O Leo o le Au Paia o Aso e Gata Ai
O Loo I Ai sa Latou Tusi a Mamona Iinei!
A o ou uuina le Tusi a Mamona i o‘u lima, sa ou lagonaina le fufulueseina o a’u avega i le mafanafana o le alofa o le Faaola.
Ata na pueina e Jacob A. Brown
I se tasi Aso Toonai i le ogatotonu o le taumalulu,sa ma faaaogaina ai ma lou toalua se aso la ae malulu e faamasani lelei ai i le matou pitonuu. E lei leva ona matou siitia atu i le faitau afe o maila mai lo matou fale i le Talafatai i Sasae o le Iunaite Setete e tulitulimatagauina avanoa faaleaoaoga ma faalegaluega.
Sa tonu ia i maua e savavali i se iunivesite lata ane e leai se tasi o i ma‘ua na asia. Sa i ai se taimi na matou maua ai le faletusi autu o le iunivesite. Ma te fiafia e faitautusi, ma o lo‘u toalua, o se tagata aoga faauu, sa fia iloa po o a punaoa e mafai ona ia maua mo ana suesuega. Ona sa ia suesueina le talafaasolopito faalelotu, sa ma matamata ai i faaputuga o le vaega faalelotu o le faletusi. A o ma tilotilo atu i nisi o igoa mananaia, sa tosina atu la‘u vaai i se tamai tusi e i ai se ufiufi lanumoana masani.
“O loo i ai sa latou Tusi a Mamona iinei!” Sa ou musumusu atu ai ma le fiafia.
Sa ou aumaia le tusi mai le fata. O se kopi e tuai atu, ma sa ou taumafaufau po o le a le umi na i ai iina. O le mea na matuai ou tosina i ai o se tamai faaopoopogao loo faapipii i totonu o le faavaa pito i luma.
O le faaopoopoga o se molimau puupuu a se ulugalii mai Blackfoot, Idaho, ISA. I la la‘ua molimau, sa la faamalamalamaina ai po o le a le Tusi a Mamona ma pe aisea e taua ai. Sa la faasoa mai se molimau puupuu ae mamana o le tusi, ma sa la valaaulia le tagata faitau e tatalo ia iloa pe moni.
Sa faigofie a la upu, ae sa sa‘o lava le la savali i lo’u loto. Atonu o le uiga o lenei ulugalii mo le la molimau ina ia faitauina e i latou e le auai i le la tapuaiga. Atonu na latou tuuina atu lenei kopi i se tasi la te iloa. O ai na te iloa le tele o taimi na suia ai lima po o le fia o maila na faimalaga ai ma iu ai i le potutusio le iunivesite?
A o ou uuina le tusi i o‘u lima, sa faatumulia lo’u lotoi le Agaga. Mo sina taimi, sa ou lagonaina le fufulueseina o au avega i le mafanafana o le alofa o le Faaola.
O lena aso i le faletusi o loo faaauau pea ona faamanatu mai ai ia te au faamanuiaga ou te maua e alai le faitauina o le Tusi a Mamona ma le taua o le faasoa atu o la‘u molimau e uiga i ai. O a tatou molimau e ono pauu “i luga o nofoaga papa” po o le “i le eleele lelei” (tagai Mataio 13:3–9), ae e taua lo tatou faasoaina atu.O le a faamautinoa e le Atua o le a laveaiina i latou i le taimi sa‘o, i le nofoaga sa’o, ma i tagata sa‘o.