Ang Kahayag sa Kinabuhi

Ni Presidente M. Russell Ballard

Akting nga Presidente sa Korum sa Napulog Duha ka Apostoles

Ang Manluluwas nga si Jesukristo mao ang atong kahayag, atong kinabuhi, ug atong dalan—kagahapon, karon ug sa walay kataposan.

Samtang misalop ang adlaw sa laing Dominggo niadtong 1948, nakaplagan nako ang akong kaugalingon nga naglakaw sa kilid sa Suba sa Trent diha sa Nottingham, England. Isip usa ka 20 anyos nga misyonaryo, bag-ohay lang ko gitawag isip usa ka presidente sa district. Kadto usa ka taas, mabudlay nga adlaw nga napuno sa mga miting ug pagpangalagad, apan malipayon ko ug natagbaw sa buhat.

Samtang ako naglakaw subay sa daplin sa suba, nag-ampo ako sa akong kasingkasing. Naglaom nga makabati og gamayng giya gikan sa Ginoo, nangutana ko, “Nagbuhat ba ko sa unsay Imong gusto?”

Usa ka hilabihan nga pagbati sa kalinaw ug pagsabot ang miabot kanako. Nianang eksaktong higayon, nahibaloan nako nga si Jesukristo nakaila kanako ug nahigugma kanako. Wala ako makakita og panan-awon o makadungog og tingog, apan dili unta ako mahibalo sa mas gamhanang paagi sa reyalidad ug pagkabalaan ni Kristo kon Siya mibarog pa sa akong atubangan ug mitawag sa akong ngalan.

Kining tam-is ug malumo nga kasinatian nakahulma sa akong kinabuhi. Gikan nianang adlawa hangtod karon, ang matag mahinungdanon nga desisyon nga akong gihimo naimpluwensiyahan sa akong kahibalo sa Manluluwas. Latas sa katuigan ug halos sa tibuok kalibotan, ako mipamatuod nga si Jesukristo mao ang Anak sa Dios, ang Kahayag sa Kalibotan. Usa ka pribilehiyo nato ang pagduol ngadto Kaniya, sa pagsunod Kaniya, ug sa pagbati sa Iyang kahayag sa atong mga kinabuhi.

Kahayag sa Kalibotan

Usa ka gabii human nianang halandomon nga misyonaryo nga kasinatian, ang akong asawa, si Barbara, ug ako nagtan-aw sa langit. Samtang among gibuhat, mihangad ko sa kahibulong sa minilyon ka bituon, nga daw walay sama ang kahayag ug katahom nianang gabhiona. Naghunahuna ko nga adunay katingala sa mga pulong sa Ginoo ngadto ni Moises: “Ug mga kalibotan nga dili maihap Ako milalang; ug Ako usab milalang alang sa akong kaugalingon nga katuyoan; ug pinaagi sa Anak Ako milalang kanila, kinsa mao ang akong Bugtong Anak” (Moises 1:33).

Gikan sa Manluluwas miabot ang gahom nga milalang ug mipasiga sa adlaw, bulan, mga bituon, ug sa yuta (tan-awa sa Doktrina ug mga Pakigsaad 88:7–10). Siya makataronganong makapahayag, “Ako mao ang kahayag sa kalibotan. Ang mosunod kanako dili na gayod maglakaw diha sa kangitngit kondili makabaton hinuon sa kahayag sa kinabuhi” (Juan 8:12; tan-awa usab sa Juan 9:5).

Sa mga pulong ni Presidente Dallin H. Oaks, Unang Magtatambag sa Unang Kapangulohan, “Si Jesukristo mao ang kahayag sa kalibotan tungod kay siya ang tinubdan sa kahayag nga ‘nagpadayon gikan sa atubangan sa Dios aron sa pagpuno sa walay kataposan nga kawanangan’ [Doktrina ug mga Pakigsaad 88:12].” Ang kahayag sa Manluluwas mao “ang tinuod nga kahayag nga nagdan-ag sa matag tawo nga moanhi sa kalibotan” (Doktrina ug mga Pakigsaad 93:2; tan-awa usab sa 84:46). Uban niini nga kahayag, makahibalo kita unsaon sa paghukom sa “maayo gikan sa daotan” (Moroni 7:16). Kining kinatibuk-an nga kahayag nailhan isip “ang kahayag sa kamatuoran,” “ang kahayag ni Kristo,” ug “ang Espiritu ni Kristo” (Doktrina ug mga Pakigsaad 88:6; 88:7; Moroni 7:16).¹

Si Apostol Juan miingon “Ang kahayag nagdan-ag diha sa kangitngit ug wala makabuntog niini ang kangitngit” (Juan 1:5). Sa atong panahon, nagkugi gayod og maayo si Satanas sa paggiya sa mga anak sa Dios ngadto sa kangitngit, gibabagan “ang kahayag, ug ang kinabuhi, ug ang kamatuoran sa kalibotan” (Ether 4:12).

Dili kita hingpit nga makasabot—o makahatag og bili—sa Manluluwas ug sa Iyang ebanghelyo kon mawad-an kita sa Iyang kahayag ug kamatuoran. Apan kon kita maghinulsol ug motuman, moserbisyo, ug mosimba Kaniya, atong mabuntog ang kangitngit. Ang Iyang kahayag mobalik ug motangtang sa mga anino sa kalibotan gikan sa taliwala kanato ug sa atong mga hunahuna.

Napanalanginan pinaagi sa Kahayag

Samtang ang atong kalibotan magkangitngit ug magkaguliyang, ang pagbati sa kahayag sa Ginoo sa atong mga kinabuhi daw mahimong sama sa usa ka hagit. Apan si Presidente Russell M. Nelson mipahinumdom kanato, “Ang nagkadugang nga kangitngit nga nag-uban sa kalisdanan [mas] nakapasanag sa kahayag ni Kristo.”²

Nakaplagan nako nga ang Iyang kahayag mas modan-ag sa akong kalag kon mogahin ako og panahon alang sa mga butang sa Espiritu atol sa malinawon, hilom nga mga higayon sama nianang gabii uban ni Barbara. Kana mao ang panahon nga moabot kanato ang espirituhanon nga mga impresyon, giya, ug kahayag. Kana mao ang panahon nga makasabot kita kon unsa kita ka bulahan nga adunay Manluluwas.

Isip ang Kahayag sa Kalibotan, ang Manluluwas modan-ag sa dalan sa atong mortal nga panaw pinaagi sa Iyang ehemplo ug mga pagtulun-an (tan-awa sa Juan 8:12). Siya mopagaan sa atong palas-anon pinaagi sa Iyang gugma ug kaluoy (tan-awa sa Mateo 11:28–30). Siya mopagaan sa atong kasingkasing pinaagi sa paglaom ug pag-alim pinaagi sa Iyang Pag-ula (tan-awa sa Moroni 7:41). Ug siya molamdag sa atong hunahuna pinaagi sa “Espiritu sa kamatuoran” (Doktrina ug mga Pakigsaad 6:15; tan-awa usab sa 11:13).

Si Elder David A. Bednar sa Korum sa Napulog Duha ka Apostoles miingon, “Sa matag panahon sa atong mga kinabuhi, sa tanang sirkumstansya nga atong masugatan, ug sa matag hagit nga atong atubangon, si Jesukristo mao ang kahayag nga nagwagtang sa kahadlok, naghatag og kasiguroan ug direksyon, ug nagmugna og malungtarong kalinaw ug kalipay.”³

Si Elder Ballard miserbisyo og misyon sa England gikan 1948 hangtod 1950.

Ipakita Ninyo ang Inyong Kahayag

Ang pribilehiyo sa pagpaambit sa kahayag sa Manluluwas ngadto sa uban ug sa pagdapit kanila nga moduol ngadto Kaniya ug mobati sa Iyang gugma alang kanila kanunayng espesyal kanako. Gimahal nako ang akong pagkamisyonaryo didto sa England. Gimahal nako ang akong pagkapresidente sa misyon didto sa Canada. Ug gimahal nako ang akong kasamtangang calling isip usa ka sakop sa Korum sa Napulog Duha ka Apostoles. Ang akong calling naghatag kanako og mga kahigayonan sa pagpamatuod ni Jesukristo ug sa pagpaambit sa mensahe sa Pagpahiuli sa tibuok kalibotan.

Sa karaang panahon, ang Manluluwas misulti sa Iyang mga disipulo:

“Kamo ang kahayag sa kalibotan. Ang siyudad nga nahimutang sa bungtod dili gayod matago. …

“Ipadan-ag ang inyong kahayag atubangan sa mga tawo aron makita nila ang inyong mga maayong buhat ug daygon nila ang inyong Amahan nga atua sa langit.” (Mateo 5:14, 16).

Ngadto sa katawhan ni Nephi, Siya miingon, “Tan-awa Ako mao ang kahayag diin kamo mopakita—nga diin kamo nakakita kanako nga mihimo.” Siya midugang “Kamo nasayod sa mga butang nga kamo kinahanglan gayod nga mobuhat diha sa akong simbahan; kay ang mga buhat nga kamo nakakita nga Ako mihimo kana kamo mobuhat usab” (3 Nephi 18:24; 27:21).

Sa atong panahon, sa samang paagi ang Manluluwas naglaom sa Iyang mga disipulo sa paggamit sa Iyang kahayag sa “[pag]papahawa sa kangitngit gikan [kanato]” (Doktrina ug mga Pakigsaad 50:25). Ang atong kahayag mosanag kon kita mohigugma sama sa paghigugma ni Jesus. Ang atong kahayag mosanag kon kita mopaambit sa atong pagpamatuod sa Pagpahiuli ug sa atong paglaom diha kang Kristo. Ang atong kahayag mosanag kon kita mopalanog sa atong mga tingog sa pagpanalipod sa kamatuoran. Ug samtang mosanag ang atong kahayag, atong madani ang uban ngadto sa tinubdan niana nga kahayag.

Paghatag og dili hinakog nga pagserbisyo, ug mabati ninyo ang Iyang kahayag diha sa inyong kasingkasing. Mapainubsanon nga mag-ampo alang sa mga kahigayonan sa pagpaambit sa ebanghelyo, ug magiyahan kamo ngadto niadtong andam, sa pagdawat sa Iyang kahayag. Higugmaa ang uban sa ginagmay ug dinagko nga mga paagi, ug mahimo ninyo nga mas maayo ug mas hayag kini nga kalibotan.

Detalye gikan sa Jesus Christ [Jesukristo], ni Harry Anderson

Usa ka Kahayag nga Walay Kataposan

Mahangtoron akong mapasalamaton alang sa kasinatian nga aduna ako isip usa ka batan-ong misyonaryo sa England sa dihang nahibaloan nako alang sa akong kaugalingon nga si Jesus mao ang Kristo. Mas segurado akong nasayod niini karon tungod kay nasinati nako ang kinabuhi uban sa tanang kalisod ug kalipay niini.

Ang akong serbisyo sa Simbahan nagpanalangin kanako og daghang talagsaon ug espesyal nga espirituhanon nga mga kasinatian nga daghan ra kaayo ug ang pipila sagrado ra kaayo nga hisgotan. Walay gasa nga mas importante ug bililhon nga akong mahatag ngadto sa akong mga anak, mga apo, mga apo sa tuhod, ug kaninyo, akong mga higala sa tibuok kalibotan, kay sa akong segurado nga saksi nga si Jesus mao ang Kristo, ang Anak sa atong Mahangtorong Amahan, ang Manluluwas ug Manunubos sa tanang katawhan.

Ang akong minahal nga asawa, si Barbara, mitaliwan niadtong 2018. Mapasalamaton kaayo ako nga mahibalo nga tungod sa among pagsilyo diha sa templo ug tungod ni Jesukristo, magkauban kami og balik, uban sa among pamilya, alang sa tanang kahangtoran.

Usahay, maluya ko. Niadto nga mga higayon, mohunong ko ug motan-aw sa usa ka hulagway sa Manluluwas. Maghunahuna ko Kaniya diha sa Getsemani, ug dayon, sa kalit lang, wala na ko gikapoy. Nasayod ako sa akong kasingkasing nga tungod kay Siya mibuntog sa kalibotan, “ang kangitngit miagi na ug ang matuod nga kahayag midan-ag na.” (1 Juan 2:8).

Ako nasayod nga si Jesukristo buhi. “Siya mao ang … usa ka kahayag nga walay kataposan, nga dili gayod mahimo nga mongitngit” (Mosiah 16:9). Siya mao ang atong kahayag, atong kinabuhi, ug atong dalan—kagahapon, karon ug sa walay kataposan. Hinaot nga kita magmakanunayon sa pagsunod Kaniya ug sa pagpasanag sa Iyang kahayag ngadto sa kalibotan.