E Na’o le Faatekinolosi
Faamalolosia o le Autalavou e ala i le Tulimata’iga a le Au Epikopo
E alaala tusitala i Ceara, Pasila.
Ua oo mai ni taunuuga maoae i lenei uarota a Pasila e ala i le mulimuli i fautuaga a taitai o le Ekalesia e fesoasoani i au epikopo e tulimata’i le tupulaga faia’e.
O le autalavou a le Uarota a Jatobá i totonu o le falesa fou.
Atapue mai faaaloaloga a tusitala
Na faavaeina le Uarota a Jatobá i Pasila ia Mati 2009, ae e lei oo ia Novema 2018 na mafai ai e ona tagata ona auai i le lotu i lo latou lava falesa ua faapaiaina. E ui ina sa faafetaia e le Au Paia fale na lisiina e tapuai ai, ae o le le i ai o se fale tumau na atili faigata ai ona faatumauina le fiafia o le autalavou e nonofo, ae maise lava pe a maualuga le pasene o sauaga, faaaogaina o fualaau faasaina, ma le tuulafoaiina. Ae peitai ua faatupulaia nei le vaega a le autalavou i le silia ma le 85 tagata auai, ua oo atu i se tulaga iloga faasolopito i le uarota.
Ua Fofogaina Fetuunaiga e Fesoasoani i Epikopo ia Tulimata’i le Tupulaga Faia‘e
O le a le mea na taitai atu ai i lena faateleina o le auai i le autalavou? Na oo mai le vavega e ala i le mulimuli i le taitaiga a le Au Peresitene Sili ma le Korama a Aposetolo e Toasefululua.
I le konafesi aoao ia Oketopa 2019, na aoao mai ai Peresitene Russell M. Nelson: “I uarota taitasi, o le autau talavou a le Alii e taitai e se epikopo, o se auauna tuuto a le Atua. O lona tiutetauave muamua lava ma le sili o le tausia lea o alii talavou ma tamaitai talavou o lana uarota. O le epikopo ma ona fesoasoani e tatiaia le galuega a korama o le Perisitua Arona ma vasega a Tamaitai Talavou i le uarota.”1
Na fofogaina mulimuli ane e Elder Quentin L. Cook o le Korama a Aposetolo e Toasefululua ma Sister Bonnie H. Cordon, Peresitene Aoao o Tamaitai Talavou, ni fetuunaiga e faatatau i le tupulaga faiae ma o latou taitai. Na aoao mai Elder Cook o se tasi o faamoemoega mo fetuunaiga o le “fesoasoani i epikopo ma o latou fesoasoani e taulai atu i o latou tiutetauave autu i le autalavou ma tamaiti Peraimeri.”2
Ona faamamafaina lea o lenei fautuaga e le Au Peresitene o le Eria, le Fitugafulu Eria, ma le peresitene o le siteki mo le siteki lea e aofia ai le Uarota a Jatobá, o Peresitene Nivaldo Mauro dos Santos. Na saunoa mai Peresitene Santos: “I le Alema ua ta‘u mai ai ia i tatou ’e le sili atu le faitaulaga i luga o e na faalogologo mai ia te ia, ma sa faapepa ona latou tutusa uma, ma sa latou galulue uma, o tagata taitoatasi uma e tusa ma lona lava malosi’ (Alema 1:26). A o ou saili e aoao lo‘u tiute, sa ou mafaufau loloto i a’u matafaioi. E leai sou masalosalo o se tasi o a’u matafaioi o le fesoasoani lea i tupulaga talavou ia malamalama ma atiina ae o latou gafatia paia. O lenei mea e manaomia ai le alofa ma le onosai. Ou te alofa i le autalavou o le Ekalesia ma ou te faafetai mo le avanoa e auauna atu ai ia i latou.
O le autalavou o loo faamamaina le falesa.
Fetuunaiga na Faia i le Uarota a Jatobá
O le saili atu e mulimuli i le taitaiga faaperofeta i le lotoifale, sa taulai atu ai taitai o le Uarota a Jatobá i le fesoasoani atu i le autalavou e atiina ae o latou gafatia paia i a latou aufono ma faia ni fetuunaiga se tele. Sa taulai atu i lea taimi i lea taimi a latou fonotaga a le aufono i le autalavou a le uarota i le na o le faapotopotoina o Isaraelu i itu uma e lua o le veli. Sa amata ona latou faia fonotaga faalevaiaso a le au peresitene o korama ma vasega, faatasi ai ma se tasi o le au epikopo na auai. Ma sa latou faaaofia ai le autalavou i le galuega o le faaolataga. O lena galuega e aofia ai e le gata i auaunaga ma galuega auauna atu a le Perisitua Arona ae faapea foi le faamamaina o le falesa, faasinoupuina o igoa, aapa atu e toefaatoaga mai isi, ma isi mea. Sa fuafuaina foi e le aufono a le autalavou a le uarota se vaiaso faafaifeautalai e tulitulimata’i ai le faasoaina atu o le talalelei i o latou nuu. O na mea uma na faia ai se eseesega.
Na faasoa mai Willian M., e 15 tausaga: “O faifeautalai na muamua aumaia a’u i le lotu. Ona soso lea ma le taliaina o au e tagata uma lea na ou faaauau ai pea. Sa ou manatu o le sau i lenei Ekalesia o le tau lava o le faalogo i se mea e uiga i le talalelei ona toe foi lea i le fale, ae sa ou iloaina e le na o le pau lena—o se mea sa sili ona taliaina. Ina ua valaauina Epikopo Gil Santos e avea ma o matou epikopo, sa ia valaaulia tagata talavou e galulue, faatasi ai ma le sini o le aumaia o nisi tagata talavou i le Ekalesia. Sa ia iloa o tupulaga talavou o le lumanai lea o le Ekalesia. O le mea lena ua ou i ai iinei!”
Fai mai Cleusiana Teles, o se taitai o Tamaitai Talavou, o tamaitai talavou “ua matua fiafia lava ma ua i ai se manao e auauna atu. E le motusia la matou fesootaiga ma i latou, ma e matou te faalauiloaina gaoioiga—e tusa lava pe faatekinolosi. Ua faataunuuina tofiga uma a tamaitai talavou. Ma ua latou faailoa mai lo latou olioli. O lena mea na faigofie ai ona faaauau le galuega a le Alii ma faamalosia e le tasi le isi, e oo lava i le taimi o le faama‘i oti.
Ua tumau foi le latalata atu o le au epikopo i le autalavou e fesoasoani e auauna atu ia i latou. Na manatua e Suelen Lopesa, e 18 tausaga: “O le taimi lava na ou papatiso ai, na oo mai ai le faama‘i oti. Sa lelei tele le epikopo ia te a‘u ma sa fesoasoani tele i lo’u tuagane ina ua ma‘i o ia.
Sa potopoto alii talavou ma tamaitai talavou mo se gaoioiga.
O Se Taulaiga i Gaoioiga
Sa faia foi e taitai o le Uarota a Jatobá ni fetuunaiga i gaoioiga a le autalavou. Sa amata ona latou faia gaoioiga faalevaiaso, ma sa latou faaaofia ai le aufono a le autalavou a le uarota ina ia sili atu ona aoga ia gaoioiga.
Na fai mai Epikopo Santos, “I se agaga o le tatalo, sa matou iloa ai mea e fiafia i ai le autalavou ma mea na faafiafiaina ai i latou i lena taimi.” Sa mananao taitai e faaauai le autalavou i gaoioiga lelei ma mama e fesoasoani ai e tetee atu i gaoioiga a le lalolagi. Sa faaauau le saunoaga a Epikopo Santos: “Matou te faatumuina lenei avanoa i le alofa, taaloga, ma le aoaoina atu o le talalelei. Sa mafai e tagata talavou ona vaai i o latou taitai o se uo.
O se vaega o na gaoioiga, sa mananao ai taitai ia avea le falelotu o le Ekalesia o se nofoaga autu mo faauooga fou ma le faamalosiauga faaleagaga. O le auai i le seminare ua avea ma se taulaiga tele i na gaoioiga.
O loo fiafia faatasi le autalavou i se taaloga soka.
E fiafia i gaoioiga o taaloga i aso taitasi i le falelotu a le uarota pe a maea le seminare. Na taua e Eliseuda Santos, o se faiaoga seminare mo le iva tausaga, “O le toe foi i le seminare i le fale o le uarota sa fesoasoani tele.” O le alofa o Sister Santos mo le autalavou ma “le gauai e tuuina atu e le au epikopo” ua “taua mo i matou e faatumauina ai le mausali o nei tagata talavou i le talalelei,” sa ia faasoa mai ai. Sa faatumauina foi e Sister Santos se fesootaiga lelei ma tagata o aiga o le autalavou, aemaise lava i matua e le o ni tagata o le Ekalesia. O se faigalotu ma se taumafataga o le afiafi mo nei matua e ofoina atu i le amataga o tausaga aoga seminare taitasi e faamalamalama ai le polokalama i tagata o le aiga ma talosaga atu ai mo la latou lagolago.
Mai Mea Laiti ma Faatauvaa
Atonu na faamoemoe nisi tagata o le faateleina o le auai o le autalavou i le Uarota a Jatobá o le taunuuga lea o taumafaiga tetele. Ae o nei taunuuga na oo mai mai i le na o le mulimuli i fautuaga a taitai o le Ekalesia e fesoasoani ai i au epikopo ia taulai atu i le tupulaga faia’e ma faaaofia ai le autalavou i le autau a le Alii e faapotopoto Isaraelu i itu uma e lua o le veli.