទេសៈ ឧបសគ្គ ការសម្រេចចិត្ត និងបទពិសោធន៍នៃជីវិតរមែងស្លាប់នេះផ្សេងៗគ្នាផងដែរ ។…

នៅពេល យ៉ូសែប ស្ម៊ីធ បានជាប់នៅក្នុងគុកលិបើទី លោកបានសរសេរសំបុត្រណែនាំសមាជិក និងថ្នាក់ដឹកនាំសាសនាចក្រ ហើយរំឭកពួកគេថា « សំពៅដ៏ធំបានទទួលជំនួយពីចង្កូតដ៏តូចក្នុងកាលមានខ្យល់ព្យុះ ដោយសារដំណើរប្រក្រតីនឹងខ្យល់ និងរលក » [ គោលលទ្ធិ និង សេចក្ដីសញ្ញា ១២៣:១៦ ] ។

« ចង្កូត » គឺជារង្វង់កាំមួយ ឬដៃចង្កូត និងជាឧបករណ៍ទាក់ទងដែលប្រើដើម្បីកាច់ចង្កូតសំពៅ ឬទូក ។ ហើយ « ដំណើរប្រក្រតីនឹងខ្យល់ និងរលក » សំដៅលើការបត់សំពៅដើម្បីឲ្យវារក្សាលំនឹង ហើយមិនក្រឡាប់នៅពេលមានខ្យល់ព្យុះ ។

សម្រាប់ខ្ញុំ និងបងប្អូន គោលការណ៍នៃដំណឹងល្អគឺដូចជាចង្កូតសម្រាប់សំពៅ ។ គោលការណ៍ត្រឹមត្រូវធ្វើឲ្យយើងរកឃើញផ្លូវរបស់យើង ហើយឈរយ៉ាងរឹងមាំ ខ្ជាប់ខ្ជួន និងមិនរង្គោះរង្គើ ដើម្បីកុំឲ្យយើងបាត់បង់លំនឹងយើង ហើយដួលក្នុងព្យុះនៃភាពងងឹត និងការភាន់ច្រឡំនៅថ្ងៃចុងក្រោយដ៏ឃោរឃៅនេះ ។