E Na‘o le Faatekinolosi: Atatosi o le Faatuatua
O Se Meaalofa o le Molimau ma le Alofa
Sa ou popole ina nei muta le molimau faamusika a Uso Bravenec, ae na ou vaai atu ia te ia o agai lemu atu i le okeni.
Ata na pueina e Carter Hydrick
“A o fetagofi i nei faatusa,”1 sa amata ona matou pepese. Sa ou moomoo maimau pe ana matou usuina vave teisi, ae sa ou taulai atu i le sauniga.
Sa oo mai se toafilemu ia te au, ma faatoafilemu lo‘u agaga. O le leo ma le fua o le okeni sa talafeagai lelei lava e saunia ai i matou mo le faamanatuga.
Sa ou tilotilo atu ma le agaga faafetai i le matou ta okeni a o ia luelue ma le migao i le musika. Sa ou toe mafaufau i le matou sauniga muamua i le valu tausaga talu ai. I ni nai masina ae matou te lei feiloai, sa faatamaia ai e le afisosolo le fale o Ed Bravenec, faatasi ai ma le tele o meatotino a lona aiga. A o matou faasoa atu ma faifeautalai se talanoaga o le talalelei i lona fale feaveai fou, sa tau mai e Uso Bravenec ia i matou sa ia taina le okeni.
“Ou te tata e faailoa atu ai la‘u molimau ma le alofa i le Atua,” o lana tala lea. Ona ma talanoa lea pe mafai ona ia tata mo le matou uarota pe afai e faatasi mai o ia i le Ekalesia.
Sa ou tilotilo atu i tumutumu o ona tamailima. Na mumutu nisi o ona tamailima. Sa musuia au e lona faatuatua, ae sa ou mafaufau e uiga i lona gafatia e tata ai.
“Ou te iloa o le a faafetai le Ekalesia mo oe i le faasoa atu o au meaalofa,” sa ou fai atu ai.
Sa faamalieina Uso Bravenec i la‘u tali, ma sa matou olioli i se lesona lelei ma le amataga o se faigauo mausali. E lei umi ae papatisoina o ia ma, e pei ona ia manao ai, na avea ma ta okeni a le matou uarota.
I le aluga o tausaga talu mai lona papatisoga, sa ou matauina ai ona luitau o le soifua maloloina na taitai atu ai i le aveese o se tasi o ona tamaivae. E lei leva lena, ae maua Sister Bravenec, o le sa toe toaga i le Lotu ina ua avea lona toalua ma se tagata o le ekalesia, i le laasaga 4 o le kanesa. Ona toe aveese lea o le isi tamaivae o Uso Bravenec.
Sa matou misia o ia mo ni nai vaiaso a o ia tausia lona toalua ma tauivi ai ma ona faigata. Ae e lei umi ae toe foi mai o ia i le lotu, ma faasoa mai lana molimau e ala i leo matagofie o le okeni.
I le 2019, na iloa ai e Uso Bravenec o le a aveesea se tasi o ona vae. Sa ou faanoanoa mo ia, ma le manatu o le a muta ona tausaga i le okeni. Ae i ni nai vaiaso talu ona uma le taotoga, sa ’etu’etu atu ai Uso Bravenec i le lotu i lona vae faapipii fou.
I le faaaogaina ai o tootoo e tau faapaleni ai lana savali, sa ia agai lemu atu ai i le okeni. O iina, sa nofo ai o ia i luga o le nofoa o le okeni, aveese lona vae faapipii, ma amata ona tata le uluai musika. I ni nai minute mulimuli ane, sa ia taina ai le viiga amata. Ona oo lea i le taimi o le faamanatuga.
“I le suafa o le matai,” sa matou usuina—leo ma le fua atoatoa.