Autalavou Matutua
Faamanatu Faigofie mo le Sailia o Lou Ala i le Olaga
O le fuafuaina o meae te manao e fai i le olaga e mafai ona faigata. Faafetai, e te le tau faia na o oe.
E faitau miliona tagata o le lalolagi sa matamata i le televise a o savavali tagata muamua i le masina.O lo’u tama o se tasi o i latou. Na faafuasei lava, i le na o le fitu o ona tausaga, sa ia iloa le mea sa ia manao e fai i lona olaga.
Ina ua ia iloa e toatele le au feoai i le vateatea na amata o ni pailate o vaalele tau, sa tonu loa ia te ia i le taimi lava lena le mea sa ia manao e taulai atu i ai i le aoga—inisiniao vaalele o le vateatea. Na iu lava ina avea o ia ma se pailate o vaalele tau i le Neivi a le Iunaite Setete faatasi ai ma le miti o le avea ma se tagata feauluai i le vateatea.
A o ou tuputupu ae, sa ou lagonaina e pei e manaomia foi ona faafanua lo‘u olaga. Ae sa le faigofie tele mo au le filifili po o le a le mea sa ou manao e fai. Sa ou lagonaina e le lava lo‘u atamai, le lava le tuuto, pe lava le lototele e faatulaga ai se ala mo lo’u olaga ma pipii i ai. O le mea moni lava, o loo ou tauivi pea ma lenei mea i nisi taimi.
A o faasolo ina ou matua, ua ou aoaoina o le toatele o tupulaga talavou e tutusa o latou lagona. E toalaiti ni tagata e iloa lelei lava le ala e ui ai i le amataga. O le toatele o i tatou e iloa lava ao faagasolo ai le olaga. Ma e le afaina! O le mea e faafetai ai, e le tatau ona tatou o na o i tatou. O loo i ai le fesoasoani i le ala.
Manatua Mea e Sili ona Taua
O le le mautinoa po o fea le itu ou te manao ou te agai iai e mafua ai ona ou lagonaina le le mautonu. Sa ou lagonaina e tatau ona ou faia se isi mea po o le alu i se isi mea. Sa ou lagonaina e pei ua na o le tasi lava le mea e finagalo le Tama Faalelagi ou te faia, ma afai ou te misia, o le a ou le maua ou avanoa mo le faavavau. E pei ona outou mafaufauina, o lenei mea na fatuina ai le tele o atuatuvalega le talafeagai i lo‘u olaga!
Talu mai lena taimi ua ou iloa ai ua faamanuiaina i tatou taitoatasi e le Tama Faalelagi i meaalofa faaleagaga ma e tele mea lelei e mafai ona tatou faia o le a faafiafiaina ai o Ia. E le manaomia ona tatou popole e uiga i le mauaina o le ala e tasi ma na o le pau lea o le ala mo o tatou olaga. Po o le a lava, ae afai o loo tatou ola ai i le talalelei ma osia ma tausia feagaiga paia, o le a Ia fesoasoani mai ia i tatou e osia le mea sili o loo tatou i ai nei ma iloa le auala e agai ai i luma.
Ua Faaopoopo i Luga a Tatou Filifiliga Laiti
Ina ua maua lo‘u faamanuiaga faapeteriaka, e tasi le vaega na tulaga ese mai ia te a’u—o se mea e faatatau iai tatou uma. Sa faamanatu mai ia te au o le oo atu i le malo selesitila e le faia i se faatinoga faatosina se tasi poo se galuega sili e tasi. E faia i filifiliga—tetele ma laiti—tatou te faia i aso taitasi, aemaise lava a o tatou filifilie o mai ia Iesu Keriso ma ola i Lana talalelei.
A o tatou faia faatinoga i vaega uma o o tatou olaga ma le faatuatua i le Tama Faalelagi ma Iesu Keriso, ua tatou tuu i tatou lava i se tulaga e taialaina ai. O le a tatou iloa ai foi po o fea lava La te taitaia ai i tatou o le mea tonu lava lea tatou te mananao foi i ai.
O Le a Lelei Mea Uma
E oo lava i fuafuaga e sili ona lelei, e le faataunuuina mea uma i auala tatou te mananao iai i taimi uma. O le olagao lou tama sa le faapena foi. E lei avea lava o ia ma se tagata suesue o le vateatea, ae o ia o le tagata muamua e tau atu ia te oe na taialaina o ia e le Alii i le mea sa sili ona lelei mo ia ma lo matou aiga.
Ua aoaoina i tatou e tusitusiga paia e “saili ma le filiga, tatalo e lē aunoa, ma ia talitonu, ma o le a galulue faatasi mea uma mo lo outou lelei” (Mataupu Faavae ma Feagaiga 90:24). E silafia e le Tama Faalelagi ma Iesu Keriso le ala e galulue faatasi ai mea uma. La te iloa foi le mea e lelei mo i tatou aua La te silafia ma alofa atoatoa ia i tatou.
E le o faamoemoe mai le Tama Faalelagi ma Iesu Keriso ia tatou fuafuaina o tatou olaga e i tatou lava. Afai tatou te talitonuina i La‘ua ma faatagaina i La’ua e savavali faatasi ma i tatou i lenei olaga, o le a uunaia i tatou e faaauau pea ma faia faaiuga o le a fesoasoani ia i tatou e faia le mea sili mo o tatou olaga atoa.