Faia o Tusitusiga Paia iaMoni mo a Tatou Fanau
Mafaufau i manatu nei mo le fesoasoanii tamaiti ia lagonaina le moni ma le aafiaga o tusitusiga paia.
Ata oti o le vaa o Noa na saunia e Brittany Call; ata na tusia e David Green; ata na pueina e Ryan Hender
O le a le galo ia te au lena aso. I la‘u vasega Peraimeri, sa laei ai Brandon ma lana uo i ni ofutaele talaloa ma le isi vaega o le vasega o loo tutu i tua o se nofoa e mafai ona faamoe. Sa matou toe faamatala le tala ia Alema ma Amoleka ina ua susunuina e amiotonu, ma sa avea Brandon ia Alema. A o ia faitauina le mau lea na uunaia ai Alema e le Agaga mai le laveaiina o tagata, sa tafe ifo loimata i ona alafau. Sa iu ina ia tilotilo mai ia te au ma le atuatuvale, “Sister Boyack,e le mafai ona ou faitauina lenei mea! Ua faanoanoa tele!”
O Brandon sa masani lava ona fai si faigata ona pulea i le potuaoga. Ae i lena aso, sa ia lagonaina se agaga mamana. O lena aso sa matuai moni lava le Tusi a Mamona ia te ia.
O Le Faia o Tusitusiga Paia ia Moni
O le poloaiga na tuuina mai e le Alii ia Atamue faatatau foi ia i tatou: “Aoao atu i lau fanau, e ao i tagata uma, i soo se mea lava, ona salamo, pe e leai lava se ala e mafai ai ona latou mautofi i le malo o le Atua” (Mose 6:57). Sa faaauau pea e le Alii i upu talitutusa, “Ou te tuu atu ia te outou se poloaiga, ia outou aoao saoloto atu nei mea i a outou fanau” (Mose 6:58).
I le avea ai ma tagata matutua o e alolofa i tamaiti, tatou te mananao e fesoasoani ia i latou e aoao ia fiafiai tusitusiga paia. O se tasi o auala e mafai ona tatou faia ai lenei mea o le faia lea o se lagona moni o tusitusiga paia ia i latou. O le a fiafia tamaiti ma naunau e faatutu ni sini e suesue i le Feagaiga Tuai pe afai tatou te aoao atu i latou i se auala latou te lagona ai e talafeagai tusitusiga paia i o latou olaga (tagai i le 1 Nifae 19:23).
E tele ni auala e mafai ona tatou fesoasoani ai ia tatou fanau ia lagona le moni ma le aafiaga o tusitusiga paia.
Tala-Faatino
O tala o le Feagaiga Tuai e ola i tala faatino. Pe o le ofuina o ofu e pei o Noa ma ao mai uma a latou manu meataalo vaefa i le “vaa,” ma fatuina ai se “ana” i lalo o se laulau faatasi ma se leona meataalo i totonu ma lou atalii laitiiti o loo avea ma Tanielu lototoa, po o lou afafine o le perofeta lototoa o Tepora o loo taitaia ona uso ma tuagane o ni autau a Isaraelu, o le faatinoina o le matafaioi e mafai ona faia ai ia pei o le mea sao tala o le Feagaiga Tuai.
O le a le galo lava ia te au le aso i le fiasefulu tausaga talu ai a o ou saofai i le seminare i le vaveao i Michigan. Sa talanoa lo‘u faiaoga e uiga i le misiona i sa Sorama i le Tusi a Mamona. Na faafuasei lava, ona ia oso i luga o le laulau ma amata ona faitau leotele le tatalo a Rameutoma. O lena mea na fafagu ai i matou uma! Ua tele tausaga o lo‘u manatuaina o lena mea. Sa matua aafia se vaega o talavou e se faiaoga sa faatinoina se tala faatino.
I le aluga o tausaga, sa fiafia ou atalii taitoatasi e tutu i tua o lo matou nofoa ma faafoliga o Samuelu le sa Lamana o loo talai atu mai le pa po o le uuina i luga o se laau e pei o Mose ma folafola atu, “Ia tuu lo‘u nuu e o!”
Pe a maua e tamaiti le aafiaga o le faatinoina o tala o tusitusiga paia, o le a matua moni lava tusitusiga paia ia i latou.
Siosiomaga
Mo tamaiti, o le i ai o aafiaga moni e fesoasoani ia i latou e aoao, malamalama, ma faaaoga faamatalaga. E mafai ona tatou faia lenei mea e ala i le faatuina o se siosiomaga e fesootai ai tusitusiga paia ma o latou siosiomaga ma o latou olaga. Mo se faataitaiga, a o laiti le ma fanau tama e toafa, sa matou suesueina faatasi le Tusi a Mamona. I se tasi afiafi faaleaiga na tupu i lo matou faleie, lea sa matou talanoa ai e uiga ia Liae ma lona aiga o malaga atu i le vao. Sa ma talanoa pe na faapei le malaga a le aiga o Liae ma nonofo i se faleie mo se taimi umi lava. Na oo mai le tala ia i latou.
A o e aoao atu e uiga i le aafiaga o Aperaamo i le aoaoina e uiga i fetu ma le lagi, e mafai e le siosiomaga ona faia se eseesega tele. Mafaufau i lena lesona o loo aoaoina i le po, ao tou taooto faatasi ma lau fanau i lalo o fetu. O le aafiaga o Aperaamo o le a anoa ia i latoui se auala e loloto atu.
Nai lo le na o le faitau e uiga i puipui o Ieriko ua faatamaiaina, e mafai ona e nofo i autafa o se pa maualuga ma faitau le tala iina. O le a matua faagaeetia tamaiti i le vavega.
Nai lo le talanoa e uiga i le fausiaina e Solomona o le malumalu, e mafai ona e aveina lau fanau i le malumalu pe afai e i ai se tasi e lata ane ma faitau le tala i lotoa o le malumalu ma talanoa e uiga i le taua o le maota o le Alii i o latou olaga.
Nai lo le na o le talanoa e uiga i tagata o le aigao Isaraelu o loo o atu i le nuu folafolaina, e mafai ona e aveina lau fanau i luga o se savaliga sopo ma usu peseo le Peraimeri i le ala.
O aafiaga e mafai ona ofoofogia mo le fesoasoani i tamaiti ia lagona le moni o tala o tusitusiga paia o loo latou faalogo ma faitauina. O na aafiaga o le a fatuina ai foi ni manatuaga maoae mo lau fanau o lea ola ai tusitusiga paia ia i latou.
Fai Atu Fesili
E mafai ona tatou fesoasoani i tamaiti ia malamalama atili i tusitusiga paia e ala i le faia o fesili.
“O le a sou lagona pe afai e leai se tasio faalogo mai ia te oe?” ua moni ai le tala ia Noa.
“Faamata e faape‘i le i ai i le falepuipui i Atua e pei ona e faia?” ua moni ai le tala ia Iosefa.
“O le a sou manatu o le a le tulaga o le felafoaiina i totonu o se ogaumu aasa?” ua avea ai le tala ia Sataraka, Mesako, ma Apeteniko ma mea moni.
Pe a tatou faia ni fesili, e taua tele le saoloto o a tatou fanau e faailoa atu o latou manatu e aunoa ma ni faitioga. Tuu atu iai latou e talanoa. Tuu atu ia i latou e faagasolo le tala. Ma fautuaina i latou e fai atu le tele o a latou lava fesili.
Talosaga
O nisi o fesili sili ona lelei e mafai ona tatou fai atu e fesoasoani ai i tamaiti e faaaoga tusitusiga paia ia i latou lava.
“O a ni mea ua e aoaoina mai le aafiaga a Iosefa Samita? Pe na e mafaufau e tatalo mo ni tali? O a ni ou aafiaga?”
“A o e faitau e uiga ia Iona i totonu o le tafola, e faapefea ona fesoasoani lena mea ia te oe e filifili ai e mulimuli i poloaigaa le Atua?”
“O le a sou manatu i lagona o Maria ina ua ta‘u atu e le agelu ia te ia o le a ia maua se pepe o le Alo o le Atua? E faapefea ona fesoasoani lena mea ia te oe e mulimuli aii le fuafuaga a le Atua mo lou olaga?”
E faapitoa lava le taua o le faaaogaina mo a tatou tupulaga talavou a o amata ona latou mafaufau i aoaoga faavae ma mataupu faavae o loo aoaoina i tusitusiga paia ma amata ona faaaoga i o latou olaga. O le faia o faaaogaaga e fesoasoani foi e faamalosia ai faapea o le tele o tali i a latou fesili e mafai ona maua i tusitusiga paia ma o tusitusiga paia e fitoitonu i o latou aafiaga o le olaga.
Ituaiga o Aoaoga
E sili ona aoao tagata i auala eseese—o nisi e ala i mea vaaia o lona uiga e pei o le faitau; o nisi e ala i mea e mafai ona faalogoina o lona uiga e pei o le faalogo; ma o nisi e ala i le pa’i/tago e pei o le fealuai solo, faia o se gaoioiga, po o le faia o se mea i o latou lima.
Ina ia fesoasoani i tamaiti ia malamalama ma faaaoga tusitusiga paia, e sili atu le faaaoga o le auala e fetaui ma a latou sitaili o le aoaoina. E aoga le iloilo po o le a le ituaiga o sitaili o le aoaoina e manaia i tamaiti taitasi. E mafai e faiaoga o le Peraimeri ona galulue ma matua ia malamalama i sitaili e aoao ai tamaiti ina ia mafai ai e faiaoga ona fetuunai a latou metotia faafaiaoga e fesoasoani ai i tamaiti taitoatasi.
O tagata e aoao i le vaai o le a manuia mai le i ai o a latou lava seti o tusitusiga paia ina ia mafai ai ona latou faitau ma makaina. E mafai foi ona e tuuina i luga ni ata mai tala o tusitusiga paia i totonuo o latou potu po o isi nofoaga i totonu o le fale.
E fiafia tagata aoao i le faalogo e faalogologo i tusitusiga paia.E mafai e tamaiti ona faitau leotele i latou lava i tusitusiga paia, faalogo ia i latou i a latou komepiuta po o masini, pe fai i se matua po o se tei e faitau atu ia i latou.
E manaomia e tagata aoao i le pa’i/tago se vaega o gaoioiga faaletino i a latou suesuega o tusitusiga paia. E mafai ona e valaaulia i latou e tusi se ata o le tala faatusipaia a o e faitauina. O le a manuia foi nei tamaiti mai le i ai o a latou lava tusitusiga paia lea e mafai ai ona latou faailogaina pe valivali.
O le tuufaatasia o sitaili o le aoaoina e mafai ona faapitoa le aogai le faaolaina ai o tusitusiga paia. O lea la nai lo le na o le talanoa e uiga ia Mose ma Poloaiga e Sefulu, o le tuu atu i tamaiti e faia papamaai le ele po o se atatusi o Mose o loo mauaina Poloaiga e Sefulu i luga o le mauga a o e faamatala atu ia i latou le tala o le a faigofie ai mo i latou ona aoao. A o suesueina le Sau, Mulimuli Mai ia te A‘u, tufa atu vali po o penitala lanu ma tuu atu i tamaiti matutua e valivali a latou tusitusiga paia a o tusi e tamaiti laiti ni ata a o faitau e Tina po o Tama le tala faatusi paia. O se tuufaatasiga lenei o mea e vaaia, faalogoina, ma mafai ona pa’i/tago i ai e maualuga le aoga.
E mafai ona tatou faia le tele o mea o le a fesoasoani i tusitusiga paia ia avea ma mea moni i a tatou fanau. A o tatou faia lea mea, o le a aoao atili a tatou fanau mai tusitusiga paia, olioli atili i ai, ma faaaoga lelei atili i o latou olaga. O le faamoemoe o le taimi o lenei faagasologa o le a latou tuputupu ae ai ia matua fiafia i tusitusiga paia. Ma o lena mea e aoga ai taumafaiga uma.