Ang Kahayag sa Kalibotan

Samtang kita naglatas niining yutan-ong kinabuhi, kita makasugat og mga pagsulay, lakip sa malisod nga mga sirkumstansiya sa pamilya. Kini nga mga hagit makapahimo kanato nga mobati nga gibiyaan, nabalaka, o nawad-an og kadasig. Kon kita modangop ngadto sa tinuod nga tinubdan sa kahayag, nga ang Manluluwas nga si Jesukristo, kita mas maayong makanabigar sa atong lisod nga mga sitwasyon.

Niining isyu, si Presidente M. Russell Ballard naglatid og mga paagi nga atong makaplagan ang atong dalan latas sa mga problema. Siya nag-ingon, “Ang kahayag ni [Kristo] … nagtangtang sa mga anino sa kalibotan gikan sa atong taliwala ug sa atong hunahuna” (pahina 4).

Isip usa ka kanhi therapist sa kaminyoon ug sa pamilya, nakigtambayayong ko sa daghang pamilya nga nagsagubang og dagkong mga pagsulay. Ang mga pamilya nga migahin og panahon sa matag adlaw aron matugotan si Kristo nga makadayon sa ilang kinabuhi nakakaplag nga giubanan sa Iyang kahayag ug gugma samtang sila nakigbisog sa ilang mga kalisdanan. Ako mopaambit og pipila niadtong mga istorya diha sa akong artikulo sa pahina 8.

Mapasalamaton ko sa sagradong oportunidad nga akong naangkon, pinaagi sa akong buhat, sa pagsiguro nga ang mga pamilya ug mga indibidwal moapil sa Manluluwas diha sa dalan padulong sa pagkahimong usa ka katawhan sa Zion (tan-awa sa Moises 7:18). Nakasigpat ko og diyutay sa langit sa matag higayon nga akong makita ang impluwensiya sa Ginoo sa kinabuhi sa usa ka tawo.

Mapasalamaton,

Christy Monson