E Na’o le Faatekinolosi
O Le Folafolaga o le Avea ma se Itutino
Mai se lauga o le Konafesi a Tamaitai i le Iunivesite o Polika Iaga na tuuina atu ia Aperila 29, 2021.
O le folafolaga a le Aualofa o le mafai lea ona avea i tatou ma se faalapotopotoga o Siona. O la tatou galuega o ni uso o le Aualofa o le faamalosiau lea o le tasi i le isi.
Tatou te o mai uma lava i le lalolagi ma se faanaunauga ia avea ma ni o. O nisi taimi e mafai ona tatou maua ai se sootaga vavalalata ma isi, ma o nisi taimi e faigata. E mafai faapefea ona tatou fesoasoani i le tasi ma le isi ia lagonaina le taliaina saogalemu ma le alofa lea sa tatou oo i ai i lo tatou aiga faalelagi?
I le Ekalesia, o tamaitai uma ua ta‘i 18 tausaga ma matutua atu o se sui o le Aualofa. O le asō ua silia ma le 7.5 miliona tagata o lenei faalapotopotoga tulaga ese. Pe o e auauna atu i le taimi nei i le Peraimeri, Tamaitai Talavou, Aualofa, po o le Aoga Sa, o oe lava o se vaega o le Aualofa. Pe faatoa uma lau aoga maualuga, se tamaitai faigaluega, se tina o se fanau laiti, se tamaitai ua tetea, po o se fafine ua oti lana tane—pe soo se tuufaatasiga o nei tulaga—o oe moni lava o so le Aualofa.
O Le Folafolaga a se Faalapotopotoga a Siona
O le folafolaga a le Aualofa o le mafai lea ona avea i tatou ma se faalapotopotoga o Siona. Pe a tatou manatuaina po o ai i tatou ma feagaiga ua tatou osia, o le a tatou o mai e vaai le tasi i le isi o ni uso e faavavau. O le a tatou iloa le tasi ma le isi talu mai lena taimi anamua na tatou tau faatasi ai ma le tarako ma ana agelu (tagai Faaaliga 12:7) mo le aia tatau e filifili ai ma sa tatou faatuatuaina uma Iesu e faataunuu Lana folafolaga e avea ma o tatou Faaola. A o tatou saunia mo lo tatou taimi i le lalolagi, sa tatou faamoemoe ma le faatauanau o i latou uma o e na auai faatasi ma i tatou i lena taumafaiga faamanuiaina e faatoilalo Satani o le a toe foi mai i lo tatou aiga faalelagi pe a mavae lo latou vaitaimi faamaonia o ni tagata soifua.
Pe a tatou vaai atu i le tasi ma le isi mai se vaaiga e faavavau, e mafai ona tatou vaai atu ia i tatou taitoatasi o se uso e faavavau. Tatou te fiafia mo le manuia o le tasi ma le isi, tatou te fefaasoaai faanoanoaga o le tasi ma le isi, tatou te faamagalo atu i mea sese a le tasi ma le isi, ma e tatou te faamalosia le tasi ma le isi i o tatou vaivaiga. Atonu tatou te le atoatoa i le faia o lena mea, ae pau lava le mea e finagalo ai le Alii o lo tatou amata lea ma se loto malie (tagai Mataupu Faavae ma Feagaiga 64:34). A o tatou “loto e tauave avega a le tasi,” a o tatou naunau e “faanoanoa faatasi ma e e faanoanoa” ma “faamafanafana atu ia te i latou o e e manaomia le faamafanafanaga,” ao tatou naunau e “tutu o ni molimau a le Atua” (Mosaea18:8–9), ua tatou tausia a tatou feagaiga ma Ia.
O le mea moni, o loo i ai le manaomia mo le faaleleia. Ua faaalia i suesuega faapea o le mafuaaga numera tasi e tuua ai e tagata ia tapuaiga o lo latou lagonaina lea o le faamasinoina po o le le taliaina. E tele ina ta‘ua lena mea nai lo le feeseeseaiga i aoaoga faavae po o le leai o se talitonuga. O le tala fiafia e faapea, e mafai ona aveesea moni lava lea tulaga pe afai tatou te faamafola moni o tatou lima ma loto i tagata uma. E mafai ona tatou saili e “avea ma se malamalama, ae le o se faamasino.”1 O se mea lena e na o le Alii lava e faia. O lo tatou tiutetauave o le faaloaloa atu lea o se lima ma se loto matala. A o tatou faia lena mea, tatou te iloa ai ua tatou fatuina se nofoaga saogalemu mo le faasoaina atu, se nofoaga saogalemu e tuputupu ae ai, ma se nofoaga saogalemu e avea ai ma o tatou tagata sili ona lelei.
Vaai, Faalogo, ma Tali Atu ma le Alofa
Ina ia faataitai ona tali atu ma le alofa ina ia avea le Aualofa o se nofoaga e lagona ai e tamaitai uma e mafai ona avea i latou ma itutino, ua matou manatu e ao ona faasoa atu o se tulaga eseese ma tuuina atu ni tali. O le fea o tali e te manatu o le a sili ona lelei?
Tulaga #1: I le sauniga faamanatuga, e te vaaia ai se faifeautalai ua toe foi vave mai i le fale mai lana misiona.
-
A. “O le a lau mea o fai iinei? E lei leva lava ona e aluese atu. Na tatau ona e sau i le fale?”
-
E: “Ua ou fiafia e vaai ia te oe.” Tau mai e uiga i [le nofoaga na e tala’i ai].”
O le tali sili o le “E.”
Tulaga #2: Ua e vaaia ni talavou e te iloa o loo tafafao faamasani.
-
A: “E manaia le vaai atu ia oulua. O a mai le aoga ma galuega?”
-
E: Faaivi le mata ma eu le taulealea i lou tulilima ma i se musumusu leotele, “O le logo ea o faaipoipoga lea ou te faalogo atu iai?”
O le filifiliga sili o le “A.”
Tulaga #3: I le lotu, e te vaaia ai se ulugalii ua fai si leva ona faaipoipo ma e leai se fanau.
-
A: “Aisea ua leai ai ni lua fanau? O afea o le a fai ai se lua fanau? E te lua le o toe laiti!”
-
E: “Ia fiafia i le taimi lenei e le o i ai ni tamaiti. E te manao i se tasi o a‘u fanau?”
O se fesili faigata lenei. O tali uma e lua e le lelei ma e le magafagafa!
Tulaga #4: I se galuega fesoasoani a le uarota, ua tofia oe e te lua galulue ma se tagata ua nofo toatasi.
-
A: “E manaia tele le mafai ona e sau e fesoasoani. Ou te manatu e ofoofogia tele oe.” Aisea ua e le faaipoipo ai?”
-
E: “Ou te fia iloa atili e uiga ia te oe. Tau mai ia te au e uiga i lau galuega [po o le aiga po o mea e fiafia i ai].
O le tali sili o le “E.”
Tulaga #5: Ua ta‘u atu e lau uo ia te oe o le a tatala lana faaipoipoga ma lona toalua.
-
A: “Ua ou matua’i faanoanoa lava mo oe. Ou te i ai lava iinei i taimi uma e faalogo pe afai o le a aoga lena mea.
-
E: “Pe na e taumafai moni ea e faaleleia le lua faaipoipoga? Ou te popole i tamaiti. Na e anapogi ma tatalo e uiga i lau faaiuga?”
O le tali sili o le “A.”
I lenei gaoioiga, pe na e faailoaina ni auala e mafai ai ona tatou galulue uma e faaleleia vaai lelei, faalogo, ma tali atu ma le alofa? O manatu nei e tolu e mafai foi ona fesoasoani ia i tatou e fausia ai se nofoaga saogalemu mo o tatou uso.
1. Saili se Nofoaga mo Tagata Uma e Saofagā Ai
Mafaufau i tamaitai i la outou Aualofa. O ai e faatuai ona auai, e musu e tautala atu, pe teena le auai? Matou te mananao moni lava ia avea tuafafine uma ma se vaega o la tatou faalapotopotoga o Siona. E faapefea ona tatou “tasi le loto ma tasi le mafaufau”? (Mose 7:18). E faapefea ona tatou faaaofia uso uma?
O se tasi o ki o le vaai o i latou e le o faaaofiaina. O se tasi o peresitene o le Aualofa a le uarota, o Chris, e i ai sana mausa o le sailia o i latou atonu e le o aofia ai. Pe a ia vaai atu ia i latou, na te faafeiloaia i latou i se ataata ma tilotilo atu iai, ma faalogologo ma le toto‘a i mea latou te fai mai ai. Ona o lona gauai faamaoni atu, ma le taulai atu, latou te lagona ai le vaaia lelei ma le malamalama. A o ia faalogologo, e masani ona ia iloaina o latou malosiaga ma auala e mafai ona latou saofaga ai. Ua ia iloa o loo i ai ni taleni e le o faaaogaina pe natia o loo faatalitali mai ina ia atiina ae i tagata uma. I lena faagasologa musuia, e aumaia ai tagata taitoatasi i totonu o le li‘o o le talalelei a Iesu Keriso, ma ua faamanuiaina ai aiga uma.
E mafai ona tatou faalauteleina la tatou li‘o seia oo ina uulima ia uso uma. E mafai ona tasi i tatou, ua saunia mo le faalapotopotoga a Siona lea o le a avea ma se taunuuga o la tatou Aualofa lotogatasitasi o aso nei.
Na saunoa mai Peresitene Henry B. Eyring o le Au Peresitene Sili, “E oo lava i … eseesega e mafai ona vaai i ai o se avanoa. O le a fesoasoani le Atua ia tatou iloa se eseesega i se isi tagata e le o se faapogai o le faasoesa, ae o se saofaga.“2 O eseesega e mafai ona faatamaoaigaina atili ai lo tatou lalolagi. A tatou iloa ma faamanatuina malosiaga e ese mai i o tatou lava malosiaga, e mafai ona sili atu lo tatou faataunuuina o le galuega a le Alii i Lana ala.
2. Tagai i talaatu o Eseesega Manino
O le toatele o i tatou e mananao ia talia, ae o nisi taimi tatou te le magagana ai pe fefefe i le faia o mea sese. Tatou te le iloa se tala e fai atu po o le auala e suia ai le ala tatou te tali atu ai i tagata. I le Mataio 8:1–34, tatou te vaai ai i le gauai atoatoa o Iesu i le fesoasoani atu i isi ia auai a o Ia
-
faamamaina se lepela;
-
fesoasoani i se auauna a le taitai o le toaselau Roma;
-
faamalolo le tinā o le avā a Peteru;
-
tutuli ese temoni mai le toatele i le motu o tagata;
-
fautuaina se tusiupu Iutaia;
-
sa valaauina se tagata na faanoanoa i lona tamā e mulimuli atu ia te Ia;
-
sa aoa’iina le matagi ma faafilemu loto o Ona soo atuatuvale;
-
faamalolo ni alii se toalua sa nonofo i tuugamau o e sa uluitino e agaga ma alalaga atu ia te Ia; ma
-
sa malie e o ese mai le talafatai ina ua aioi atu tagata o le nuu e talitonu i agaga leaga ia te Ia e alu ese.
O le Faaola o Iesu Keriso e i ai ona fofoga e vaai i tua atu o eseesega ma i o tatou loto, gafatia, ma manaoga. Ua tuuina mai e le tatou au peresitene se valaaulia ina ia agalelei atili, faaali atu le naunau faamaoni, ma ofo atu se lima faauo.
3. Faaaofia i Latou O E Atonu o Loo i Fafo o loo Tilotilo Mai i Totonu
Ua tatou ola i se taimi ua amata ai ona faataunuuina folafolaga a le Atua i Lona nuu o le feagaiga. I le avea ai ma fanau a le Atua, ua faataapeapeina i tatou mai Lona afioaga. I lenei lalolagi, ua tatou oo ai i tofotofoga ma faanoanoaga. Peitai, ua folafola mai e lo tatou Alii o Iesu Keriso o le a Ia faapotopotoina i tatou e pei ona ofaofatai mai e se matuamoa lana toloai i lalo o ona apaau pe afai tatou te salamo ma liliu atu ia te Ia ma le faamoemoega atoa o le loto (tagai 3 Nifae 10:6). E faapotopoto i tatou e le Faaola i Lana tausiga ma le alofa. E pei o tamaimoa, tatou te vaivai, ma e tatou te faalagolago i Lona alofa tunoa. I le avea ai ma soo o Keriso, e mafai foi e i tatou ona fesoasoani e faapotopoto Mai Lona nuu. E aumaia e lenei mea ia i tatou le olioli.
E eseese uma o tatou ala, ae e mafai ona tatou savavali faatasi. I le 1 Korinito 12:12–27, o loo faatusatusa ai e Paulo le tino o le tagata i le Ekalesia e faaalia ai o loo i ai i tagata taitoatasi se matafaioi taua i le tino o le Ekalesia. E tofu i tatou uma ma malosiaga ma vaivaiga E tofu i tatou uma ma se mea e saofaga ai i le aumaia o isi ia Keriso, ma, i le taimi lava e tasi, tatou te manaomia uma lava le latalata atili atu ia te Ia.
E mafai e i tatou uma, e aofia ai tamaiti ma le autalavou, ona faapotopoto mai ma le mataalia isi ina ia mafai ona latou lagonaina le alofa o le Atua ma avea ma soo o Keriso. Afai tatou te sailia faaaliga, o le a taialaina i tatou e le Agaga, ma o le a tatou iloa le mea e fai ma ta’u atu e fesoasoani ai i isi ia lagona o i latou o ni o.
O Se Valaaulia
Pe mafai e le Aualofa ona tuuina atu le folafolaga o le avea ai ma se itutino? Ioe! E tele naua eseesega i o tatou tulaga, ae o i tatou o tamaitai e fefaasoaai uiga faavae ma faamoemoega e faavavau. E i ai i tamaitai se manaoga sili—ma se tomai—e fesootai ai ma isi, ma e manaomia uma ona tatou auai.
O la tatou galuega o ni soo o Keriso o le faafaigofie lea mo tagata ona o mai ia te Ia. O loo tatou taumafai uma e tausi poloaiga ma mulimuli i le faataitaiga a Iesu Keriso, ae e eseese auala tatou te vaivai uma ai. Ae e mafai ona tatou taumafai pea ia lelei atili i le mana togiola o le Faaola. O la tatou galuega o ni uso o le Aualofa o le faamalosiau lea o le tasi i le isi.
Matou te uunaia outou ina ia faaauau pea ona faamalolosia sootaga o le usoga ma tamaitai uma i la outou uarota po o paranesi, e 18 i le 108 tausaga. E tofu tagata taitoatasi ma se tāua maoae ma gafatia e le iu, o lea ia fesili ifo ia te oe lava: O le a se mea e mafai ona ou faia e aumai ai lena gafatia ma fesoasoani ia lagonaina lo latou tāua? E manaomia e le Aualofa le lagolagoina o tamaitai uma, ia fesoasoani ia i latou ia lagonaina i taimi uma se vaega o lo tatou tulaga faaleusoga paia e faavavau.
Matou te molimau atu o le Alii, lo tatou Faaola ma le Togiola, o loo faatalitali mai ma aao faaloaloa e aumai i latou taitoatasi i Lana lafu. Na te faamoemoe ma le naunautai o le a tatou fesoasoani i lenei taumafaiga taua o le faapotopotoina e saunia ai mo Lona Afio Mai Faalua. Tau ina ia tatou tuuina atu le folafolaga o le auai i tuafafine uma i totonu o li‘o o a tatou faatosinaga.