O Ai Enoka?

O lenei gafa o le aiga o loo faaalia ai alii e toalua e igoa ia Enoka i le laina o Atamu ma Eva. O le atalii o Kaino o Enoka, le atalii o le atalii o Atamu (tagai Mose 5), e ese mai le atalii o Iareto o Enoka, o le sa ono augatupulaga mai ia Atamu ma sa fausia le aai o Siona (tagai Mose 6–7).

Na faapefea ona tali atu Enoka i lona valaauga?

Ina ua valaauina Enoka e talai atu le salamo, sa ia lagona le le agavaa, ma faailoa atu i le Alii e faapea, sa “telegese lana tautala” (Mose 6:31). Ae na tuu atu e le Atua ia Enoka le mana ma folafola atu, “Tatala lou gutu, ma o le a faatumuina, mao le a Ou tuu atu ia te oe upu e tautala atu ai” (Mose 6:32).E toatele na o mai ma talitonu i ana upu, ma sa faatuina e Enoka le aai o Siona.

I le toe tomanatu ai i le faataitaiga a Enoka, sa faamautinoa mai ai e Elder David A. Bednar ia i tatou o e lagona le lofituina, le tutusa, po o le le agavaa mo se valaauga po o se tiutetauave fou faapea “o le folafolaga a le Alii ia Enoka e tutusa lava le faatatau i ai … i le asō” (“In the Strength of the Lord,” konafesi aoao, Oke. 2004).