Mataupu Faavae o le Auaunaga
O Le Faia o Auaunaga ia Anoa
Afai e te mafaufau pe a anoa lau auaunaga, mafaufau i manatu nei.
E faigofie ona mafaufau pe o faia ea la tatou auaunaga ma se eseesega, aemaise lava pe a tatou feagai ma a tatou lava tauiviga.
I le taimi muamua ae lei oo lou olaga i le faaaogaina o le nofoa faataavalevale, sa ou fiafia lava i le vaai atu o faataamilo mai se laupapa kilipi i taimi o le Aualofa. E masani ona ou saini e tuuina atu se auaunaga. O se auala e faaali atu ai lo‘u naunau “e tauave avegaa le tasi” (Mosaea 18:8).
E le o se sese o le laupapa kilipi na mafua ai ona ou le toe saini. O le mea moni, sa le mafai ona ou toe sainia lo‘u igoa. Ona o lo‘u manaoga faapitoa, sa le mafai ai ona ou uuina le laupapa. E leai se tasi na faamoemoe ou te sainia. Ae, oka sa ou manao tele i ai! O le auauna atu e siomia ai i tatou i le alofa o le Atua ma fesootai atu ai i tatou i isi. Sa ou matua manaomia lava lena lagona o le fesootaiga.
Ona sa ou manaomia ni tagata e fesoasoani e tausi au, o la‘u auaunaga sa foliga mai e le aoga le taumafaiga o le a manaomia e isi e fesoasoani mai ia te au. O lena laupapa na avea ma se faamanatu o le mea sa le mafai ona ou toe faia—seia oo ina vaaia e lou usoo auaunaga lou faanaunautaiga.
Sa ia fesili mai ia te au po o le a se mea ou te manao e fai e auauna atu ai, ae le na o le mea sa ou manaomia e faia mo au. Ona ia sainia lea o lo‘u igoa i luga o le laupapa. Sa sau o ia i lo‘u fale ma fesoasoani mai ia te a’u e fai taumafataga sa ou ofo fua atu e saunia mo isi. Na te lei fautuaina lava faapea sa ou manaomia le tele o le fesoasoani ia te au lava ia e le tatau ona ou taumafai e fesoasoani atu i isi. Sa fiafia o ia e faaalu se taimi ma a‘u.
I le iuga, sa ou iloaina o a’u taumafaiga sa matua aoga lava. Faatasi ai ma le fesoasoani a lou uso o auaunaga, sa mafai ai ona ou faia se mea. Tusa lava pe i ai pe leai se uiga o lena mea i se isi lava tagata, ae sa faia se eseesega ia te au. E ui e lei manuia tonu ai lo‘u aiga pe faamalolo ai lo’u tino, ae sa fesoasoani e faamalolo ai lo‘u loto.
EmRee Pugmire
Iuta, ISA
Faatasi ai ma Lana Fesoasoani, Ua Sili Atu ai Oe Nai lo le Le Agavaa
O se mea masani le lagona o le le agavaa e faia le galuega a le Alii.Sa faapena foi lagona o le perofetao Enoka. Ina ua poloaiina o ia e le Aliie valaau atu i tagata ia salamo, sa popole o ia ona sa “na o ia o se tama, ma ua inoino mai tagata uma ia te au; ona ua telegese la‘u tautala” (Mose 6:31).
Ae sa folafola atu e le Alii o le a faatasi o Ia ma Enoka ma o le a i ai Lona Agaga i ona luga, ma “o au upu uma o le a ou tauamiotonuina; … o lea,” na Ia valaaulia ai, “savali faatasi ma au” (Mose 6:34).
Sa usiusitai Enoka i le mea na poloai mai ai le Alii, ma sa avea o ia ma faatosinaga tele i tagata, e le onao lona lava mana ae ona o “le mana o le gagana na tuuina atu e le Atua ia te ia” (Mose 7:13).
Mataupu Faavae e Mafaufau i Ai
Afai e te mafaufau pe o anoa lau auaunaga, mafaufau i mataupu faavae nei:
-
O le malamalama i le auaunaga ma ona faamoemoega o le a fesoasoani ia i tatou e faamasino sa‘o atili ai a tatou taumafaiga.
-
O le auaunaga e faatatau i le sili atu nai lo le fausiaina o sootaga malolosi atu; e faatatau i le fesoasoani atu i isi e faamalosia lo latou sootaga ma le Faaola.1
-
O le auaunaga ua le na o se tofiga; o le ala tatou te ola ai i a tatou feagaiga e auauna atu ia te Ia e ala i le tausiga o le tasi ma le isi.
-
E le mulimuli le auaunaga i se mamanu na muai fuafuaina. E faōl ai i tatou pe a tatou fetuunai i le tulaga ma saili musumusuga e auauna atu e pei ona faia e le Faaola.
-
-
O le malamalama i le ala e silasila ai le Atua i la tatou auaunaga e mafai ona suia ai la tatou vaaiga.
-
E le fuaina e le Atua le auaunaga e faavae i taunuuga maoae po le talisapaia foi o a tatou taumafaiga (tagai i le faataitaiga a Oliva Kurenai le Mataupu Faavae ma Feagaiga 117:12–13).2
-
A lelei lo tatou manao ma tatou faia se taumafaiga moni, e anoa la tatou auaunaga ia te Ia (tagai i le Mataupu Faavae ma Feagaiga 4:2, 5).
-
Ua naunau le Atua e faalautele e oo lava i a tatou “auaunaga faatauvaa pe le mavaaia”3 (tagai Mataupu Faavae ma Feagaiga 123:17).
-
O Le a se Mea e Mafai ona Tatou Faia?
Nai lo le popole i mea e te le manatu e mafai ona e faia, mafaufau ma le agaga tatalo i mea e mafai ona e faia. Ona galue loa lea. A o e galue ai i le suafa o le Alii, e mafai ona Ia faalauteleina au taumafaiga ma faaaoga e faamanuia ai oe ma isi (tagai i le 2 Nifae 32:9).