« ចិត្តចងក្រងរួមគ្នា » ដើម្បីកម្លាំងនៃយុវជន ខែ ឧសភា ឆ្នាំ ២០២១ ។
សម័យប្រជុំ
ចិត្តចងក្រងរួមគ្នា
ការដកស្រង់
នៅពេលបានសួរថា « លោកគ្រូ ក្នុងបណ្តាក្រឹត្យវិន័យ តើបញ្ញត្តិណាដែលសំខាន់បំផុត ? » ព្រះអង្គសង្គ្រោះបានឆ្លើយថា « ត្រូវឲ្យស្រឡាញ់ព្រះអម្ចាស់ជាព្រះនៃឯងឲ្យអស់អំពីចិត្ត » បន្ដដោយ « ត្រូវឲ្យស្រឡាញ់អ្នកជិតខាងដូចខ្លួនឯង » [ ម៉ាថាយ ២២:៣៦–៣៩ ] ។ ព្រះបន្ទូលឆ្លើយតបរបស់ព្រះអង្គសង្គ្រោះពង្រឹងកាតព្វកិច្ចស្ថានសួគ៌របស់យើង ។ ព្យាការីពីបុរាណមា្នក់បានបង្គាប់ថា « មិនគួរឲ្យមានការទាស់ទែងគ្នាទៅវិញទៅមកឡើយ តែថា [ យើង ] គួរតែមើលទៅមុខ …[ យើង ] មានចិត្ត ចងក្រងរួមគ្នា ដោយសាមគ្គី ហើយស្រឡាញ់គ្នាទៅវិញទៅមក » [ ម៉ូសាយ ១៨:២១, ការគូសបញ្ជាក់បានបន្ថែម] ។…
ឥឡូវនេះសម្រាប់យុវជន និងយុវនារី នៅពេលប្អូនកាន់តែធំឡើង ការលេងសើចចំពោះអ្នកដទៃអាចក្លាយទៅជាគ្រោះថ្នាក់យ៉ាងខ្លាំង ។ ការថប់បារម្ភ ការធ្លាក់ទឹកចិត្ត ហើយអ្វីកាន់តែអាក្រក់ជាងនេះច្រើនតែជាការសម្លុតគំរាម ។…
ច្បាស់ណាស់ មារសត្រូវកំពុងប្រើវិធីនេះដើម្បីធ្វើបាបជំនាន់របស់ប្អូន ។ វាមិនសមរម្យទេ ដែលមានរឿងនេះនៅក្នុងបណ្តាញអ៊ីនធឺណិត នៅក្នុងភូមិ សាលារៀន កូរ៉ុម ឬថ្នាក់ផ្សេងៗរបស់ប្អូននោះ ។ សូមធ្វើឲ្យអស់ពីសមត្ថភាពដើម្បីធ្វើឲ្យកន្លែងទាំងនេះកាន់តែមានចិត្តមេត្តា និងមានសុវត្ថិភាពឡើង ។…
… នៅពេលប្អូនប្រាស្រ័យទាក់ទងជាមួយមនុស្សដទៃដោយចិត្តសប្បុរស ដោយយកចិត្តទុកដាក់ និងមានចិត្តមេត្តា សូម្បីតែតាមរបៀបឌីជីថលក្តី ខ្ញុំសូមសន្យាថា ប្អូននឹងជួយលើកដៃដែលស្រពន់ឡើង និងជួយព្យាបាលបេះដូង ។…
មិនថាយើងអាយុប៉ុន្មាននោះទេ សូមយើងទាំងអស់គ្នាខិតខំឲ្យអស់ពីសមត្ថភាពរបស់យើង ។
នៅពេលប្អូនព្យាយាមមានការប្រាស្រ័យទាក់ទងដោយក្តីស្រឡាញ់ ការគោរព និងសេចក្ដីសប្បុរសក្ដី ក៏ប្អូននៅតែរងការឈឺចាប់ ឬរងផលប៉ះពាល់អវិជ្ជមានដដែល មកពីជម្រើសមិនល្អរបស់អ្នកដទៃទៀត ។ តើយើងត្រូវធ្វើដូចម្តេច ? យើងធ្វើតាមការដាស់តឿនរបស់ព្រះអម្ចាស់ឲ្យ « ស្រឡាញ់ពួកខ្មាំងសត្រូវ … ហើយអធិស្ឋានឲ្យអ្នកណាដែលធ្វើទុក្ខអ្នក » [ លូកា ៦:២៧–២៨ ] ។
នៅពេលការលំបាក និងទុក្ខវេទនាបានកើតមកលើយើងតាមរយៈការរិះគន់ ភាពអវិជ្ជមាន ឬសូម្បីតែការមានបំណងអាក្រក់ក្ដី ក៏យើងអាចជ្រើសរើសដើម្បីមានសេចក្តីសង្ឃឹមលើព្រះគ្រីស្ទបានដែរ ។ សេចក្តីសង្ឃឹមនេះកើតចេញពីការអញ្ជើញ និងការសន្យារបស់ទ្រង់ថា « ចូរសង្ឃឹមឡើង ដ្បិតយើងនឹងដឹកនាំអ្នករាល់គ្នា » [ គោលលទ្ធិ និង សេចក្ដីសញ្ញា ៧៨:១៨ ] ហើយថាព្រះអង្គនឹងធ្វើឲ្យសេចក្ដីវេទនាទាំងឡាយរបស់បងប្អូន ក្លាយទៅជាផលប្រយោជន៍ដល់បងប្អូនវិញ [ សូមមើល នីហ្វៃទី២ ២:២ ] ។