Digital Lamang: Mga Young Adult
Pinaagi sa Atong mga Binuhatan—Dili sa Atong Gigikanan—Kita Mailhan
Nakahukom ko nga dili nako itugot nga ang akong dili kaayo perpekto nga mga relasyon sa pamilya mobabag sa agianan sa mga panalangin nga gitagana sa akong Langitnong Amahan alang kanako.
Usa ka mabugnaw nga kagabhion sa Oktubre, ang mga amahan ug mga anak nga lalaki hinay-hinay nga nanulod ngadto sa daan nga Alpine Tabernacle alang sa sesyon sa pagkapari sa kinatibuk-ang komperensiya, bisan ang kutson nga mga lingkoranan sa choir napuno. Milingkod ko sa luyo nga laray sa lingkoranan sa dako kaayo nga lawak tigumanan—nag-inusara, ingon sa kanunay. Lisod nga dili masuya sa ubang mga batan-ong lalaki nga giagbayan sa ilang mga amahan. Walay tawo nga makapakita og ingon niana nga pagmahal alang kanako. Ako ang 16 anyos nga batang lalaki nga gikan sa “naguba nga pamilya.” Ako ang batan-ong lalaki kansang amahan mibiya sa iyang pamilya, nagbilin kanako og makauulaw nga kabilin sa pagkadili angay ug kaulaw.
Padayon kong nagtan-aw samtang ang magsoong lalaki nga Beck naglakaw padulong sa ibabaw nga laray sa humok nga mga lingkoranan sa choir, nanagpahiyom ug nangatawa, uban sa ilang amahan nga nag-una sa paglakaw. Nasayod gayod ko nga magkuyog ni sila mag-ice cream inig ka human sa miting. Ug nasayod usab ko nga mouli ko nga mag-inusara.
Naglingkod ko, gitukod akong mga siko sa tuhod nga dili komportable sa tampi sa lingkoranan, gusto nga mahuman na ang miting sa dili pa kini magsugod. Akong giingnan ang akong kaugalingon, “Ugma damlag, mahimo kong usa sa mga amahan nga moagbay sa iyang mga anak nga lalaki ug modala kanila ngadto sa mga lingkoranan sa choir; ugma damlag, mahimo ko nga tanang butang nga ang akong amahan napakyas sa pagbuhat.” Misaad ko nga mahimong lahi sa tanan nga labing maayo nga paagi—sa pagmugna sa akong kaugalingong pamilya, luwas gikan sa mga palas-anon sa kaulawan.
Dayon, usa ka milagro ang nahitabo: ang mamumulong, si kanhi Elder Boyd K. Packer (1924–2015) sa Korum sa Napulog Duha ka Apostoles, miingon nga gusto siya nga maghisgot og hilisgotan nga ang mga amahan kinahanglan mohisgot uban sa ilang mga anak nga lalaki. Apan, miingon siya, nahibalo siya nga daghan sa mga batan-ong lalaki walay mga amahan nga makigsulti kanila bahin niining sensitibo nga mga hilisgotan, mao nga gusto niya nga mamulong mismo ngadto sa batan-ong mga lalaki. Kadto daw si Elder Packer nagpadungog-dungog nako ug nakigsulti direkta kanako, nagpasabot sa iyang kaandam nga mobarog nga amahan nga dugay na nakong gihandom sulod sa katuigan.
Nianang higayona gayod, determinado ako nga dili nako tugotan ang akong kasaysayan sa pamilya, ang akong personal nga mga kahimtang, o ang akong dili kaayo perpekto nga mga relasyon sa pamilya nga mobabag sa mga panalangin sa akong Amahan sa Langit nga hingpit nga maanaa kanako! Nianang gabhiona, nangayo ko og tambag gikan sa usa ka propeta, manalagna, ug tigpadayag. Siya mao ang mahimong amahan nga wala nako maangkon. Bisan og wala akoy kahigayonan sa pakigsulti kaniya og direkta, ug wala nako mabati ang iyang bukton nga miagbay kanako, sukad niadto, aktibo akong nangita og tambag gikan sa iyang mga pakigpulong, mga libro, ug instruksiyon sa paningkamot nga mabuntog ang tanang kalisdanan ug kasagmuyo nga akong gisagubang sa kinabuhi.
Nangita usab ako og laing mga tawo nga mangamahan ug mga impluwensya sa pamilya. Si Enos gikan sa Basahon ni Mormon nahimong akong igsoong lalaki kinsa mitudlo kanako kon unsaon sa pag-ampo sa matinguhaon nga paagi. Ang akong igsoong lalaki nga si Nephi mitudlo kanako sa pagsunod nga walay pagduhaduha ug sa pag-atubang sa daotang mga impluwensya gamit ang espiritwal nga kalig-on. Si Alma nahimong akong magtutudlo ug mihatag og maalamong tambag, nagtabang kanako nga dili mahadlok apan dili magpalabi-labi ug maglikay sa pagkatapolan. Si Moroni mitudlo kanako nga mag-inusara sa paglahutay sa mga kalisdanan sa kinabuhi samtang kanunay nga maningkamot nga magpabiling matinud-anon ug matuohon.
Ang akong pagpangita alang sa takos nga mga tawo nga mangamahan nakagiya usab kanako ngadto sa uban kinsa nakatabang sa akong mga desisyon, sama sa mahunahunaon nga mga coach sa drama, mga coach sa debate, ug mga coach sa football. Usa ka talagsaon nga silingan, si Brother Beal, mitabang kanako pinaagi sa iyang asawa nga kanunay nga magtupi nako ug maghuwat sa atubangan sa akong balay nga magdala og mansanas ma-Domingo sa buntag sa dili pa ko niya kuyogan ngadto sa miting sa pagkapari.
Sa akong pagbiya sa tabernacle nianang gabhiona, imbis mag-inusarang molakaw pauli o wala kaayo ganahi ug mibati nga dili importante tungod sa talagsaong kahimtang sa akong pamilya, mibati kog paglaom ug kadasig: Makaangkon ko og koneksiyon sa usa ka Apostol ni Jesukristo. Trayntay dos ka tuig human niadto, ang akong asawa ug ako gidapit sa pakigkita uban ni Elder Packer sa iyang opisina. Ang Langitnong Amahan mihatag kanako sa malumong kaluoy nga nakahimo sa pagsulti ni Elder Packer kon unsa siya ka importante ngari kanako sa tibuok kinabuhi. Samtang naghisgot kami og calling sa pagserbisyo isip presidente sa misyon, ang tawo nga nangamahan nako mihatag og kaalam ug tambag nga nagpadayon sa pagserbisyo kanako bisan karon.
Mga apostol padayon nga migiya kanako. Si Elder Gerrit W. Gong sa Korum sa Napulog Duha ka Apostoles miingon:
“Sama nga ang kalipay moabot diha sa mga pamilya, ingon usab ang kasub-anan. Walay indibidwal nga hingpit, ni ang bisan kinsang pamilya. Kon kadtong kinsa kinahanglang mohigugma, moamuma, ug mopanalipod kanato mapakyas sa pagbuhat sa ingon, kita mobati nga biniyaan, maulawan, masakitan. Ang pamilya mahimong haw-ang nga bayanan. Apan, sa tabang sa langit, kita makasabot sa atong pamilya ug makig-uli sa usag usa.
“Usahay ang dili matarog nga pasalig ngadto sa makanunayon nga relasyon sa pamilya makatabang kanato nga matuman ang lisod nga mga butang. Sa ubang kahimtang, ang komunidad mahimong pamilya.”1
Atong mabasa diha sa mga kasulatan nga pinaagi sa atong “mga binuhatan” kita mailhan ug mahibaloan sa atong mahigugmaon nga Langitnong Amahan (tan-awa sa Mateo 7:16–20). Dili kita mahibaloan, mahukman, o malimitahan pinaagi sa atong mga kaliwat. Ang pipila kanato gikan sa mga kaagi [background] ug mga kasintaian sa kinabuhi nga dili kaayo maayo, apan ang atong mga kahimtang sa kinabuhi wala maghulagway kanato o maghukom sa atong mga kapalaran. Ang atong makagagahom nga Amahan sa Langit ang makahimo ug makapabayaw kanato ngadto sa Iyang langitnong mga korte sa kahitas-an kon kita moduol lang ngadto sa Iyang Anak, si Jesukristo, pinaagi sa pagkamasulundon ug pagsunod sa atong mga pakigsaad.
Palihog hibaloi nga kon si kinsa ka man ug bisan unsa ang imong talagsaon nga personal nga mga kahimtang, matag panalangin maanaa kanimo pinaagi sa imong matinud-anong pagpanaw sa dalan sa pakigsaad.