អ្វីដែលយើងកំពុងរៀននឹងមិនភ្លេចឡើយ

ការដកស្រង់

ប្រធាន រ័សុល អិម ណិលសុន

ប្រធានសាសនាចក្រនៃព្រះយេស៊ូវគ្រីស្ទពួកបរិសុទ្ធថ្ងៃចុងក្រោយ

លើកចុងក្រោយដែលយើងមានសម័យប្រជុំបព្វជិតភាពក្នុងសន្និសីទទូទៅគឺកាលពីខែ មេសា ឆ្នាំ ២០១៩ ។ មានអ្វីៗជាច្រើនបានកើតឡើងក្នុងរយៈពេលពីរឆ្នាំកន្លងទៅនេះ !…

… សូមឲ្យខ្ញុំប្រាប់មេរៀនបួន ដែលខ្ញុំសង្ឃឹមថាយើងទាំងអស់គ្នាបានរៀន ហើយនឹងមិនភ្លេចឡើយ ។

មេរៀនទី ១ ៖ គេហដ្ឋានគឺជាទីកន្លែងដ៏សំខាន់នៃសេចក្តីជំនឿ និងការថ្វាយបង្គំ…

… ការរឹតបន្តឹងលើការជួបជុំបច្ចុប្បន្ននេះនៅទីបំផុតនឹងត្រូវបញ្ចប់ ។ ទោះជាយ៉ាងណាក្តី ការប្តេជ្ញាចិត្តរបស់បងប្អូនដើម្បីធ្វើឲ្យគេហដ្ឋានរបស់បងប្អូនជាទីកន្លែងដ៏បរិសុទ្ធនៃសេចក្តីជំនឿ ដ៏សំខាន់ នឹង មិនដែល បញ្ចប់ទៅឡើយ ។…

មេរៀនទី ២ ៖ យើងត្រូវការគ្នាទៅវិញទៅមក

… យើងអាចសម្រេចបានច្រើនឥតគណនា នៅពេលយើងមានសាមគ្គីភាព ជាជាងពេលយើងនៅតែម្នាក់ឯង ។ ផែនការនៃសុភមង្គលរបស់ព្រះនឹងត្រូវបង្អាក់ ប្រសិនបើកូនចៅរបស់ទ្រង់នៅឆ្ងាយពីគ្នានោះ ។…

ប្រសិនបើបងប្អូនដឹងថា នរណាម្នាក់កំពុងឯកា សូមជួយ—ទោះជាខ្លួនបងប្អូនកំពុងតែមានអារម្មណ៍ថាឯកាក្តី !…

មេរៀនទី ៣ ៖ ការប្រជុំកូរ៉ុមរបស់បងប្អូនគឺមានអត្ថន័យលើសពីការប្រជុំធម្មតាឆ្ងាយណាស់

… ការប្រជុំទាំងឡាយគ្រាន់តែជាផ្នែកតូចមួយនៃអត្ថន័យរបស់កូរ៉ុម និងអ្វីដែលកូរ៉ុមអាចធ្វើប៉ុណ្ណោះ ។

… កូរ៉ុមគឺជាមុខតំណែងដ៏ពិសេសដើម្បីពន្លឿនការប្រមូលផ្តុំនៃអ៊ីស្រាអែលទាំងសងខាងវាំងនន ។

មេរៀនទី ៤ ៖ យើងស្តាប់ព្រះយេស៊ូវគ្រីស្ទបានប្រសើរឡើង នៅពេលយើងនៅស្ងៀម

… ភាពចលាចលនៅក្នុងពិភពលោកនេះនឹងបន្តកើនឡើង ។ ផ្ទុយទៅវិញ ព្រះសំឡេងរបស់ព្រះអម្ចាស់គឺពុំ « មែនជាសំឡេងអឺងកងដែរ ប៉ុន្តែ … [ គឺជា ] សំឡេងរហៀងៗនៃភាពស្រទន់ឥតខ្ចោះ [ ហាក់បី ] ដូចជាពាក្យខ្សឹប ហើយវា [ បានចាក់ទម្លុះ ] ទៅដល់ទាំងព្រលឹង » [ ហេលេមិន ៥:៣០ ] ។ ដើម្បីស្តាប់ឮសំឡេងតូចរហៀងនេះបាន បងប្អូនខ្លួនឯងក៏ត្រូវនៅស្ងៀមដែរ !…

បងប្អូនប្រុសជាទីស្រឡាញ់របស់ខ្ញុំ មានរឿងជាច្រើនដែលព្រះអម្ចាស់សព្វព្រះទ័យចង់ឲ្យយើងរៀន ចេញពីបទពិសោធន៍របស់យើង នៅអំឡុងការមានជំងឺរាតត្បាតនេះ ។ ខ្ញុំបានរៀបរាប់តែបួនចំណុចប៉ុណ្ណោះ ។ ខ្ញុំសូមអញ្ជើញបងប្អូនឲ្យធ្វើបញ្ជីរបស់បងប្អូន សូមពិចារណាពីវាដោយប្រុងប្រយ័ត្ន ហើយសូមចែកចាយវាជាមួយមនុស្សដែលបងប្អូនស្រឡាញ់ ។