Digital Lamang
Lima ka Mensahe nga Kitang Tanan Kinahanglan nga Makadungog
Ang duha ka dako nga sugo mao ang tuyo ug tumong sa ebanghelyo ni Jesukristo. Kini mao ang pundasyon kon si kinsa kita isip Iyang mga sumusunod.
Bisan og ang atong mga kahimtang managlahi, ang atong mga tinguha managsama. Tungod niini nga hinungdan, adunay piho nga mga mensahe nga ang tanan sa mga anak sa Dios kinahanglan nga makadungog. Gusto kong mopakigbahin kaninyo og lima niining mensahe—mga kamatuoran ug tambag nga mosulti kanatong tanan.
1. Moabante padulong sa kahayag.
Niadtong kapitan pa ko sa eroplano, usahay akong ipalupad ang akong Boeing 747 gikan sa Germany paingon sa West Coast sa Estados Unidos. Niadto nga mga biyahe sa kasadpan, ang adlaw murag walay kataposan. Migikan mi sa Germany ala 1:00 sa hapon, ug paglabay sa 10 ka oras mitugpa kami sa California—alas 2:00 sa hapon sa samang adlaw! Ang adlaw wala gayod namo makita nga misalop.
Ang sukwahi mahitabo kon maglupad paingon sa sidlakan. Ang pagsalop sa adlaw mas paspas kay sa naandan. Mobiya pagka-ala 1:00 sa hapon nagpasabot nga sa pipila lang ka oras, kami mapalibotan na sa labing ngitngit nga kagabhion. Pero, tungod sa among direksiyon ug katulin, sulod sa pipila lang ka oras ang among nahimutangan anaa sa hilabihan nga kahayag ug kasagaran suwaw kaayo nga kahayag.
Bisan mobiyahe ako sa kasadpan man o sa sidlakan, ang adlaw dili gayod mausab ang nahimutangan. Mao ra gayod ang posisyon niini, makanunayon diha sa kalangitan, naghatag og kainit ug kahayag ngadto sa kalibotan.
Ang akong pag-agi niana nga kainit ug kahayag nagdepende sa akong lokasyon, direksiyon, ug katulin.
Sa samang paagi, ang Dios anaa sa Iyang kalangitan. Dili gayod Siya mausab, apan kita mausab.
Kitang tanan nagkinahanglan sa impluwensya sa Dios sa atong kinabuhi, ug gani kitang tanan adunay mga higayon nga atong bation nga kita anaa sa kawalay paglaom.
Kon kadto nga mga higayon moabot, kita makasiguro nga ang Dios, sama sa adlaw, kanunay nga anaa. Kon kita magmasinugtanon Kaniya, Siya mogakos kanato ug mopuno sa atong mga kalag sa kainit, kahibalo, ug giya.
2. Kamo mas maayo kay sa inyong gihunahuna.
Ang Ginoo kanunayng migamit og gagmay ug yano nga mga butang sa kalibotan aron sa pagpahinabo sa Iyang mahimayaong mga katuyoan (tan-awa sa Alma 26:12; 37:6).
Si Jeremias nagtuo nga batan-on pa kaayo siya nga mahimong usa ka propeta (tan-awa sa Jeremias 1:6–7).
Si Moises nagduhaduha sa iyang kaugalingon tungod kay siya dili maayong mosulti (tan-awa sa Exodo 4:10–12).
Si Enoch mibati og kakulang sa pagsangyaw og paghinulsol tungod kay, sa iyang mga pulong, “ang tanan nga mga katawhan nagdumot kanako” (Moises 6:31).
Ang Ginoo sa kasagaran makahimo og labing daghan uban niadtong kinsa mobati nga nakahimo og labing gamay. Mikuha siya og batan-ong magbalantay sa mga karnero ug mihimo kaniya nga kusgan sa pagpatay sa usa ka kaintapan nga higante ug sa pagpangulo sa usa ka bag-ong nasod ngadto sa pagkabantogan (tan-awa sa 1 Samuel 17).
Usa ka batang mag-uuma nga wala makaeskwela nahimong bantogan nga propeta sa ulahing mga adlaw kinsa misugod sa usa ka kahibulongan nga buhat ug usa ka katingalahan.
The Desires of My Heart [Ang mga Tinguha sa Akong Kasingkasing], ni Walter Rane
Sa atong dispensasyon, ang Dios mikuha og usa ka batan-on, batang mag-uuma nga wala makaeskwela ug mitudlo kaniya hangtod nga siya nahimong ang bantogan nga propeta sa ulahing mga adlaw kinsa misugod sa usa ka kahibulongan nga buhat ug usa ka katingalahan nga karon gadahunog sa matag nasod sa kalibotan.
Tingali kitang tanan nagtan-aw sa atong kaugalingon nga ubos ra og bili. Dili takos. Walay talento. Walay butang nga espesyal. Kulang sa kasingkasing, hunahuna, mga kapanguhaan, karisma, o pamarog aron mas magamit sa Dios.
Miingon ka nga dili ka perpekto? Daghan na ta! Ikaw na tingali ang tawo nga gipangita sa Dios.
Ang Ginoo nagpili sa mapaubsanon ug maaghop—sa usa ka bahin tungod kay sila mapaubsanon ug maaghop. Niini nga paagi, walay gayoy pangutana kabahin sa rason sa ilang kalamposan. Kining talagsaon, ordinaryo nga mga tawo nakahimo og dagkong mga butang dili tungod kon si kinsa sila apan tungod kon si kinsa ang Dios! Kay “ang dili mahimo sa tawo mahimo sa Dios” (Lucas 18:27, Maayong Balita Biblia; tan-awa usab sa Marcos 10:27).
Ang Dios wala magkinahanglan kaninyo nga mahimong talagsaon, labi pa nga perpekto.
Iyang kuhaon ang inyong mga talento ug mga abilidad ug pagdaghanon kini—bisan og kini mora og nihit ingon sa dyotay nga mga pan ug mga isda. Kon mosalig kamo Niya ug magmatinud-anon, Siya mopadako sa inyong mga pulong ug mga buhat ug gamiton kini sa pagpanalangin ug pagpangalagad sa pundok sa katawhan! (tan-awa sa Juan 6:8–13).
Ang Dios wala magkinahanglan sa mga tawo nga walay lama.
Siya nangita niadtong kinsa mohalad sa ilang kasingkasing ug sa usa ka andam nga hunahuna (tan-awa sa Doktrina ug mga Pakigsaad 64:31–34), ug Siya mohimo nila nga hingpit diha kang Kristo (tan-awa sa Moroni 10:32–33).
Nahigugma ba kita sa atong mga pamilya, mga higala, ug mga silingan?
The Good Samaritan [Ang Maayong Samarianhon], ni Walter Rane
3. Pagkat-on sa paghigugma sa Dios ug sa usag usa.
Sa dihang ang usa ka Pariseo nangutana ni Jesus kon unsa ang labing dako sa mga sugo, ang Manluluwas mipalig-on sa kataposang higayon kon unsa gayod ang atong mga prayoridad isip mga indibidwal ug isip usa ka Simbahan:
-
Higugmaa ang Dios (tan-awa sa Mateo 22:37).
-
Higugmaa ang imong isigkatawo (tan-awa sa Mateo 22:39; tan-awa usab sa mga bersikulo 34–40).
Kana mao ang gitutokan sa ebanghelyo. Kini kinahanglan nga mao gayod ang tutokan sa atong matag paningkamot isip usa ka Simbahan ug isip mga disipulo ni Jesukristo.
Ang mga hilisgotan ug mga baroganan sa ebanghelyo halapad kaayo ug buhong nga pwede kitang mogahin sa tibuok kinabuhi sa pagtuon ug dili pa igo ang masabtan. Kitang tanan adunay mga hilisgotan o mga baroganan nga makapaikag kanato kay sa uban. Natural lang, mao kana ang mga butang nga kita maagni sa pag-apil, sa paghisgot, ug sa paghatag og gibug-aton sa atong pagserbisyo sa Simbahan.
Mahinungdanon ba kadto nga mga baroganan? Sigurado.
Apan makahimo kita og maayo sa pagkonsiderar kon kini mao ba ang labing mahinungdanon.
Ang karaan nga mga Pariseo mipundok og gatosan ka mga lagda ug mga sugo gikan sa sagrado nga mga sinulat. Mihimo sila og dakong paningkamot sa pagkatalogo niini, pagsunod niini, ug pagpatuman sa uban sa pagpuyo niini uban sa katukma. Nagtuo sila nga ang eksaktong pagsunod sa labing gamay niini nga mga pamaagi makapadala sa mga tawo ngadto sa Dios.
Asa man sila nasayop?
Wala sila manumbaling sa unsay importante.
Wala sila manumbaling sa unsay labing bililhon sa ilang mahangtoron nga katuyoan.
Ilang nakita ang pundok sa mga lagda nga mga buhatonon lamang imbis mga paagi aron makab-ot ang mas mahinungdanon nga tumong.
Dali ra ba tang matakdan sa samang sayop karon? Kon kita mamalandong, sigurado ko nga makapundok kita og lista sa mga gidahom sa ulahing mga adlaw nga mokompetensiya o tingali molabaw pa niadtong natipun-og sa una.
Wala giingon nga kini nga mga lagda ug mga hilisgotan sa ebanghelyo dili mahinungdanon o bililhon. Aduna kini katuyoan. Kini kabahin sa kinatibuk-an.
Makadala kini kanato paingon sa unsay importante, apan dili kini ang importante.
Mga sanga kini sa punoan, apan dili kini ang punoan. Ug kon kini mahibulag gikan sa punoan, mawala ang kinabuhi niini. Kini malaya ug mangamatay. (Tan-awa sa Juan 15:1–12.)
Kon magkita na kita sa Manluluwas diha sa atubangan sa hukmanan, kita moasoy kon giunsa nato pagsunod ang duha ka dako nga sugo.1
Gitinguha ba gayod nato ang Dios? Ato ba Siyang gihigugma uban sa tibuok natong kasingkasing, gahom, hunahuna, ug kusog?
Gihigugma ba nato ang atong mga pamilya, mga higala, ug mga silingan? Sa unsang paagi nato gipakita kana nga gugma?
Atong gimahal ang tanang baroganan sa ebanghelyo. Kita “mabuhi pinaagi sa matag pulong nga mogula gikan sa ba-ba sa Dios” (tan-awa sa Doktrina ug mga Pakigsaad 84:44). Ug gani kinahanglan kitang mohinumdom kanunay nga ang “tibuok nga balaod ug mga pagtulon-an sa mga propeta” nagpunting ngadto sa duha ka dako nga sugo (Mateo 22:40).
Mao kini ang tuyo ug tumong sa ebanghelyo ni Jesukristo. Kini ang pundasyon kon si kinsa kita isip Iyang mga sumusunod.
Samtang ang uban nakigbingkil Kaniya, si Jesus misulti sa yano nga kamatuoran—wala sa kasuko apan sa kalma nga harianon.
The Lord Accused before Caiaphas [Ang Ginoo Giakusahan sa atubangan ni Caifas], ni Frank Adams
4. Ang panagbangi dili kalikayan; ang panagbingkil usa ka pagpili.
Usahay makaingon kita kon unsa ka maayo unta sa kinabuhi kon wala lang gayod untay oposisyon.
Si Jesukristo—ang atong modelo sa kahingpit—wala magpuyo og kinabuhi nga walay panagbangi. Siya gisupak sa tibuok Niya nga pagpangalagad, ug sa Iyang kataposan nga mga oras Siya gibudhian sa usa ka higala, giakusahan sa bakakon nga mga saksi, gibutang-butangan, gilatigo, nagkadugo, ug gilansang.
Unsa man ang Iyang tubag?
Ngadto sa uban, wala Siya molitok og usa ka pulong.
Ngadto sa uban, Siya misulti og yano nga kamatuoran—wala sa kasuko apan sa kalma nga harianon.
Samtang ang uban nakigbingkil kaniya, Siya nagpabiling lig-on sa Iyang mga gituohan—nagsalig sa Iyang Amahan, kalma lang sa Iyang pagpamatuod, lig-on diha sa kamatuoran.
Ang panagbangi dili kalikayan. Usa kini ka kahimtang sa mortalidad. Kabahin kini sa atong pagsulay.
Ang panagbingkil, bisan pa man, usa ka pagpili. Usa kini ka paagi nga ang mga tawo mopili sa pagtubag sa panagbangi. Ug kita makapili sa mas maayo nga paagi.
Ang atong kalibotan napuno sa panagbingkil. Kita adunay paagi sa paggamit niini sa tanang higayon: diha sa balita, sa social media—bisan, usahay, sa atong mga relasyon niadtong atong gihigugma.
Dili kita makausab sa kapait, kasuko, o kapungot sa uban.
Kita, hinuon, makapili sa atong pagtubag.
Syempre, kini sayon isulti ug lisod buhaton.
Aron paglikay niadtong kinsa makigbingkil magkinahanglan og dakong disiplina. Apan mao kana ang unsay gipasabot sa pagkahimong usa ka disipulo. Si Jesus mitudlo, “Siya nga may espiritu sa panagbingkil dili gikan kanako, apan gikan sa yawa, kinsa mao ang amahan sa panagbingkil. … Mao kini ang akong doktrina, nga ang ingon niini nga mga butang pagahunungon” (3 Nephi 11:29–30).
Kon ang Dios mosulti—bisan og Siya motawag kanato sa paghinulsol—ang Iyang tingog dili “usa ka tingog sa dugdog, ni … usa ka tingog sa usa ka dako nga kaguliyang nga kasaba, apan … usa kini ka hagawhaw nga tingog nga hingpit sa kalumo, [sama sa] usa ka honghong, [nga modulot] bisan ngadto sa kinahiladman sa kalag” (Helaman 5:30).
Isip mga sumusunod ni Jesukristo, kita mosunod niini nga ehemplo. Kita dili mopakaulaw o moataki sa uban. Kita magtinguha sa paghigugma sa Dios ug sa pag-alagad sa atong mga silingan. Kita magtinguha nga malipayong motuman sa mga sugo sa Dios ug magpuyo sa mga baroganan sa ebanghelyo. Ug kita modapit sa uban sa pagbuhat sa ingon.
Kita dili makapugos ni bisan kinsa sa pag-usab. Apan kita makahimo sa paghigugma kanila. Kita mahimong ehemplo sa unsa gayod mahitungod ang gipahiuli nga ebanghelyo ni Jesukristo. Ug kita mahimong modapit sa tanan sa pagduol ug pagpahisakop.
Kon ang uban moinsulto kanato, baslan ba kini nato og kalayo?
Dunay mas maayo pa nga paagi.
Ngadto sa uban, kita walay isulti. Ngadto sa uban, mosulti kita uban sa hilom nga dignidad kon si kinsa kita, unsa ang atong gituohan, ug nganong kita mituo. Mobarog kita nga masaligon sa atong hugot nga pagtuo sa Dios, nagsalig nga Siya motabang kanato sa atong mga pagsulay.
Himoon nato ang buhat sa atong Amahan.
Daghan kita og buhaton aron sa pagsunod ni Kristo. Ato kanang buhaton pinaagi sa pagkat-on sa paghigugma sa Dios ug motabang aron sa pagpanalangin sa uban.
Oo, anaa pa gihapon ang panagbangi. Apan ang atong labing gamhanan nga Amahan sa Langit nagsaad nga Siya makig-away sa atong mga gubat para nato (tan-awa sa Exodo 14:13–14; Deuteronomio 3:21–22; Salmo 20:6; 34:17; Mga Panultihon 20:22).
Christ in Gethsemane [Si Kristo sa Getsemani], ni Harry Anderson
5. Ang atong Langitnong Amahan usa ka Dios sa bag-ong mga pagsugod.
Hangtod nga kitang mga mortal motunob niining talagsaon, maanindot nga planeta, makahimo kita og mga kasaypanan. Dili kini usa ka sorpresa ngadto sa Dios.
Tungod niini nga rason, Siya mipadala sa Iyang Bugtong Anak aron matawo ngadto sa usa ka mortal nga babaye, mopuyo og usa ka hingpit nga kinabuhi, ug maghimo og dako, mahangtoron nga sakripisyo nga molimpyo kanato gikan sa sala ug mohimong posible sa pagkabalaan, kalinaw, ug kahimayaan sa tibuok kahangtoran samtang maghinulsol kita ug magbaton og hugot nga pagtuo diha Kaniya.
Tungod ni Jesukristo, ang atong mga sayop, atong mga sala—bisan ang atong matag adlaw nga mga kasubo, kasakit, mga kasagmuyo, ug mga kapakyasan—mamaayo. Salamat sa atong Manluluwas, ang maong mga butang dili makapugong kanato sa pagpatuman sa atong balaang padulngan!
Ang Manluluwas nagdapit kanato, “Duol kamo kanako, kamong tanan nga gikapoyan ug gibug-atan sa inyong gipas-an ug papahulayon ko kamo” (Mateo 11:28). Nagtanyag Siya og kapasayloan ug kalig-on sa paglambo. Tungod ni Jesukristo, atong mabiyaan ang atong mga kabudlay, modesidir sa matag adlaw nga mosunod Kaniya.
Ang atong Langitnong Amahan mao ang Dios sa bag-ong mga sinugdanan. Matag adlaw, matag oras, mahimong usa ka bag-o nga pagsugod—usa ka kahigayonan sa pagbag-o sa atong kaugalingon diha sa Balaang Espiritu ug mahimong mas maayo sa paglakaw isip tinuod ug matinud-anon nga mga disipulo sa Manluluwas. Ang Iyang ebanghelyo mao ang maayong balita nga kita makasugod pag-usab—mahimo kitang bag-ong mga binuhat diha ni Kristo (tan-awa sa 2 Mga Taga-Corinto 5:17).
Wala ako magsugyot nga atong ipakaubos o ipakaminos ang atong mga sala ug mga sayop. Dili nato kini ibalewala o sulayan og tago.
Hinoon, aron sa pagdawat og kapasayloan sa Dios, kinahanglan atong ikompisal ang atong mga sala. Kon kita hingpit gayod ug sa tinuod moila sa atong mga kahuyang nga kita makakat-on gikan niini ug mobuntog niini. Kinahanglan kitang mapaubsanong motimbang-timbang kon hain kita sa dili pa kita mousab sa atong padulngan ug molambo kon asa kita gusto.
Sa laing pagkasulti, kinahanglan kitang maghinulsol!
Samtang kita moambit sa sakramento, kita mohinumdom sa pakigsaad nga atong gihimo sa bunyag sa pagdawat sa ngalan sa Manluluwas ngari sa atong kaugalingon ug molakaw diha sa dalan sa pagkadisipulo. Mopadulong kita sa lingkoranan sa kaluoy sa Dios ug, diha sa pagpaubos, iyagyag ang atong mga sala sa Iyang atubangan isip halad sa sakripisyo ug mohangyo alang sa Iyang kalooy. Atong ipasalig pag-usab sa paghigugma ug pagserbisyo Kaniya ug sa paghigugma ug pagserbisyo sa uban. Manghangyo kita sa Iyang panalangin samtang atong ipahinungod ang atong mga hunahuna ug mga aksiyon ngadto sa Iyang pagserbisyo.
Buhata kini, ug bation ninyo ang kamot sa Dios nga gituyhad diha kaninyo. Ang Dios sa uniberso maghatag kaninyo sa kalig-on ug kadasig sa pagbuhat og mas maayo.
Adunay mga sayop ug mga sipyat sa umaabot. Apan sama lang nga ang matag pagsubang sa adlaw nagtimaan sa pagsugod sa bag-ong adlaw, matag panahon nga kita maghinulsol makahimo kita og bag-ong pagsugod paingon sa atong dalan sa pagkadisipulo.
Mahimo kitang magsugod pag-usab.
Nagtinguha ang Dios nga kita moduol ngadto Kaniya. Ang Iyang kaluoy igo ra sa pag-ayo sa atong mga samad, modasig kanato sa pag-abante sa unahan, molimpyo kanato sa sala, molig-on kanato alang sa mga pagsulay nga moabot, ug mopanalangin kanato uban sa paglaom ug sa Iyang kalinaw.
Kon kita magtinguha niini sa tibuok natong kasingkasing, ang Dios mogiya kanato niini nga mortal nga kinabuhi, ug Siya magpaabot uban sa bukas nga mga bukton aron sa paggakos kanato diha sa Pagkabanhaw.
Dili igsapayan sa atong mga kakulangan, dili igsapayan sa atong mga sayop, ang Dios mahimong moayo, modasig, ug molimpyo kanato.
Siya ang Dios sa bag-ong mga pagsugod.
Sama kaninyo, ako kabos nga magpapanaw kinsa naninguha nga dili hingpit nga molakaw sa dalan sa pagkadisipulo ug kinsa naglaom sa pagtuman sa dakong tinguha sa atong Langitnong Amahan—sa pagbalik ngadto Kaniya ug magpuyo, uban kaninyo, “diha sa usa ka kahimtang nga walay kataposan ang kalipay” (Mosiah 2:41).
Ako nag-ampo nga kamo makakaplag og paglaom, kalig-on, ug hingpit nga kalipay sa inyong pagpanaw, nga kamo unta makakaplag sa Dios ug mohigugma Kaniya sa tibuok ninyong kasingkasing samtang maningkamot kamo sa pagpanalangin sa mga kinabuhi sa uban.
Gikan sa usa ka pakigpulong nga gihatag sa BYU Education Week niadtong Ago. 17, 2021, nga giulohan og “Five Messages That All of God’s Children Need to Hear.”